2 Petrus 3

1Eho deeli meedam dam oa, sunit nim eho etei ba toeheda nim vi toedume uba oluhu bak ab behàsdeham bak. Sunit amu toeheda lamti etei ba toeheda nimti gi im uho amu ozobohudehena um fa vabilemna zohàme ozahit uba modi udovai, “Gi im neà bakta ahu vàmadi vi ozome meedase,” lahame uba toedume oluhu bak. 2Abo Alat neha, “Am im aime fa dam bake ahate vou vameatedase,” lahame Aho gagu fi hasi vadaha dam ahamda labe im im ame. Labi im Boehàda Yesus Kristus abo iba Soat Vausu Fa Vei Neàdemda labe Aho vameadume fi hasi esuhu im zi lam abo Aho amu Am im vameadume esmozi laiam dam nibe iho uba vameaha im ame. Labihasu uho fa vabilemna zohàme eho ozahit uba modi udovai uho fa ahu vàmadi vi ozodam bake sunit behàsu nim uba toedume oluhu bak. 3Im eho etei gagolo modemda nim tombuda meida modemu uho mahate iademe aimale. Digat folelo modem di abo Kristusat Aho ba fa lem bak fuseo meedam di nim dam bakda nibe im ahu adat faina meedalo àhàki ozomna labet iba it ootedam bak labet modi iho ame baket bohu vuusu meedam dam labe uba tau valiheda tame. Uho neha, “Yesusat fa bak niba lem bak,” lahame uho labihasu tu gagodam im laba ame dam totbaho labe vedi im ubuda fa tozome nehasu gagoda tame. “Ne, dam duada totbaho labe neha, ‘Kristus ba fa le tame,’ lahame fet gagu vàmadi esuhuna ame da alihi akete? Am fa lelo modem bake iho fet aame ozobohudemna akete? Im ba uho tu gagom im lam tum moho bak. Im tai ahobada zi labe gi aham di iube elodume seddaha bak. Lahana bak nim ahebu ba veimdem kaio. Gi Alat ahamte alimeat modi esuhu bak lahasuhu bak. Ba uho tu gagom im lam akati im tue?” lahame ubu uho tu gagom im laba labihasu tozome gagoda tame. 5Im labihasu tozome gagodam dam lam gi Alat amu alimeat meedaha im lam ozobohuna ahit fa biehenali gagodam damat modem bak. Nehaha bak. Alat aham di iube asumti asum laba modealahana zi lamti alimeat meedaha di lam Aho gi Am ahat neha, “Nalele,” lahame gagoha gi ab modealadaham bak. Laham bak lam ahit biehenali tozome gagodam damat modem bak. Labi ame di lam gi iteata modesdam labe Alat modi fa bak alihi aalo vao fatahivai bak alihi ab modesuidaham bak. Labi ame vao labe fa ab itealeham. Labihadaha bak lam ahit biehenali gagodam damat modem bak. 6Labi Alat Aho ba neo aaha, bak dam ahebu git meedàmu faki Am gi Am ahat gagoha vao feà labe modi fa neo bak ahebu fi oli baguamdi damti bake esumna zi lamti ahebu ab beodume foli seddaham bak. Labihadaha bak lam ahebu ozobohuna ahit biehenali uba tozome gagodam bak. 7Labi laha iho etei aadamna zi abo asum laba modealahana zi lamti bak niba modealahana zi nimti labihasu ahebu Ala naedat Am ahat gagu mali ot vaitesuiame betea modesdam bak. Aho ba diamut, “Bak damat iho Aho gagohona meedào? Meedam vaba voedào?” lahame Dam Bake Uloodume Vi Aime Ozobohudi Neàdi Fime Fahedam Digat fuhuzobe vuat beodume falavai seddam bak laba vou faodam labe Aho etei ahit gi labihasu ame na zi lam vou aasdam bak. Labi laha ame digat fuhuzobe dam Alat gagohona uledi fi hasi meedaha vab dam lam aho laha beodume geàdam bohu meeda tame. 8Eho deeli meedam dam oa, eho etei lab gagoho bak lam labihadalo modemta labiha. Lahana im eho etei gagolo modemda nim a fa vabili voomule. Dam totbaho labe iho vedi neha, “Im usi dualehe bak nim im Boehàda Yesus akati taho lem vaba mode?” lahame ozodam damat modem bak. Lahana im Boehàda Alat Ahamo ozomta ba kehàm vabak. Eho gi neham bak ozome uba labi gagoho bak. Im Boehàda Alat Aho digat dem bak amomoi bak. Labi im bakda digat dem bak laha amomoi bak. Im Boehàda Alat Aba Aho ozome digat vou ded lam di digat vàmtea azibe im bak modeo, gi vou ded lame seribu tahun vou fum bak modeo, gi uloho bak. Ba veimdem vabak. 9Labihàmu um a git ozodamule. Um dam totbaho labe vedi nehasu ozo, “Im Boehàda Yesus Kristus ba fa li iba dam badate, ‘Git meedào? Git meedam vabao?’ laham bak ozome ozobohudi neàdi gagu fahedam kaio. Aba Aho amu lab fet gagu vàmadi esuhu bak lam ba modem kaio,” lahame labi ozome gagom dam lam um git ozoho bak. Im Boehàda Yesusat Aba Aho amu lab fet gagu esuhu bak lam ba fa lem mu odohali kehàdam vabak. Aho taho fa li iba gagu fahedam vabak lam gi neham bak ozome labihaha bak. Alat ba dam meida vàmtea buà beodume geàdam bak uledem vabak. Am abo gi, “Dam ahebu iho faina meedam bak lam fa voedume fa ahu neà bak vàmadi vei neàdedase,” laham bak laba ozome ozahit laha vou faodam bak. 10Alat labihasu ozahit laha vou faodamta vou faoda. Lahana im Boehàda Yesus labe Aho fa lem digat lam abo Alat amu fet ozome esu vàmadehe digat lam fuhuzobe Yesus bak niba fa ab lemam bak. Aho fa lem bak gi neham bak. Damat vabi esdahit mei nazoh aa valo modemda labe aho aa li modeha damat udovam bakti ulohona modelo modem bak. Yesus laha damat vabi esdahit li damat udovai àvodelo modem bak. Ame di labe na dae feàna modi dam dogoi fi ateme geàda tame. Labi laha ame di labe Alat laha asumti asum ahoba laba modealahana zi lamti vuat beodume vàhàdeme sedda tame. Labi laha bak nimti bak niba modealahana zi lamti abo Alat alimeat ahamte modehena zi lam modeo, abo damat ihimo auet modeme nazohaedamna zi lam modeo, ahebu gi vuat beodume vàhàdeme sedda tame. 11Ne, Alat na ahebu labihasu vuat beodume vàhàdeme seddalo modemu uho ozom, iho Kristus bake tu vuzehi meedam dam nibe iho akatihasu meedàla? Làhà imo gi Alat Aba Aho gagoho im zi lamota uledi fi hasi meedase. 12Im Boehàda Yesus fa lem digat abo Alat amu fet gagu vàmadi esuhu digat lam, “Taho vou fuse,” lahame ahumdi vou faodam di nibe gi ame im lamota meedase. Ame digat taho vou fum bak am tame. Ame digat lam fum di asumti asum ahoba laba modealahana zi lamti Alat modi vuat beodume vàhàdeme sedda tame. Labi laha Alat bak niba na ahebu ahamte modi debulehe diat ame na Aho ve modi naledahana lamti ahebu ame vua gai labe modi na ahebu vaobedi falavai sedda tame. 13Alat ba labihadamnàme iho Kristus bake tu vuzehi meedam dam nim im ba àvodem vabak. Alat amu neha, “Eho modi fa asumti bakti gàhàde tame,” lahame amu fet gagu vàmadi esuhemu iho gi ame bak laba tu vi ozodume vou faodam bak. Ame bak gàhà bak laba gi dam im vamdesu meedam dam lamota ihimo vahi azim bak ozome modi esulo modem bak. 14Eho deeli meedam dam oa, im Boehàda Yesus fa lem digat uho neha, “Taho vou fuse,” lahame ahumdi vou faodam di nibe gi Alat Aba Aho gagohona lamota fi hasi meedale. Abo uho Kristusat avaesdam laba le duzum di Aho uba neha, “Um git modehe bak vabak. Uba vàlu gagom bak vabak,” lahame uba gagu modi ladem vaba gi neàna le duzum bak laba vi ozome meedale. Abo umti Alati vou ali vabademsum bak lam setem vaba meedam lahasuhuna le duzum bak laba vi ozome mahate keàtet Alat Aba Aho gagohona fi hasi meedale. 15Labi eho etei uba lab gagoho bak lam, “Im Boehàda Ala labe Aho bakda ahebu ibi iho faina meedàmu beodam bak lam, ‘Aho soat vausu fa vei neàdedase,’ laham bak laba ozome, ‘Damat ibi iho faina meedam bak lam fa voedume fa vei neàdedào? Gi labihasu Aho fa beodào?’ laham bak laba ozome ozahit laha vou faodam lahasuhu Alat modem bak,” laham bak lam um mahate vi ozodale. Eho etei lab gagoho bak lamti labi imti vahi Kristus bake tu vuzehi meedamda meida abo iho deeli meedamda Paulus lam aba aho amu Yesus fa lem bak toedaha im lamti uloho bak. Paulusat aba aho toedaha im lam gi Alat aba modi ozobohudi fi gatei toedaha bak. Ba ahamo toedaha vabak. 16Aba aho toedume oudaha sunit zi lam ahebu gi Alat aba modi ozobohudi fi gatehe labe eho etei lab vameadaha im lamti ulohona aho toedume oudaha bak. Labi ame da Paulusat aba aho toedume oudaha sunit totbaho lam damat dogoit aim di modeo, fakot aam di modeo, “Paulusat akatihasu modem im toehela?” lahame damat ozome ozobohudem biemda ehete. Labihàmu dam ahusobuda lam abo dam Kristus bake tu vuzehi meedam dam labe ibi iho tu vuzehi meedam im lam mahate vi ozome ozobohudehe vab dam lam abo dam Kristus bake gi etei tu vuzehehena mahate teudehe vab dam labe iho vedi ame im lam ve fa meia vameadam di vedi Paulusat ozome toehe bakti ulohona vameadaha vaba vedi veimdi fa im kibuna vameada. Gi Paulusat toedaha im lamota labihaha vabak. Abo gi Alat Vameadaha Im Toedahana totbaho lam laha gi ame baket meedam bak. Labihasu meedam labe dam ihimo it vàhàdeme Alat iba beom bak ab modi ahumdi esuham bak. 17Eho deeli meedam dam oa, eho etei lab vameadaha bak lam um ba biem vaba abo ozobohu bak. Labihàmu uho iademe it vou faovoi meedale. Neham bak. Ame im giomimna vahokedam guru zi labe ibi iho faina meedam bak lam uba fa neo vizemo. Ame guru zi labe ba dam eeda ziti Alati labihasu iho gagu fi hasi esuhu im lam ba meedaha vaba gi voedaha bak. Uba neo vou fohome modi vàhàdeme faidi ubu uho amu lab tu vuzehi teu aabodehe bak lam modi fa bedem bak labna zohàme mahate keàtet it vou faovoi meedale. 18Ubu uho amu lab tu vuzehi teu aabodehe bak lam modi fa bedem vabak laba fa gi nehadale. Uho Yesus bake tu vuzehi im Abada vi modi vi modidam bakta meedale. Uho lab meedam bak labet modi im Boehàda Yesus Kristus lam abo iba Soat Vausu Fa Vei Neàdemda labe Aba Aho iba ozahit faobekesi im neà bak modi esuida tame. Labi laha im Boehàda Yesus Kristus lam, “Akatihasu meedam dàt modela?” laham bak lam uho mahate vi ozoi vi ozoidume ozobohu aabodele. Imo etei nibe faasi Yesus Kristus bake mahate Am ee vousai, “Am abo feàte,” lahame gi labaha bohu vou baedase. Labihadase. Neàte. Sunit nim eho Petrusat toedume ab neàdeham. Àhàm.

will be added

X\