1 Tesalonika 5

1Imti vahi Kristus bake tu vuzehi meedam dam oa, iho etei lab vameadaha im lam, “Ame Yesus ba lem digat labe ba labihada tame,” lahame vameadaha im lam, “Ba adi diat modela?” laham bak lam iho ba uba toeme olum vabak. Gi labihasule. 2Neham bak. Im Boehàda Yesus labe fa lem digat lam damat im ahu nasi ahumdi neàdi vou faodam vabna gi àvodehat aa le tame. Abo naat mei na aibut aa li vam bakti ulohote. Laham bak lam um ozobohudehe labe ba akati ame digat lam iho toeme uba oluela? 3Neham bak. Ba diamut damat vedi nehi it ozome gagodam bak ehete. “Im ahu faheme fi goaitom vaba gi neà vabademsu esdam bak,” lahame labi ozodamnàme Alat Aho ame dam laba na im feàna modi olu beom bak vabili meedam damat modem bak. Abo lahi zubuda am data faalo meedam diat, “Kikezi àvodehat vàzbudam bak fuhe?” laham bak vabi meedam bakti ulohote. Ame lab àvodehat vàzbudam bak lam ba vabalem vabak lamti uloholi dam labe ilim bili meedahit beodam bak. 4Lahana imti vahi Kristus bake tu vuzehi meedam dam oa, umota neà bak. Um dam aibu bak laba azim dam lamti uloho vabak. Labiha labe ame Yesus ba lem digat lam fum di um ba dat iddahit meit am na aa li vahemu udovai àvodemda lamti uloholem vabak. 5Im aibu bake aidam vab damat modem labe ba im fai bak meedam vabak. Abo damat usehe diat na aam biem diat aa meedam bakti ulohona meedam vab damat modem bak. Im gi nehame meedam damat modem bak. Alat iba modi Am damalehe labe im gi abo fauha neà bake aidam damat modem labe im vamdesu meedam bak. Abo damat digad diat na aame iademe meedam bakti ulohona meedam damat modem bak. 6Labihadàmu imo nehadase. Imo nasi dam giida ihi tamzohobulem dam labe ahusobuli im vabi git meedam tadem bak lamti ulohona ba a meedamule. Im aibu bak laba aidam vab damat modem bak. Labiha labe imo nasi dam ihi bibali keesi aasdamda labe meedam tadem bakti ulohona meedam labe na im ahebu meedam di ihimo naedamat im ahu it vou faovoi iademe meedam tadese. 7Neham bak. Damat neha, “Im bitesu izi setelo mozo,” lahame meedam dam lam gi aibut meedam damat modem bak. Labi laha, “Imo vao meona uddume bak vabi bobidase,” lahame meedam dam lam laha gi aibut meedam damat modem bak. 8Lahana im ba aibu bake azim vaba gi fauha neà bake azi im vamdesu meedam damat modem bak. Labiha labe iho na im ahebu meedam di ihimo naedamat im ahu it vou faovoi iademe meedase. Imo tentara labe bohudelo modemu meit am ahude foat dou elom bake vou faovoi bes teuna ahude laba taasu vààsu vastehena dusum bakti ulohona iba vatohemna modesuse. Neha: Iho Kristus bake tu vuzehi keàtedi meeda. Labi laha dam totbaho bake deeli meeda. Imo labihadase. Labi laha tentara labe aho bohudelo modem diat meit am ohula beom bak labna zohàme ohula dusumna besit modehenati ulohonabu dusum bakti ulohona laha meedase. Neha: “Ba diamut Alat iba soat vausu fa vei neàdeda tame,” laham bak lam imo im ahu fet vi ozodume tu esu vou faodase. 9Iho neham bak ozoho labe uba labi gagoho bak. Alat amu iba gagu Am damalehe di Aho ba neha, “Eho dam bakda lam beodume fà vàhàdedase,” lahame labi ozome iba gagu Am damalehe vabak. Aho ozome esuhu bak gi nehaha bak. Im Boehàda Yesus Kristus abo Am Adat labe Am vasea veàtoi neàdehemu dam bakda labe iho faina meedàmu Aho beom bak lam, “Yesusat fa soat vausu fà vei neàdedase,” lahame labi ozome esuhu bak. 10Neham bak ozome labihaha bak. Im Boehàda Yesus ba fa bak niba lem di labe im gi elodume seddào? Im ahe lahasdào? Laham di labe Aho li im vamateme vou le Amti vahi azibehamdi bohu vuusdam bak laba ozome iho dam bakda faina meedam bak lam gohalelo Aho naedat ahit vasea Abada, “Veàtose,” lahame uledi damat Am oteme vasea ab veàtoham bak. 11Labihadàmu uho amu meia ot vabedeidume teudedam bak lam laha mahate vi meedale. 12Imti vahi Kristus bake tu vuzehi meedam dam oa, uho neham bak mahate meedale. Kristus bake tu vuzehi meedam dam laba vuusu im vameame faheme modidam dam busao damali uba vuusu im vahokedume meedam dam laba uho abo ahu adat iedi deeli, “Um abo imbo meedam damat modem bak,” lahame labi vou baedale. Ame dam labe gi modem kaio. Abo Alat dam laba gagu dam labe keàtedi uba vuusu im vahokedam bak. 13Labi ame im lam keàtedi meedume vanamai meedàmu uho ame dam laba deeli meedam labe ozo, “Dam lam iba vuusdam dam ee ehe dam ame?” lahame mahate ahu adat iedi deeli vou baedale. Labi laha uho um dam totbaho laba a ot fakiame beàdamule. Gi iademe betea bakamta vahi vabademsu esdale. 14Labi laha im meida nim iho uba neo vi ootedam bak. Dam na modem odohabu dam laba neha, “Um bisi meia a ahumdi meedamule. Uhumo na meedume doi vame ubu uho valo modemna doit lu vale,” lahame amu gagoda. Ba neo vi gagoda. Lahadale. Labi laha dam na iedemoho dam laba uho vabededume modi ahu teudedale. Labi laha dam totbaho labe ibi iho Kristus bake tu vuzehi meedam bak lam fota bedi meedam dam laba uho im vi vahokedume teudedale. Uho labihadam di labe bisi a vi ootedamule. Gi betea laha vou faodale. 15Labi laha meit uba fai bak modemeam làhà bisi fai bak a ot modi ot modidume fa vi vatauiamule. Ame bak lam mahate it vou faovoi mali meedale. Fa gi neham bak bisi neà bak am. Uho Kristus bake tu vuzehi vahi meedam dam uhumo ot deeliame neà bak ot modidale. Labi laha dam giida totbaho laba laha deeli neà bakta meedale. 16Labi laha gi deelehe bohu tadi vuusdale. 17Labi laha Ala bake tom gagodam bohu tadi vuusdale. 18Labi laha na im ahebu uba duzum di gi Ala bake, “Am abo neàte,” lahame dihasi tom vou baeda. Dihasi neo tom vou baeda. Labihadam bohu meedale. Nehaha bak. Alat amu di iube neha, “Iho vahi Kristus Yesusti vou ali ahu vàmadi meedam dam nibe na im iba duzum di gi ozahit Aba vou baedase,” lahame fet ozome esuhu bak. Labiha labe uho gi ozahit Ala bake, “Am abo neàte,” lahame vou baedam tadele. 19Alam Aha Nutabe Neàna labe Aho uba laba modi vizi vuusu im ahu ad laba vabiedam bak lam meit a vi mali vua elum modi sutem bakti ulohona a modemule. 20Labi laha Alam Aha Nutabe Neàna labe Am Im meia modi vizi ame da labe fa aho aihi im ahum meia ahate vameadam di meit a àvodehat mu tozomule. 21Fa gi nehadale. Amu nasi ame im lam aime vi ozo, “Im lam Alat da laba gagu eba oluhe? Alat gagu oluhu vaba?” lahame mahate vi ozo, “Alam Im imbonati ulohona mode. Làhà imbo bak,” lahame labi ozobohudi neàdi ame im lam tu vuzehi meedale. A gi ostame àvodehat lab aihi im laba tu vuzehi meedamule. 22Laham vabameam oho gi nehi vi ozo, “Ame Im lam Alat da laba gagu eba oluhu vabak. Fai imot modem bak,” lahame labi vi ozomeam làhà nasi a tu vuzehi meedamule. Abo im fai bak meedam bak lamti ahebu ailahigeàmu voedale. 23Meia modi am ahu faheme fi goaitom vaba gi vabademsu bohu meedam Ala laba iho nehame tom gagodam bak. “Im Boehàda Ala oa, Ohomo Tesalonika dam laba modi fa fi hasi gi im neà bakta ahu vàmadi bohu vuusdam damalele. Labi laha Oho ame dam laba vou aasu vabiedume dam labe im ahu vàmadi im vamdesu meedam labe im Boehàda Yesus Kristus ba li neha, ‘Dam lam git modeho,’ lahame vàlu gagom vabak laba Oho laha modi esule,” lahame iho im labihasu ozodume Ala bake tom gagodam bak. 24Uba modi fi hasi, “Am damalese,” lahame uba amu labi fet gagodam Ala labe im Aba Aho gagohoda ahebu ba meida vàmtea vagem vaba abo imbodem tadem bak. Labiham Alat modehe labe iho etei lab tom gagoho im lam laha Aho modi imbodem bak. 25Imti vahi Kristus bake tu vuzehi meedam dam oa, uho laha iba Ala bake tom gagodale. 26Labi iho uba, “Neàte,” lahame gagodam bak lam uho fa ve imti vahi Kristus bake tu vuzehi meedam dam totbaho laba gagodale. 27Labi laha im Boehàda Yesusat amu eba neha, “Im nehasu toedale,” lahame eba gagu eho toedaha labe uho sunit nim ve aame gagodam di labe Kristus bake tu vuzehi vahi meedam dam totbaho labe iho dogoit aidahit uho sunit nim aame vameadale. 28Eho gi neha, “Im Boehàda Yesus Kristus labe Aho uba ozahit deeli im neà bak modi esuidase,” lahame labi ozodume Ala bake tom gagodam bak. Neàte. Iho Paulusti Silasti Timotiusti im làtela nibe sunit nim toedume ab neàdeham. Àhàm.

will be added

X\