1 Korintus 16

1Lo. Neàde. Uho amu eba neha, “Iho Alam damali im vamdesu meedam dam kota Yerusalem laba azihi dam laba lolo modem doi iho akatihasu ateme vahela?” lahame toeme eba oluhu im lam eho etei fa uba nehi vameadalo mozo. Uho etei meit vi tau meit vi tau laham doi lam vaheme umti Kristus bake tu vuzehi vahi meedam dam kota Yerusalem laba azihi dam labe di neà faasi na vabali idoalehe bake lolo modem doi lam gi eho amu dam Kristus bake tu vuzehi vahi meedam dam Galatia bak laba azihi dam abo dam zi mei dam zi meime laham dam laba nehi vameadaha im lamti ulohona meedale. 2Uho hari Minggu Ala bake vou baedam digat ahebu labe nasi meit aho doilehe bake ozome doi aho Ala bake esum zoho fi hasi ahumdi esu. Labi meit ba neo gi ame bak labe neo mode. Labihadale. Uho labihadume neàdi eho ba le aameam um amu gi modi ahumdi neàdehena em ba le aam bak. Ba em lehezobe ame im lam modem vabak am tame. 3Labi uho doi lam vaheme ahumdi neàdi neo dam ame doi lam vou lamda lam laha nabime dam uho ahu ubuda tuhuda laba ozome fi me ve esu vou faodale. Labi eho ba lafusi neàdehezobe uho fi me vahada laba eho sunit, “Um ana im vou lehela,” laham bake fet aame ozobohudem sunit lam ame dam laba lu dam labe ame doi lamti ve, “Kota Yerusalem laba vou lale,” lahame labi gagu olu tame. 4Labi uho laha eba nehi vi ozo, “Emti vahi ame doi lam vou lam neà bak,” lahame eba labi gagomeam làhà ame dam labe fa eba gut tau lam neàte. 5Em amu nasi Makedonia bak laba le im vou vameatedam bak ehete. Labihàmu amu nasi laba le ame dam laba im vou vameatedume neàdi ba uba num debu Korintus laba la tame. 6Em uba laba le tau azibehamdem bak laha ozodam bak. Lahana em ozome neàdem kaio. Em uba laba le tau azibe di nutabededam di abo itea feàna labe nutabe fait li vao fi tauledume bubaholedam di fotehezobe fa ebe eho neo ozome lam bak laba lam zoaha. Em bieha. Lahana em uba laba le tau azibe lalo modem di labe ba bak ubuda lam vou esmozi bak mei bake lalo modem di lam uho eba tau faobekesi na lu olumna ame di labe eba lu olumna zohàme uba nasi gagoho bak. 7Em etei nibe uba laba lameam làhà gi taho labe izi usi vàmadi modeo, usi behàsdi modeo, gi taho labohoti lam bak. Labiham bake em mu em uba laba taho lam kaio. Em gi fa nehalo. Eho uba laba lam bak im Boehàda Yesus uledemeam làhà em ba uba le tau azibehamdem zoaha bak. 8Lahana etei taho nasi lam vabak. Em gi num debu Efesus niba azibe Yahudi dam labe ibi iho na feàna àdam digat Pentakosta lam foli neàdi ba laba la tame. 9Neham bak. Num debu Efesus niba azihi dam dua zoho ame Im Neàna lam aim vaba alim lahasuho. Lahana ame num debu niba azihi dam zoho emti ot odosiaha dam ehete. Lahamnàme eho ame im lam vahokedam bak ba modem biem vabak. Ala naedat modi tombalehe bak. Labiham labe eho vahokedume neàdi esmozi ba uba la tame. 10Labi em im meida neo gagolo. Timotius uba lafum di uho gi ame da laba, “Neàte,” lahame ule neàt gut gagu ve vou azile. Aho uba tau azim di gi iedem vabna aidam bak am tame. Neham bak. Ame da lam gi im Boehàda Yesusat eba gagoho im lam eho meedam bakti ulohona aho laha meedamda am bak. Uho ame da lam gi deelehat gut vale. 11Ba meit aba a aame gi ozahigeàmu mu voomule. Fa gi nehale. Ame da lam gi ahena eba fa olum bake uho abo deelehat gut ve vou aidume neàdi fa olulo modem di labe uho aba tau faobekesi lu olumna ame di labe vi lodume, “Om abo neàte,” lahame deelehat vi vameadume eba fa olule. Em gi Timotiusat fa imti vahi Kristus bake tu vuzehi meedam dam totbaho laba vi tau lem bake vou faodalo modem bak. 12Im lada lam neàde. Em fa imti Kristus bake tu vuzehi vahi meedamda meida Apolos labe aho meedam im lam uba vamealo. Ame da laba eho amu neha, “Apolos oho imti vahi Kristus bake tu vuzehi meedam dam totbaho labe iho num debu Korintus laba lam bake oho tau vahi lale,” lahame eho amu gago. Labi ba neo vi gago. Lahamnàme am etei lam odohali moho bak. Lahana ba aho lam bak aba modi fumeam làhà ba uba lam bak ehe bak. 13Ba oa, um fa faidemna zohàme iademe meedale. Uho Kristus bake lab tu vuzehehe bak lam abo mahate keàtedi teudi laodoamsule. Ba a na iedi ahu bedi meedamule. Abo gi ahu teudi ozodam labe meedale. 14Labi laha na im ahebu meedam di um ahu gi dam bake deeli meedam tadele. 15Emti Kristus bake tu vuzehi vahi meedam dam oa, um ozobohute. Eho amu bak Akaya laba le ame Im Neàna vou vameatedaha di labe Stefanus amti num vàmtea azihi dam labe ihimo nasi ahamte alimeat Yesus bake tuhu dam am bak. Labi ame dam lam gi ahu im amomoi ozom vabna gi Alam damali im vamdesu meedam dam laba tau vabiedam bak laba ahu vàmadi vabiedam bohu vuusu meedam dam am bak. Labihàmu eho uba nehi gagodam bak. 16Dam Kristus bake tu vuzehi vahi meedam dam laba vuusu im vameame faheme modiam dam totbaho abo Stefanusam dam lamti ibi iho meedam bak lamti ulohona meedam dam lam uho ahu adat iedi dam labe iho gagom im lam ulededale. Labi laha dam giida totbaho labe ame dam laba ba tau im Boehàda Yesus labe Aho gagoho im meedam dam laba laha ahu adat iedi dam labe iho gagom im lam laha ulededale. 17Em abo uba ilahuho. Lahana Stefanusti Fortunatusti Akaikusti eba lefuhemu em abo deeleho. Um eba niba lem biehemu ame dam làtela lam ot vai lehemu em abo deeleho. 18Neham bak. Ame dam làtela labe amu uho um ahu bedem bak labna zohàme uba vabededume um ahu teudehe labe ame dam labe eba neo ame baket neo meedume em ahu teudedam bak. Labihàmu eho etei lab gagoho bak lam, “Uho ame dam lamti uloho dam laba ahu adat iedi, ‘Abo feàte,’ lahame vou baedale,” lahame uba ab gagoham bak. 19Lo. Neàde. Dam Kristus bake tu vuzehi vahi meedam dam abo dam zi mei dam zi meime laham dam Asia bak niba esuhu dam nibe iho uba Korintus dam bake, “Neàte,” lahame gagodam bak. Labi laha Akwilati Priskilati labi dam Kristus bake tu vuzehi vahi meedam dam labe iho Akwilam num laba vazisi Ala bake vou baedam dam lamti iho Boehàda Yesus vou ali ahu vàmadehemu iho laha vahi uba, “Neàte,” lahame tau gagodam bak. 20Labi laha imti Kristus bake tu vuzehi vahi meedam dam num debu Efesus niba azihi dam totbaho laha uba, “Neàte,” lahame tau gagodam bak. Labi laha uho vazisi Ala bake vou baedalo modem di lam um gi ahulat abo deeli, “Om abo neàte,” lahame ot gagoidale. 21Sunit baa toehe zoho nim anekehà ebeda ehemo toeho. Eho Paulusat uba neha, “Neàte,” lahaho. 22Dam im Boehàda Yesus bake deelehe vab dam laba Alat na asimbuna modi esum dam am bak. Lahana imota gi nehada, “Boehàda Yesus nasi fa lele,” lahame gagodam bak. 23Eho gi nehame Ala bake tom gagodam bak. “Im Boehàda Yesus uba ozahit deeli im neà bak meedase,” lahame tom gagodam bak. 24Emti umti vahi Kristus bake tu vuzehi meedam dam oa, uho vahi Kristus Yesus bake vou ali ahu vàmadehemu em abo um ahebu deeleho. Neàte. Eho Paulusat sunit nim toedume ab neàdeham. Àhàm.

will be added

X\