2 Korintus 10

1Kristus labe Aba Aho meia im vameadam di gi dae meo vaba nemahuba neàt neà vameadam bak. Eho Paulusat gi ame bak laba vi ozodume uloholi fa nehi uba vi ooteme vameadam bak. Eho aihat um dam totbaho labe eba nehi tozodam bak em aihi bak. Uho vedi nehi ozo, “Ame da Paulus lam ba Kristusat Aho Am im vameame esmozi laiamda modem kaio,” lahame ozoho labe vedi eba nehi gagoda. “Paulusat iba num debu Korintus niba tau aidam di lam ba iba dae meona vi vameadaha vabak. Lahana fa bak bohu bak iube sunit toedume oudam di lam gi dae meona iba vi ooteme vameadam labe sunit toedume oudam bak,” lahame eba labi vàlu tozodaha bak lam em aihi bak. 2Dam etei eba lab tozodaha dam labe im im lam uho a aime vuzehi meedamule. Uho ame dam labe im im aime vuzehi tau meedameam làhà em ba uba lafusi im vameadam di eho gi dae meona sunit laba toehena lamti ulohona fa uba im vi vahokedam bak. Labihàmu uho nasi ame dam lam mu vaitesu uhumo meedale. Eho ozoha, em ba uba lafum di lam um Korintus dam zoho labe iba neha, “Paulus giida na im meedam di gi dam bakda Kristus bake tu vuzehi meedaha vab damat ibi iho vi ozome meedume baleàhà bak lamti ulohona meedam damat modem bak. Ba Alat Aba Aho ozoho baket ba meedam vabak,” lahame iba labi tozome feàtàdaha dam lam eho ozoha, ame dae meona lam eho bisi vahokedam dam am bak. 3Lahana em ba labihadam vabak. Eho gi bak niba esdamta esda. Lahana eho lab vameadaha im lam moudaha dam lam eho ot odosidam di lam em ba bak damat ibi iho vuusdam na meona lam vuusu ame baket meedam vabak. 4Ba bak damat abo Kristus bake tu vuzehedaha vab dam labe ibi iho meia bohudem di meedam bak lamti ulohona eho ba vi ozome Alam im mu tozoho dam laba ot odosidam vabak. Gi Alat Am feà bak labet eba modi vizi teudedam labe ame dam labe im ebeda moudaha dam laba eho ot odosidam bak. Em gi dam meoda labe ibi iho nehasu meedam bakti uloho bak. Ame dam meoda labe fa dam totbaho iba fakemoholehe dam laba ibi iho azihi num debu abo ame damat neha, “Ba meit iba lefusi nohisi ahiledou beodam vab num debut modem bak,” lahame labi vi ozome tuhu dam laba lafusi im num debuti beodume agube seddam bak. Ame bak lam gi neham bak. Alat eba modi vizi teudehe labe meit giomim vameadam im lam eho daetesu vàmadehe labe ame im imbona laba feàtàdaha dam labe im ibida lam ba imbodehe vaba gi ab modi setidamam bak. 5Labi damat neha, “Da iudu ium a Ala bake tu vuzehi im Abada ozobohudi meedamule. Fa im ibida tule,” lahame la ausi le ausidam bak lamti labi damat neha, “Im feàte. Ala ba feà kaio,” lahame im mei im meime daetbadam bak lamti labihasu ahebu, “Belu fi goaitoi seddase,” lahame eho daetesu vàmadi im vi vahokeidam labe modi setidam bak. Labi laha bak damat ibi iho ozodam bak ahebu lam, “Seti fa veimdi fa Kristus bake uledi im Abada fa aime meedase,” lahame eho ahit dae meobeat im vi vahokeidam labe damat fa Kristus bake tu im Abada aime uledi meedam bak. 6Labi laha uho fa Kristus bake tu vuzehi im Abada uledi meedam bak lam tombalehemu eho aame neàdi fa uba lam di lam ame Kristus labe Aba Aho gagoho im lam mu voedaha dam lam ahebu eho vi ootedume itaholeda tame. 7Ubu uho git modem bak gi neham bak. Uho vedi iba ozom dita im alihi aame ozobohudeda. Lahana im ahu ad ium um ozobohudehe vab damat modem bak. Uho mahate iba vi ozome im imbo bak vi ozome ozobohudi fi gatele. Neham bak. Um dam totbaho labe vedi nehi it ozo, “Imota Kristus labe Aho Am im vameame esmozi laiam dam ihimo meedam bak. Lahana Paulus giida ba labihadam vabak,” lahame labi it daetbadume fa iba feàtàdam bak lam gi im giomimot modem bak. Im laha Kristus labe Aho Am im vameame esmozi laiam dam totbaho im am bak. 8Im Boehàda Yesus labe Aho eba lab modi vizi eho im dedateli uba vameadam bak lam eho vi ozome labaha bohu it daetbadameam làhà em ba ladem vabak. Eho gi neham bak vi ozodam labe ba ladem vabak. Um Korintus dam labe uho Kristus bake lab tu vuzehi meedam bak lam, “Eho ame bak laba vi ozome uba vi vabidume fa faamodase,” lahame im Boehàda Yesus labe eba gagoho vabak. Aho gi neha, “Eho fa uba vi vabiedume uho gi fa labaha bohu vuusu keàtedi meedase,” lahame eba labihasu gagu eho im dedateli meedàmu eho ame bak laba vi ozome it daetbadam bak lam em ba ladem vabak. 9Eho ba, “Uho fà eba iedese,” lahame labi ozome sunit toedume uba oudaha vabak. 10Eho gi neham bak ozome uba labi gagoda. Eho aiha um Korintus dam zoho labe eba nehi voe voedam bak nim meit aime eba vou li vi vameadahana eho aihi bak. Uho vedi neha, “Paulusat sunit toedume iba oudam di lam abo dae meona vi ootedume toedume oudam bak. Lahana ame da so niba duzum di lam ba iba dae meona vameadume vi vahokedam vaba vedi gi im ibida vuzehi meedam dàt modem bak. Ba aha teudi im vameadam biem dàt modem bak,” lahame voehe bak em aihi bak. 11Làhà uho eba labihasu ozomsu gagodam dam lam gi labihasu fao! Em uba ba lafum di gi eho sunit laba toedaha dae meona lamti ulohona lam ame dam laba im vahokeda tame. 12Eba fakemoho dam labe vedi neha, “Im abo neàte. Paulus ba imti uloho kaio,” lahame ibi ihimo neàdem bak laba it ozome daetbada. Lahana em ba ame dam lamti uloholi neha, “Dam lada lamti imti uloho? Uloho vabao?” laham bak lam em ba ozome gagodam vabak. Em moho bak. Ame dam labe vedi neha, “Alat Aba Aho gagoho im uledi meedam dam gi nehasu meedam damat modem bak,” lahame ibi ihimo ozome fi hasi esuhu im lam, “Ame bak lam iho ulohodesu meedào? Ulohodesu meedam vabao?” lahame ihimo ozome daetbadam bak. Lahadam dam lam eho ozoha, gi ahusobuli meedam damat modem bak. 13Lahana em ba labiham vabak. Alat eba neha, “Oho gi bak Eho oba guti loho bak lamota oho ame Im Neàna lam vuusu dam bake vou vameatedale,” lahame eba labi gagohemu eho im dedatelemta im dedatelehe bak. Lahana bak Alat eba guti loho zoho laba ba vafozi bak mei bake meit meedamda lam eho ba vi ozome, “Feàte,” lahame it daetbadam vabak. Gi Alat eba gagu eho im dedateli meedam bak lamota eho vi ozome it daetbadam bak. Alat eba lab gagu eho im dedatelehe di lam Aho eba laha nehi gago, “Oho laha ame Im Neàna lam fa Korintus dam lamti laha vou vameatedale,” lahame eba labi laha gagohemu eho im dedateli ame Im Neàna lam uba vou vameatedam bak. 14Um Korintus dam totbaho abo eba fakemoholehe dam labe vedi eba nehi gagoda, “Paulusat aho Korintus niba im vuusu meedam bak lam git meedalo. Alat bak nim Paulus bake lom kaio,” lahame labi gagodam dam lam git gagodam bak. Eho ba git it daetbadam vabak. Eho Kristus labe Aba Aho meedaha Im Neàna lam amu vou vameatedaha di lam uba nasi alimeat vou li fi deheda em am bak. Dam lada lam uba ba li vahokedam damat modem bak. Labiha labe ame dam labe eba lab gagoho bak lam ba debu vabak. Gi ostame gagodam bak. Lahana imota iho lab it daetbadam bak lam gi ahole meedam bak. 15Em ba dam totbaho labe giomim it daetbadam dam lamti uloho vabak. Ame dam labe vedi meit vahokeme neàdehena laba neha, “Iho modeho,” lahame giomim it daetbadam bak. Em ba dam lada lamti uloho vabak. Ba Alat meia gagu gutehe bak laba meit meedaha im lam eho ba vi ozome it daetbadam vabak. Gi Alat eba gagu eho im dedateli meedam bak lamota eho vi ozome it daetbadam bak. Lahana ebe eho nasi tu vi ozodam bak gi neham bak. “Ubu uho Kristus bake lab tu vuzehi im Abada meedam bak lam fà gi labaha bohu vuusu dihasi vi modi keàtedi meeda. Neo dihasi vi modi keàtedi meeda. Gi labihadam bohu vuusdam bak labet modi bak ubuda laba im eho meedamna lam fà dualedase,” lahame eho nasi tu vi ozodam bak am bak. 16“Abo bak ubuda laba im eho meedamna lam fa dualedahemu eho fa bak ubuda vafozi bak mei bake neo le ame Im Neàna lam vou vameatedam neàdehe?” lahame labi fet ozodam bak. Neham bak. Eho gi bak mei bake abo dam alimdate le ame Im Neàna lam neo vou vameatedalo àhàki vi ozodam bak. Em ba meit bak mei bake le ame Im Neàna lam vameada. Meit bak mei bake le ame Im Neàna lam neo vameada. Lahadume vou fi desi aime ozobohudehe dam laba em ba ame bak laba le ame Im Neàna lam vi vou vameatedam moho bak. Eho ame bak laba le vi vou vameatedameam làhà eho meit modehena vi ozome neha, “Eho modeho,” lahame labi it daetbadam bak labna zohàme em ba meit modeheda laba lam moho bak. 17Imo gi meit Alat Vameadaha Im Toedahana laba nehi toehe bakti ulohona vi meedase. “Meit na im vi ozome vou baedalo modemeam làhà gi im Boehàda Alat Aba Aho meedaha bak laba vi ozome Aba fà vou daetbadase.” Lahame labihasu toehe bak lamti ulohona vi meedase. 18Neham bak. Meit gi aba aho na im meedaha bak laba vi ozome it daetbadamda lam ba Boehàdat deeli neha, “Om neàna modeho,” lahame ba ame da laba vou baedume deeli gagodam vabak. Gi Boehàdat Ahamo neha, “Da lam im neàna meedamda am tame,” lahame Aba Aho vi ozome vou baedamda lam Aho deeli vamda am bak.

will be added

X\