Meedaha Im 14

1Labi Paulusti Barnabasti ladume Ikonium laba ab lafuham. Laba lafusi ame dam ahim labe ibi iho bak mei bake le modem baket ab modeham. Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Yesus Aho amu meedume vou esmoho Im Neàna lam ab faasi vahokedaham. Ame dam behàsu labe im vameadam di damat aime uledem dam behàsu modehe labe Yahudi dam duada totbaho lamti labi Yahudi damat modem vab dam duada totbaho lamti labihasu dam duada zi labe ame im lam aime uledi Yesus bake ab tu vuzeheham. 2Lahana Yahudi dam totbaho labe vedi Yesus bake tu vuzehem mouda. Laham dam labe vedi Paulusti Barnabasti feàtàdam labe fa Yahudi damat modem vab dam laba le ooteda. “Ame dam behàsu lam giomim vameadalo. A aimule,” lahame ootedam labe ame dam labe fa Yesus bake tu vuzehi meedam dam lamti Paulusti Barnabasti laham dam laba faki ahu zoho ab beoham. 3Labihàmu Paulusti Barnabasti ame dam behàsu labe dam iba fakehenàme geàmu gi Ikonium laba ozahit vi azimzida. Labi ozahit laba azimzidam di labe Boehàda Yesus Aho amu meedume vou esmoho im lam meia iedehebeat vameadam vaba abo gi keàtet ame dam laba ahate vameada. Dihasi mode. Dihasi mode. Labihada. Labi laha Alat Am meia vizi teudemna lam ame dam behàsu laba modi vizi teudehe labe iho damat fet aame àvodi ozobohudemna abo na damat ihimo modem biem im feàna lam ab meedaham. Labihadaha bak lam ame Ikonium laba azim dam labe aahemu fa Paulusti Barnabasti ame dam ahim labe iho neha, “Alat abo dam ahebu ozahit deeli im neà bak meedam Ala Am am bak,” lahame lab vahokehe im lam, “Imbote,” lahame ab tu vuzeheham. 4Labihadamnàme ame Ikonium laba azihi dam lam bisi ahebu Yesus Aho amu meedume vou esmoho im lam tu vuzehem kai. Vedi otesiame ab faheham. Ame dam totbaho labe vedi Yahudi dam Yesus bake tu vuzehem mom dam laba tau. Labi dam totbaho labe vedi fa Yesusat Aho gagu olu Am im vameadume esmozi laiam dam behàsu laba tau. Labihada. 5Labihadume modeha ame Yahudi damat modem vab dam totbaho lamti labi Yahudi dam labe iba im vameame faheme modiam dam busaoda im ozobohuda zi lamti vazisi gago, “Imo dam behàsu nim vabidume ket beodume elose,” lahame aa im ab odoadamam. 6Lahana dam labe aa lab odoadam im lam Paulusti Barnabasti meit gagohona aime ozobohudehe labe bak lam neo vou esmozi fa Likaonia bak laba ab itaham. Likaonia bak laba itaha di ame bak laba modealaha num debu totbaho lamti labi num debu behàsu Listrati Derbeti laba ab lafusidaham. 7Laba lafusidam di Yesus Aho amu meedume vou esmoho Im Neàna lam neo ame dam laba ab vou vameatedume fi dedaham. 8Labi num debu Listra laba lafusi Paulus aho im vahokedam digat meida labe aaha dat nao ahim eloi nutabedehena ba gohatem biemna am oiat faaha di iube modehe bak lahasuhuda labe Paulusat vameadalo modem im ailo li nusuhu bak Paulusat ab aaham. 9Ame da labe Paulusat lab vameadam im lam dogoit aida. Labiha labe Paulusat ame da laba aasdamehamdi modeha Paulusat ahamo nasi fet ozo, “Ame da nim, ‘Alat am fa neàdem bak,’ lahame am ahu vàmadehe bak,” lahame Paulusat ahamo nasi fet ozobohudi ame da laba dae buduana ab gagoham. “Nasi usai duzule,” lahame labi gagoha ame da labe fa neàdi àvodehat usai duzu ab godamam. 11Labi ame dam duada zi labe Paulusat ame da lam fa neàdehe bak aahemu àvodi im Likaonia dae Paulusat aim biem dae lam ostam im ab faasi bisteat ab vameadamam. “Aa làhà! Ibi iho vou baedam alalehena zi lam fa dam ahim nim aliholi nom usi duzuhu alalehena behàsu am taia?” lahame dae ibida ab faasi bisteat ab vameadaham. Ame Likaonia bak laba azim dam labe Yahudi dam labe ibi iho vou baedam Ala imboda modehe vaba gi ostam ala Hermesti Zeusti vou baedam damat modem bak. 12Lahaha dam labe vedi nehi git ozo. Barnabas Zeus am tiba. Labi Paulus bisi Hermesti im vameadam meo bakti ulohoda modemu Paulus Hermes am tiba. Labihada. 13Labi ame Likaonia bak laba azim dam labe iho ostam ala Zeus bake vou baedam num lam gi num debu Listra labe am bàhàgo obe laba douda. Làhàmu ame num laba damat Zeus bake lomna ve vua vahudam toheda labe aho lembu abo sapiti ulohona fi ho lamti ut ava etehàso neme omahemna lamti bàhàgo natàh doo laba ab vou ledaham. Ame Zeusam toheda lamti Listra dam dua totbaho lamti iho ozo, “Iho vahi dam ahim nim vou baedalo modem bak,” lahame ame na fi ho zi lam vou ledume oddalo ab meedamam. 14Labi modeha Paulusti Barnabasti dam duada zi labe ibi iho meedalo modem bak aime ozobohudehemu, “Dam lam git meedalo. Akati iba alalehela?” lahame faki ibi iho damat fet aame ozobohudemna lam dam im sue ab it vome faheham. Damat aame ozo, “Dam ahim nibe iba faki im sue it vome fahehe?” laham bak damat fet aame ozobohudem baket ab modeham. Labi ame dam ahim labe iho damat im meedam laba emoeme dam soat ogiame ab oli duzuham. 15Duzu gago, “Aa! Um akati git iba vou baedà? A labi modemule. Im bakda umti uloho bak. Im ba meit vou baedam alat modem vabak. Im gi Yesus Aho amu meedume vou esmoho Im Neàna nehamna uba vou vameatedalo lehe bak. Uho neha, ‘Iba vuusuhu ala am tame,’ lahame dam itti ulohona modi alali ostame vou baedam ala zi lam uho nasi voole. Labi fa Ala imboda ahena elom gikida laba abo asum ahoba iumti bak adba nimti vaoti labi ame bak laba modealahana zi lamti labihasu ahebu modehe Ala laba fa tu vuzehi, ‘Am abo feàte,’ lahame ahu adat iedi Ala lada laba vou baedale. 16Aham di iube um Yahudi damat modem vab dam abo debu mei lahadaha dam labe uho ozo, ‘Iba vuusdam ala am tame,’ lahame ostam alalehena ahaladiame vabi vou baedam bak lam Ala imboda labe uba faki beoho vaba gi ozahigeàmu labihasu esuhu bak. 17Lahana uho Ala imboda vabi ostam alalehena laba vou baedam bak lam Aho uba bisi vooho vabak. Abo, ‘Am amat mode?’ laham bak lam Am ba uba vastehe vabak. Dam bakda niba Aho iba gi neà bak nehamda fet vouhoda. Iho na deddaha bak laba Aho asum labet modi abaeda. Labi abaedam labe fa neo na iho deddahana lam Aho modi duana usdume soaedam labe iho àda. Labihasu meedam labe im abo deeli, ‘Am Ala am tame,’ laham bak lam im ab ozobohudeham bak.” 18Lahame Paulusti Barnabasti dam ahim labe dam duada laba, “A labihamule,” lahame labi mali feà bak fusi vameadamnàme ame dam zi labe ozahigeàmu ame lembu oddume dam behàsu laba vou baedalo àhàki meeda. Labihàmu ame dam ahim labe neo mali daetesu meedàmu dam duada zi labe ozodaha vabamu ab moham. 19Labi ba di iube Antiokia laba azim Yahudi dam totbaho lamti labi Ikonium laba azim Yahudi dam totbaho lamti vazisi Listra niba ab leham. Labi li Listra azim dam Yahudi damat modem vab dam laba vameadume vi ootedume uledi dam labe leheda zi laba fa ab gut tauham. Labi fa gut vazisi Paulus bake le ket beodume, “Paulus eloho,” lahame vabili si vou kea lame num debu bak vou esmozi bàhàgo obe laba ab vou esmoham. 20Lahana dam Yesus bake tu vuzehi meedam dam labe vule Paulusat bisdam bak laba li vabousu dozeadume modeha Paulusat fa ab usaham. Usai fa bàhàgo vou esmozi ozahit fa num debu Listra laba fa ab laham. Labi izi dihasi Paulusti Barnabasti Listra vou esmozi fa num debu Derbe laba ab laham. 21Labi ame dam ahim labe Derbe laba le Yesus Aho amu meedume vou esmoho Im Neàna lam ame dam laba vou vameatedume fi desi modeha Derbe dam dua totbaho labe Yesus bake tu vuzehi ab Am im meedam damaleham. Labi Derbe laba vou vahoketedume neàdi laba novai ame dam behàsu labe iho amu lehe baket fa ab ladamam. Amu nasi Listra laba fa le izi labohote. Labi neo Ikonium laba fa le izi labohote. Labi neo Pisidia bak labe aba num debu meida Antiokia laba neo le izi labohote. Labihada. 22Labihadam di labe Paulusti Barnabasti dam Yesus bake tu vuzehi meedam dam labe im ahu bedi Yesus bake tu vuzehem bak voom bak labna zohàme im nehasu vi vahoketedume vabededa. “Im Yesus bake tu vuzehi meedam dam iho bak niba azim di damat iba abo duana vabidam bak. Labiha labe nasi ahu a bedi behàsdi Yesus bake tu vuzehem bak a voomule. Mahate tu vuzehem bohu meedale. Neham bak. Im Alam damaleheda im am bak. Im gi labihasu damat iba vabidam bohu meedume ba Alat Aho azihi bak neà bak laba le Aho iba vuusu im vahokeda tame,” lahame Paulusti Barnabasti ame im lam iho lehe bak labe fa faasi vou vahoke lada. 23Labi ame dam behàsu labe ibi iho lehe bak labe faasi vou vahoke ladam di labe gi nehame meeda. Num debu meida iuba le Yesus bake tu vuzehi vahi meedam dam meida fi me ve gago, “Oho dam Yesus bake tu vuzehi vahi meedam dam niba oho fa vuusu im vameame faheme modiam datelele,” lahame gagu afoezobe ahit na àm mu Ala bake tom gagodam labe nehada, “Ai Boehàda oa, dam nim Om Adat Yesus bake ab tu vuzeheham tame. Im le seti omozit Om Adat Yesus abo ame dam nibe iho tu vuzehe Boehàda labe fa ame dam niba iademe vou aasdale,” lahame Ala bake tom gagodume neàdi vou esmo. Labi num debu meida iuba le gi ame baket mode. Labihada. Ame dam ahim labe ibi iho lehe bak labet labihasu ahebu ab vou mode ladaham. 24Labihasu ahebu vou mode ladume neàdi Likaonia bak vou esmozi neo Pisidia bak ahebu gi ame baket neo meeda. Labi Pisidia bak ahebu ame baket meedume uloholi neo Pamfi lia bak laba neo laha gi ame baket meeda. 25Pamfi lia bak laba modesuhu num debu meida Perga laba esuhu dam lam aho Yesus Aho amu meedume vou esmoho Im Neàna lam neo vameadume fi desi neàdi fa neo itea feàna obe modesuhu num debu Atalia laba ab lazeham. 26Labi Atalia laba lazi Siria bak laba modesuhu num debu meida Antiokia bak laba lalo modemu fa sue baa vààsu nutabet vou lam ihe buduada laba ab ziddaham. Iba amu alimeat faasi vameadume oluhu bak Antiokia laba fa ab ladaham. Amu di iube Yesus bake tu vuzehi vahi meedam dam Antiokia laba azim dam labe iho Ala bake tom gago, “Dam behàsu nibe Oho gagohona iuba le mode iuba le mode lahadam di Oho vou aasu ozahit deeli im neà bak meedale,” lahame labi gagu oluhu labe Paulusti Barnabasti ame dam behàsu labe iho ame baket meedume neàdi iba amu tom gagu oluhu bak laba fa ab lafuham. 27Labi Antiokia laba fa lafusi Yesus bake tu vuzehi vahi meedam dam ahebu gagome bakamta vahe vahedume neàdi Alat iba modi teudehe labe ibi iho iuba le lab meedaha im lam ahebu ame dam laba vameada. Labi neo Yahudi damat modem vab dam labe amu Yesus bake tu vuzehem biem bake Alat iba modi vizi teudehe labe iho ame dam laba Alam im vou vameatedume modeha ame dam labe Yesus bake tu vuzehe bak lam iho neo dam laba vameada. Labihasu ame im zi lam dam laba ab vameadaham. 28Labi vameadume neàdi Paulusti Barnabasti ame dam behàsu labe gi Antiokia laba Yesus bake tu vuzehi meedam dam laba tau azimzida.

will be added

X\