2 Timotius 4

1Timotius oa, Kristus Yesus ba Boehàdateboli dam bake vuusu im vahokedalo bak niba fa li dam bakda abo elodahada ziti ahe lahasuhuda ziti laham dam labe ibi iho meedaha im lam uloodume aime neàdi dam fahelo modem bak. Labihasu meedalo modemu Alati Kristus Yesusti ba iba vi gagu aim bak ehe labe eho oba nehi gagolo mozo. 2“Oho Alam im imbona lam dam bake mahate vou vahokeidale,” lahame eho oba labihasu vi vameadam bak. Lahana oho ame im imbona lam vahokedalo modem di lam dam lam aim uledeo? Aim moheo? Laham bak lam gi geàmu dam laba vahokelo modem bak ozome ahumdesu esu afoezobe vahokeidale. Oho ame im imbona lam vahokedalo modem di gi nehadale. Dam git vahokedam dam lam oho fa odosi gagu vamdedale. Labi laha dam lam faina meedam di oho laha im vi vahokedume dam lam fa aidume ame faina meedam bak lam fa voedume fa neà bak vamdesu meedale. Labi laha dam bake vi vabededume ame dam labe im ahu fa teudedale. Oho bak lam meedam di a dae meona vi ooteme vahokedamule. Gi iademe betea dae nemahuba neàna im vi vahokedume afoezobe gi laha vou faodale. 3Eho gi neham bak vi ozome oba labihasu vameadaha bak. Ba diamut meit Alam im imbona vahokedahana lam damat fa aim mom meo bak ehete. Ame di lam ame dam labe vedi neha, “Ibi iho ozoho baket fa meedase,” lahame dam labe ibi iho valo ozoho guru zi lam vam di gi dam labe ahu ibi iho ozoho bak fa gagom guru zi lam vadalo modem bak. Ame dam labe faina modelo àhàkehe labe gi labihadalo modem bak. 4Ba ame im imbona lam aime tu vuzehi meedam vaba vedi fa gi meit imohim ostame faasi vou vameatedam im lam aime, “Imbote,” lahame tu vuzehi meedam bohu vuusdam bak. 5Lahana Timotius, oho na im ahebu meedam di ohomo naedat om ahu it vou faovoi iademe meedale. Labi na im oba modi geàdamna duzum di om bisi vi ozodume vanamai voom vaba gi ozahit keàtedi meedale. Labi laha ame Alam im Neàna lam dam alimda iuba laha vou vameatedam bohu vuusdale. Labi om Alam na gagu meedam dàt modemu ame im Alat oba gagohona lam ahebu gi ame im lamota keàtedi meedume folele. 6Eho gi neham bak vi ozome oba labi gagoho bak. Em elom bak ab fuham daleàmu oho mahate ot vai meedume bohulalele. Dam ahamda labe im ahu adat iedi Ala bake vou baedam bak laba ozome na fi ho oteme afoezobe anggur oo vaksa ve fa ame na fi ho vua vahusulo modemna laba vi veàtoi neàdem bak lamti ulohona eho Alat gagohona vou mode ledume neàdi em elom bak. 7Ame Im Neàna lam eho keàtedi dam bake vou vameatedaha bak. Labihàmu eho ozoha, ebe eho lab vou mode ledaha bak lam bisi vou mode ledaha bak neà bak am. Labi laha Alat eba gagohona lam ahebu eho ba meida vekehe vaba gi ahebu vou mode ledume neàdehe bak. Ebe eho lab meedume neàdehe bak lamti ulohona gi damat neha, “Amat nasi emoeme le lafuela?” laham bak lam aalo modem di nasi fi tu emoeme novaha bak laba lafuhuda lamti uloho bak. Labi em ba ibi iho tu vuzehe im imbona lam eho ba vanamai vooho vaba gi iademe ulohodesu vamdesu meedume vaitoho bak. 8Em im vamdesu meedam dàt modemu meia iademe vamdesu uloodume aime neàdi gagodamda lam abo im Boehàda Kristus labe Aho eho lab meedaha bak gohali lomna Aho Dam Bake Uloodume Vi Aime Ozobohudi Neàdi Fime Fahedam di eba lolo vi ozome ahumdi esuhuna ehete. Lahana ame na gohali lomna ahumdi esuhuna lam gi emota ozome ahumdi esuhu vabak. Abo dam Aho fa lem bak deeli tu vou faodam dam lamti lomna ahumdi esdam bak. 9Timotius oa, oho eba taho lem bak lam mahate modi ozoidale. 10Eho gi neham bak ozome oba labi gagoho bak. Demasat vedi, “Dam bakdat ibi iho meedam bak laba deeli am nazoh dualese,” lahame em vou esmozi fa num debu Tesalonika laba itaha bak. Labi Kreskes eho ahit gagu Galatia bak laba oluhu bak. Labi Titus laha eho ahit gagu Dalmatia bak laba oluhu bak. 11Labiha labe dam amu eba vou aasu vabiedam dam ahebu em vou esmozi ladume seddahana Lukasat ahamo vàmtea laha vaba eba tau aidam bak. Eba tau na meedamda Tikikus lam eho gagu num debu Efesus laba oluhemu om ba lem di fa Markus lebe ve omti ahili eba lele. Ame da Markus lam eba tau na meedam bak ozobohuda vàmtea am bak. 13Labi laha em nutahalem bake ahoba dusum sue sona eho amu Karpus labe am num debu Troas laba vou esmohona lam laha lebe ve vou lele. Labi laha em buku zi laha ve vou lele. Labi laha em na toehena bolohona baa lam laha ve vou lele. Na ebe lada lam bisi voom maemda am tame. 14Timotius oa, oho iademe modele. Dat Aleksander labe bak sime vamna abo tembaga vame meedume aliholi fa nazohaedamda labe eba abo fai bak duana meedaha bak. Labihàmu Boehàda labe ame bak laba vi ozome ame da laba ba modi itaholem bak duana vatauda tame. 15Iho neha, “Ibi iho im imbona vahokedase,” lahame meedaha di labe ame da lam gi di labet usai tetehesu gut odosi gagodamda am bak. Iba labihadam dàt oba neo fai baket meedam bak labna zohàme oho iademe aasu faode. 16Labi im meida neo oba gagolo. Meit git modehemu uloodume aidam num tom fi haba laba eho ahamte le duzu damat eba uloodaha di lam eba tau veibamda ba na vabak. Dam ahebu gi em vou esmozi ilidume seddaha bak. Lahana eho gi Ala bake nehadam bak. “Dam lam a beomule. Oho gi ozahigeàmu fa vei neàdele,” lahame labi gagodam bak. 17Lahana damat em vou esmohonàme Alat ba em vou esmoho vabak. Aho gi amu di iube eba vou aasu vabiedume modi em teudi meedaha bak neo di labe eba vi modi em neo teudi duzuhu bak. Aho labihahemu Yahudi damat modem vab dam labe tau dozeadaha diat eho iademe lab veibadaha Im Neàna ahebu lam ame damat vi aidaha bak. Labi laha ame di labe dam faina meedam dam labe neha, “Imo Paulus oteme voou setese,” lahame labi gagohonàme Alat eba soat vausu em fa vei neàdehe bak. 18Labihàmu eho ozoha, naat eba fai bak modi vàhàdelo modemna ahebu lam Alat gi eba soat vatohem bohu vou meedume neàdidume em asum ahoba iuba abo Aho azi dam bake vuusu im vahokedam bak iuba vou le abehamdem bak. Labihàmu imo Ala bake, “Feàte,” lahame Aba vou baedam bohu modesdase. Labihadase. 19Timotius oa, eho, “Neàte,” lahaha bak lam oho ve fa Priskilati Akwilati Onesiforus labe am amedamti laham dam laba gagole. 20Dat Erastus labe gi num debu Korintus laba le aidam lahasuhu bak. Labi dat Trofi mus lam gailehemu eho gi num debu Miletus laba vou esmoho bak. 21Oho eba niba lem bak a kehàmule. Di nutabe fai itea feàna laba nom ilu modi bubaholem di fuseo vabaleho. Nasi di nibe taho lele. Ebulusti Pudesti Linusti Klaudiati labi imti vahi Kristus bake tu vuzehi meedam dam totbaho nimti eba tau oba, “Neàte,” lahadam bak. 22Eho nehi ozo, “Alat oba vou aasu tau vabiedase. Labi omti vahi Kristus bake tu vuzehi vahi meedam dam totbaho lamti labihasu Alat uba laha ozahit deeli im neà bak modi esuidase,” lahame labihasu ozodume Ala bake tom gagodam bak. Neàte. Eho Paulusat sunit nim toedume ab neàdeham. Àhàm.

will be added

X\