2 Petrus 1

1Iho Yesus Kristus bake tu vuzehi meedam bakti ulohona meedam dam oa, eho Simon Petrusat sunit nim toedume uba oluho. Yesus Kristus labe Am im gagu modidamda meida em am bak. Labi laha Yesusat Aho gagu olu Am im vameadume esmozi laiam dam meida em am bak. Em gi labihasu meedamda nibe eho sunit nim toedume uba oluho. Alat uba modi uho Kristus bake ab tu vuzehi meedamam bak. Ame bak lam umti imti gi uloho bak. Ame Da Yesus Kristus lam abo ibi iho vou baedam Ala am bak. Labi laha iho faina meedam bak lam Alat iba beom bake Aho fa Ot Vai Iba Soat Vausu Fa Vei Neàdemda Am am bak. Am abo im vamdesu meedam Dàt modem labe Alat modi fa umti imti fa Aba tu vuzehi meedam bak ulohona ab modeham bak. Kristusat uba labihasu meedam dam laba eho sunit nim toedume oluho. 2Eho uba vi ozome neha, “Uho im Ai Ala lamti im Boehàda Yesusti, ‘Akatihasu meedamna ahimit modela?’ laham bak ozobohudehe labe Alat uba ozahit duana deeli im neà bak modi esuidase. Labi uba modi um ahu faheme fi goaitom vaba gi vabademsu bohu vuusdase,” lahame eho ozodume Ala bake labihasu tom gagodam bak. 3Iho Alati vahi gi ahe neàna bohu vuusdam bak lamti labi Aba Aho ozome gagodaha im lam im ahu vàmadi abobo meedam bak lamti iho labihasu meedam neàna tadem bake Alat Aho gi amu iba modi ahumdi neàdi esuhu bak. Neham labe labihaha bak. Am abo na ahebu alimeat modehe Alat modem labe bisi feà labe Aho iba labihasu meedaha bak. Labi laha, “Ala akatihasu modem Alat modela?” laham bak lam im ozobohudehe labe Aho iba labihaha bak. Ame Ala lam Am bisi feà bak meedam bak lamti labi Am bisi neàbodehe bak lamti laham Ala labe iba neha, “Am damalese,” lahame iba gagu fi hasi vame Am damalehe bak. 4“Bak damat iho Kristus bake tu vuzehi meedam vab dam labe ibi iho ahu adat fai bak modelo àhàki ozodamna labe iba it vizi vàhàdedam bak lam fa iba neo vizi vàhàdem vaba fa vaitoho labe iho Alam itbaho fatoi im vamdesu meedase,” lahame Alat Aba Aho lab feà modesuhu bak lamti neàbodehe bak lamti labihasu modem Alat modem bak. Labihadam Alat modem labe iba neha, “Eho uba im bisi neà bak duana nehasu modi esuida tame,” lahame fet gagu vàmadi ab esuham bak. 5Alat uba labihasu vi tauhu labe ubu uho Kristus bake lab tu vuzehi meedam bak labet modi im nidi nimti im nidi nimti mahate keàtet neo vi taui vi tauidale. Uho Kristus bake lab tu vuzehi meedam bak labet modi um laha fa im neà bak fa neo vi meedam bak ame. Labi ubu uho im neà bak lab meedam bak labet modi um neo, “Im bisi neà bak neame?” laham bak laba vi ozobohu aabodi vi meedam bak ame. 6Labi ubu uho lab vi ozobohu aabodi meedam bak labet modi neo uho git meedam bak labna zohàme ahu it vou faovoi vi meedam bak ame. Labi ubu uho ahu lab it vou faovoi meedam bak labet modi um neo na im uba vabidam di uho ozahit keàtedi meedam bak bohu vi meedam bak ame. Labi ubu uho lab ozahit keàtedi meedam bohu meedam bak labet modi uho neo Alat Aba Aho uba gagu esuhu bak lamota fi hasi uledi vi meedam bak ame. 7Labi ubu uho lab fi hasi uledi meedam bak labet modi uho neo umti vahi Kristus bake tu vuzehi meedam dam totbaho laba laha aame faobekesi im neà bak vi meedam bak ame. Labi ubu uho dam totbaho laba lab aame faobekesi im neà bak vi meedam bak labet modi uho neo Alat iba deeli meedam bak lamti uloholi dam totbaho ahebu laha deeli vi meedam bak ame. 8Uho ame im zi labihasu it baleà vouhou vi modidume bohulali meedameam làhà uho im Boehàda Yesus Kristus lam, “Akatihasu meedam Dàt modela?” laham bak ozobohudehe bak lam ba gi meedume vanamai voomnat modem vabak. “Abo imbodi keàtedi meedà?” laham bak damat aame ozobohudem bak am bak. 9Lahana eho etei lab gagoho im zi lam uho meit it baleà vouhou vi modidume bohulalem vabameam làhà ame da lam gi fako aubesu na aam biem dàt modeo, na aam nasai tooledam dàt modeo, dam labiham damti uloholi meedam dàt modem bak. “Ame im zi lam imbo kaio,” lahame ozodam dàt modem bak. Ame da labe aba aho faina meedam bak lam Alat amu ozahigeàmu fa vei neàdehe bak lam gi fa vei vabilehe datelehe labe labihaha bak. 10Emti vahi Kristus bake tu vuzehi meedam dam oa, eho etei lab gagoho bak lam a meedamule. Fa gi im nehasu meedale. Alat uba neha, “Am damalese,” lahame uba gagu fi hasi vadaha bak lam, “Imbo? Em Alam damalehe?” lahame um naedamat it ozobohudem bake Aho uba gagoho im ahebu lam uho mahate keàtet vouhodale. Neham bak. Eho etei uba neha, “Ubu uho Kristus bake lab tu vuzehi meedam bak labet modi im nidi nimti im nidi nimti mahate keàtet neo vi taui vi tauidale,” lahame lab vameadaha im zi lam uho meedameam làhà um ba biti Ala mu voou bisi faina meedam vabak. 11Labi laha uho ame im zi lam meedameam làhà ba diamut Alati Am damti vahi azim bak neà bak laba abo im Boehàda Yesus Kristus iba Soat Vausu Fa Vei Neàdemda labe Aba Aho Am damalehe dam laba labaha bohu vuusu im vahokedam bak labe am doo fi stoi dam vou olem di Alat abo duana deeli ule neàt uba gagu vou oedam bak. 12Emti vahi Kristus bake tu vuzehi meedam dam oa, eho etei lab vameadaha im zi lam um amu gi ozobohudi neàdehe bak. Labi laha ame Da Kristus labe Aba Aho meedaha im imbona abo meit uba vahokedaha im lam uho amu gi tu vuzehi ab teudi laodoamsdamam bak. Uho labihadamnàme em gi ozahit ame im zi lam uba vi vameaidalo modem bak. 13Em etei bak niba teohe ehe lahasuhu di nibe ame im zi lam uho mahate vi ozoi vi ozoidume bohu vuusdam bake eho uba lab vi vameai vi vameaidam bak lam gi ahole meedam bak. 14Eho gi neham bak ozome uba labi gagoho bak. Em gi abo azim vaba valo bum bak ab vou fuham bak. Ame bak lam im Boehàda Yesus Kristus labe Aho eba amu modi ozobohudi fi gatehe bak. 15Labihàmu em eloi setehezobe uho ame im lam ba fa vabilem vaba abo gi vi ozobohudi labaha bohu vuusu meedam bake eho ahit etei em ahedi nibe uba keàtet vi vameadam bak. 16Iho amu uba gi nehi vahokehena taia? “Im Boehàda Yesus Kristus labe Aho ba fa bak niba lem di Am feà bak lam im aada tame.” Lahame iho lab vahokehe im lam ba dam bakdat ihimo vi ozoidume ostame faasi debulehe imot modem vabak. Abo im Boehàda Yesus Kristus labe Am ee bisi vousai Boehàdatebolehe bak lam abo fako ibidat aasuhet meedaha imot modem bak. 17Iho amu nehaha bak. Yesus amu ahedi labe iho Aba tau Ala bake tom gagom bak laba ozome sibu laba laitehe di labe im Ai Alat ulo fauha meo ad labe Am Adat Yesus labe Am ee vousai, “Am abo feàte,” lahame vou baedalo nehasu gagoho bak im aihi bak. “Da nim Em Adat vàmtea Ebe Eho bisi deelemda Am am tame. Em abo Aba Aho meedam bak lam Em aam deeleho,” lahame lab gagoho bak lam imti Yesusti amu ame fi ham sibu laba vou laitehe di labe asum ahoba iube bak niba nom gagoho im lam im vou faodahit gagoho labe im aime ozobohudi, “Imbote,” lahame vi gagodam bak. 19Labihàmu ame im lam iho aihi labe dam ahamda Alat vameadaha im aime fa dam bake ahate vameaidaha dam zi labe iho aham di iube Yesusat ba meedam im nasi fet ozobohudi toedume esuhu im zi lam iho amu fota tuhu bak lam fa etei nim abo tu vi dualehe bak. Um laha gi ame dam ahamda labe iho toedume esuhu im zi laba mahate aime tu vuzehi meedale. Neham bak. Ame dam ahamda labe ibi iho toedume esuhu im lamti labi aibu bak laba lam biem bak fa uma usime fauhali lam bakti ulohona modi ame dam ahamda labe iho toedume esuhu im lam uho tu vuzehi meedam labet uba modi uho damat ba uba li vahokem im lam, “Imbo? Giomim modeo?” laham bak um ozobohudemna am bak. Ame dam ahamda labe iho toedume esuhu im zi lam uho gi labaha bohu tu vuzehi meedume im Boehàda Yesus Kristus labe Aho ba fa li, “Am akatihasu meedam Dàt modela?” laham bak lam um ozobohu aabodese. Yesus fa lem bak lam abo gi diham bak fum di aam falo labe fauhaedam bakti uloho bak. 20Bisi uho vi ozome ozobohudem im nim a fa vabili setemule. Dam ahamda Alat vameadaha im aime fa dam bake ahate vameaidaha dam zi labe iho toedaha im zi lam im dam bada nibe meit ahamo aame ozo, “Akatihasu modem imot modela?” lahame vi ozoi vi ozoidume ozobohudi fi gatei neàdi ba aba aho ozoho bak labet modi meia ahate vameadaha vabak. 21Eho gi neham bak ozome uba labi gagoho bak. Ame dam ahamda zi lam abo Alat fi hasi vadaha dam labe iho ba dam bakdat iba neha, “Toedale,” lahame ibi iho im ahulat ozomna labet modi im ozobohudi ame im lam toedaha vabak. Ba ame bak labet modi im ozobohudi ame im lam iho dam bake ahate vameadaha vabak. Abo gi Alam Aha Nutabe Neàna labe ame dam laba modi vizi ozobohudehe labe Alat iba gagoho im lam iho dam bake ahate vou vameatedaha bak.

will be added

X\