Kolose 3

1Alat amu di iube Kristus Am eloho bak labet modi fa ahedi usaha di labe um laha gi elohona ozomom bak labet modi fa ahedi usahana ozomom bak. Ame bak lam gi neham bak. Alat uba modi fa ab im gàhàdi vou ladamam bak. Labi um fa im gàhàdi vou ladàmu uho gi Alat asum ahoba iuba Kristus bake modi Amti feà Dateli fa Am ahi totbaho laba modesu ahili na ahebu vuusdam bak iuba um ahu gi laba vitasu ozodale. 2Dam bakda nibe ibi iho faina ozome meedam bak laba tu vi ozodam bohu vuusdam bak lam uho a vi taulo àhàki meedamule. Uho gi um ahu asum ahoba iuba vitasu ozodam bohu meedale. 3Eho gi neham bak ozome uba labi gagoho bak. Um gi elohona ozomom labe uho amu faina meedam bak lam ba vi modem vabiem bak. Labi laha Kristus lam fa Alati vahi asum ahoba iuba ahili vàmadehemu uho Kristusti lab vou ali ahu vàmadi im fa gàhàdi meedam bak lam damat ba aam vabiem bak. Gi asum ahoba iuba vou ali ahu vàmadi meedamnat modem bak. 4Lahana umti vou ali ahu vàmadi uba modi fa im gàhàdi meedamda Kristus lam Alat ba diamut Aba ahate modi fi zeam bitoi tombalelo modem di labe Aho Alam na feà lam Aho fa modesu fauhali feà Dateli nom ilu tame. Labi ame di labe um laha Amti vahi ame na feà lam uba modesu um feà damalelo modem bak lam ahate modem labe damat aada tame. 5Ubu uho bak niba faina meedalo àhàki ozodume baleàhà bak lam ahebu ba a vi ozome meedamule. Nasi ahebu mu voedume seddale. Abo dat eloi seti im aho ozomna meedam biem bakti ulohona meedale. Abo im nehamna voedale. Ostame fi loholi ot vai ot vaidam bak ahebu ame. Labi ahate modem bak ba ladem vaba aam ahasbeam im ahebu meedam bak ame. Labi laha ame na modehelahit ahu gukeme neo, “Vi modese,” lahame faozohobusu vou vabodam bak ame. Labi laha uho neha, “Imo fai bak nim meedase. Imo fai bak nim meedase,” lahame um ahulat modelo àhàki meedam bak lam ahebu ame. Labi laha uho neha, “Na lada lam iho neo vi vadase,” lahame soat ziemausi vadam bak ame. Uho labihasu meedameam làhà uho fa Ala bake tum vaba gi ame nazoh laba tum bak am tame. Ame nazoh lam fa alali uho vou baedamna am tame. Labihàmu eho etei uba lab faina meedam bak vameadaha im zi lam ahebu nasi mu voedume seddale. 6Neham bak. Eho etei lab faina meedam bak vameadaha im zi lam damat ailahigeàmu meedam labe im Alat Aba Aho ozohoda lam meedaha vabake faki beoda tame. 7Uho amu Alat gagohona vuzehi meedaha vab di iube ubu uho faina meedume baleàhà im lam gi labaha bohu meedam damat modem bak. 8Lahana uho im faina nehasu ozome meedam bak nim ahebu etei nasi mu voedale. Abo meia faki meedam bak ame. Labi im gi koena aihina ahu gukeme gi kehàm vabna tufamoholem bak ame. Labi meia faki, “Mei fà beose,” lahame bisi fai bak la modi le modidam bak ame. Labi meia feàtàdam bak ame. Labi meia gadam bak ame. 9Labi ot vagei ot vageidam bak ame. Labihasu ahebu nasi mu voedale. Ubu uho amu faina meedam bak modi baleàhà bak lam gi ab mu voedaham bak. Ba akati fa vi meedalo mode? 10Labi etei Alat fa uba modi um fa im ab gàhàdi meedamam bak. Abo im bakda modeheda Ala labe, “Am itbaho fatose,” lahame dihasi uba vabiedume gàhàleda. Labi dihasi neo uba vabiedume gàhàleda. Labihadam bak. Uba vuusdam Ala, “Akatihasu meedam Alat modela?” laham bak lam um biem bake, “Uba modi um abo ozobohu aabodedase,” lahame Alat ahit uba labihadam bak. 11Alat iba labi vabiedume gàhàledam labe iho ba nehasu ozome gagodam vabiem bak. “Da lada lam Yahudit modemda ame. Labi da lada lam Yahudi dàt modem vabda ame. Da lada lam laso aubehà sokba ukbohoda ame. Da lada lam ukboho vabda ame. Da lada lam bahagikida dae ibida vameadam biemda alimda ame. Da lada lam ahusobuli ostame meedamda ame. Da lada lam mei na teo meedamda ame. Da lada lam mei na teo meedam vaba ahamo ozome meedamda ame?” lahame ba, “Ana damat modela?” laham bak lam ba bisi ozodume gagodam vabak. Neham labe labihaha bak. Na ahebu ozodam di bisi feàda Kristus am bak. Aho gi ozahit im ahebu vou ali ahu vàmadehe bak. 12Alat uba abo deeli meedam labe neha, “Umota fi hasi vuusu Am damali im Abadata fà meedase,” lahame gi amu di iube fet ozome esuhu labe um ab vame Am damaleham bak. Alat uba labiha labe uho gi nehame meedale. Meia aam faimu ot faobekesiame ahu im neà bakta ot vabiei ot vabieidam bak ame. Labi laha im ubuda daetesu meedam vaba gi feà vab damali ladehebeat im vameadam tadedam bak ame. Labi laha meia na im meedam di gi ahu neà baket meedam tadem bak ame. Labi damat uba git meedam di modeo, im fai bak duzum di modeo, uho gi ozahigeàmu laha vou faodam bak ame. 13Labi laha meit uba git modemeam uho ot vam vabna gi ozahigeàmu labaha bohu laha ot vou faoi ot vou faoidam bak ame. Labi laha im Boehàda Kristus labe Aba Aho amu uba lab ozahigeàmu fa vei neàdedaha bak lamti ulohona meit uba fakem im eheda laba uho gi ozahigeàmu fa ot vei neàdi ot vei neàdidam bak ame. 14Labihasu ahebu ot modidale. Lahana uho ot deeli ot deeliame modidam bak lam bisi tombu labe voom maemda am bak. Uho im lada lam meedam bak labet modi um abo vabademsu neàbodem bak am tame. 15Uho Kristus bake tu vuzehi vahi meedam dam zi mei dam zi mei lahadam dam laba Alat uba nehi ozo, “Uho bak ubuda laba im uho vi ozodume meia fakehe vaba gi ot vahi ot vahidase,” lahame Alat amu labihasu ahit fet ozome esuhu labe um vame debu ab vàmadeham bak. Labihàmu Kristusat uba modi uho ot vahi ot vahidam bak lam vàhàdem bak labna zohàme iademe vou faovoi meedale. Labi laha Alat uba neà bak meedàmu uho Aba laha, “Neàte,” lahame vou baedam tadele. 16Labi laha, “Kristus akatiham dàt modela?” laham im meit vameadahana lam uho amu nasi faasi aidume fota ozobohudehe bak lam laha mahate neo vi aime ozodume ozobohudi neàbodedale. Abo uho amu ozobohudehe bak lam vi susume iademe ot vahokei ot vahokeidale. Labi laha meit git meedam bak labna zohàme iademe im ot vahokei ot vahokeidale. Abo damat vahi Ala bake, “Neàte,” lahame vazisi vou ladeedam dae lam modeo, labi Alam Aha Nutabe Neàna labe meia modi vizi Ala bake vou ladeedam dae lam modeo, labihasu ahebu ototo vou ladeeidam labe Ala bake, “Am abo feàte,” lahame um ahu adat iedi vàmadi vou ladeedale. 17Labi uho amu neha, “Boehàda Yesus iba vuusu im vahokedam dam im am bak,” lahame gagodam dam labe ame im ulohodesu meedam bake im ubu uho meedamna modeo, im ubu uho gagomna modeo, labihasu ahebu gi iademe meedale. Labi uho ame bak lam meedam di um Yesusti vou ali ahu vàmadi meedàmu im Ai Ala bake, “Am abo feàte,” lahame tom vou baedam bak meedale. 18Lahi dam eheda oa, uho neha, “Iho Boehàda Yesus Amti vou ali ahu vàmadi meedam lahit modem bak,” laham lahi labe um damat uba gagom im lam uho uledi meedam tadele. 19Labi dam lahi eheda oa, lahi ubudate uho deeli iademe meedale. A faki dae meona beàdamule. 20Data zi oa, uho um ai modeo, um oi modeo, uba gagohona ahebu uledi meedam tadele. Alat uba deelem bak laba ozome labihadale. 21Um dam data eheda zi oa, uho um data bake im vahokedam di bisi, “Data fà iedese,” lahame a dae meoli feà bak fusi bebet im vahokedamule. Uho labi modemeam làhà fa uho deelem im modem bili gi ab momam bak. 22Um mei na teo meedam dam oa, uba na ooteme meedam dam labe ibi iho gagohona ahebu gi ozahit uledi meedam tadele. Gi uba aasuhet meedam di lamota a meedamule. Abo uba aam vabnàme gi ozahit ahebu uledi meedam tadele. Labi laha ame dam labe iho uba deeli vou baedam bak lamota a vi ozome meedamule. Gi im Boehàda Yesus laba deeli vou baedam bak laba ozome, “Am abo feàte,” lahame ahu adat iedi Aba vou baedam labe fa neo uba na ooteme meedam dam labe ibi iho gagohona ahebu gi ozahit ahu vàmadi meedam tadele. 23Labi laha uba gagohona uho meedam di a odohalehebeat meedume, “Zoho voose,” lahame a ozome meedamule. Abo gi ozahit ahu vàmadi neà bak ozome meedam bohu meedume aba gagoho bak fusi novale. Abo uba gi bak niba na ootedume meedamda labe uba gagu aim vabna abo im Boehàda Yesusat uba gagu aidamna ààmom bak. 24Uho lab teo meedaha bake ba diamut gohali vamna lam abo Alat amu neha, “Aho lo tame,” lahame amu fet ozome esuhuna lam im Boehàda Yesusat uba lodam bak um ozobohu labe labihadale. Nasi ozomale. Bisi uba im gagu meedamda imboda Boehàda Kristus Am am bak. 25Labi laha uho meit bisi dihasi faina meeda. Labi dihasi neo faina meeda. Bisi labihasu meedamda lam aba aho faina meedaha bak lam Alat fa ulohodesu modi vataum bak tadem bak. Dam ba fi me beodam vaba gi ostame beodume vataudam Alat modem bak.

will be added

X\