1 Korintus 13

1Neha: Iho dam bake deeli meedam labe bisi neà bak am bak. Uho neham bak ozomale. Alam Aha Nutabe Neàna labe iba modi vizi teudi iho dam mei dae dam mei dae ahebu biemna lam modeo, abo Alat Am im gagu vou usem dam labe im dae modeo, iba vizi iho vameadamta vameada. Lahana iho dam bake deeli meedam vabameam làhà ibi iho lab vameadam im lam ba damat aim vaba gi teo vameadam bak. Abo lonceng foho di labe dae lafutom biem bak lamti bo foho di labe dae lafutom biem bak lamti ulohote. Ame bak lam gi teole. 2Labi laha Alat aha Abadat vameadaha im lam Alam Aha Nutabe Neàna labe iba modi ozobohudi fi gatei iho fa dam bake ahate vameaidam bak ame. Labi laha Aho iba modi vizi teudi Aho dam bake vasti damat ozobohudi fi gatei neàdehe vab im zi lam ahebu Aho iba modi iho fa ozobohudi fi gatei vameadam bak ame. Labi laha Aho iba modi vizi teudi bak damat meedam im ahebu iho ozobohudi neàdi meedam bak ame. Labi laha iho Ala bake neha, “Na damat ihimo modem biem im feàna lam Oho iba modi vizi teudele,” lahame tom gagu Aho iba modi vizi teudi iho ame bak lam meedam bak ame. Labihadam bak ahebu Alat iba modi vizi teudi iho ame bak meedamta meeda. Lahana iho dam bake deeli meedam vabameam làhà ibi iho lab meedaha im zi lam Alat ozom di im gi voomnat modem bak. 3Labi laha iho nehameam, “Im na zi nim ahebu iho dam na vab dama vi loi vi loidalo mozo,” lahame labi gagu meeda. Labi laha neo damat iba neha, “Uho Alat vameadaha im laba, ‘Tufea,’ lahame feàtàle,” lahame iba gagomeam làhà iho ba feàtàm mu iho neha, “Im uho otem neàte. Uho im ve vua vahusum neàte,” lahame labi uledi gagoda. Labihadam bak lam iho meedamta meeda. Lahana iho im ahu dam bake deeli meedam vabameam làhà Alat ba iba neha, “Gi na im feà vabna mode?” lahame labi gagu ame na gohalemna ba iba lodam vabak. 4Meit fa dam bake deeli meedam dam labe iho gi nehasu meedam bak. Meit iba git modemeam làhà iho gi ozahigeàmu fa vei neàdeda. Labi laha iho meia aame faobekesi iademe vabieda. Labi laha meit modehe im iho ba vi aame ahu adat faki teidem vabak. Labi laha ba im ee vousai it daetbadam vabak. Labi laha ibi iho meedaha im it ozome, “Im abo neàna modeho,” lahame ba naedamat it ozome deelem vabak. 5Labi laha iho ba meia dae meona git gagu meia modi ladem vabak. Labi laha ba ibi iho neàdem bakta ozome na im meedam vabak. Labi laha meit im gi koena gagohona kehàm vaba gukem bak lam ba modem vabak. Labi laha meit iba fai bak meedam di iho ba vi ozodam bohu meedam vabak. Gi ozahigeàmu fa voou setem bak. Iho meia deeli meedameam làhà ba meia fai bak meedam bak laba uledi vi meedam vabak. Iho fa meia gi im neà bak meedam bak lamota vi ozome meedam bak. 6Labi laha iho dam bake deeli meedameam làhà dat meida labe aho bisi fai bak meedam bak lam meit iba li ame im lam vameadam di im ba deelem vabak. Gi fa dam im vamdesu meedam dam laba iho deeli meedam bak. 7Labi laha iho dam bake deeli meedameam làhà im ba meit meedam bak laba aame ozo, “Da lam git meedà?” laham bak lam ozobohunàme ba ame da lam mu voom vabak. Gi ozahigeàmu labihasu vou faodam bak. Labi laha imti vou alem dam laba, “Uho faina mode moio?” lahame ba nasi fet ozomsu esum vabak. Labi laha, “Imti vou alem dam lam gi im vamdesu bakta meeda tame,” lahame ahumdi tu vou faodam bohu meedam bak. Labi laha iho dam bake deeli meedameam làhà iho gi keàtedi meedam damat modem bak. Ba meit iba git meedào? Iba git meedam vabao? Laham bak ba ozome odohali ame da lam voom vabak. 8Dam ihimo ot deeliame meedam bak lam ba vaitom vabak. Gi labaha bohu vuusdam bak. Eho gi neham bak ozome uba labi gagoho bak. Alam Aha Nutabe Neàna labe Aba Aho meia ahala modi vizi teudi modidam bak lam ba labaha bohu modesdam vabak. Gi fa nehadam bak. Alam Aha Nutabe Neàna labe Aba Aho meia modi vizi teudi ame da labe im Alabada aime ozobohudi fi gatei fa dam bake ahate vameaidam bak lam ba bisi gi labaha bohu meia vi vizedam vabak. Fa ba diamut modi vaitoi setem bak ehe bak. Labi laha Alam Aha Nutabe Neàna labe Aba Aho meia modi vizi teudi ame da labe aho naedat it aim biem dae fa vameadam bak lam laha bisi gi labaha bohu meia vi vizedam vabak. Fa ba diamut modi vaitoi setem bak ehe bak. Labi laha Alat amu dam bake vastehe im lam Alam Aha Nutabe Neàna labe Aho meia lab modi vizi teudi fi gatei ame da labe aho fa dam bake vameadam bak lam bisi gi labaha bohu meia vi vizedam vabak. Fa ba diamut modi vaitoi setem bak ehe bak. Ame di lam meit iba vameadam bak ba ozom vabak. 9Neham labe labihadaha bak. Abo Alat Aho amu dam bake vasti modi fa ozobohudi fi gatehe im lam iba gi fota zohota modi im ozobohudi fi gateda. Labi laha Aho meia modi im Abada aime fa dam bake ahate vameaidaha im lam laha iba gi fota zohota aime fa dam bake vou vameatedam bak. 10Lahana ba diamut Alat Aba Aho ozom digat fusi neàdi im Aba Aho ozom zoho ahebu Aho modi fi tatoi neàdehe labe im ab ozobohudi neàdedaham bak. Labi ame di labe Alam Aha Nutabe Neàna labe iba ahala modi vizi teudi meida vekesi modidam bak lam im ba meedam vabak. Gi modi fa setem bak. 11Eho etei lab gagoho bak lam um biem bake eho vouhodam im nim uho nasi aime ozodale. Eho amu data koena lahasuhu di lam eho im vameadam di gi data koenat im vameadam bakti uloho bak. Labi laha data koena labe vi ozome àhàkem bakti uloho bak. Labi laha data koena mei im aime ozodam bakti uloho bak. Labihadam bak. Lahana em etei fa busaoli data koe diat meedam im lam em ba meedam vabak. Amu gi voou setehe bak. Ame bak lam gi neham bak. Ba diamut im Alat Aba Aho ozom zoho ahebu fa fi tatoi neàdem labe fa ame Alam Aha Nutabe Neàna labe meia ahala modi vizi teudi modidam bak lam gi abehamdem vabna fa setem bakti ulohote. 12Eho etei lab gagoho bak lam eho fa neo vouhodase. “Ala akatihasu meedam Alat mode?” laham bak lam im etei bisi ozobohudi fi tatoi neàdehe vabak. Abo, “Na lam anat mode?” lahame itaamna ve aasome modeha itaamna gihobuli vi aam biem bakti ulohote. Lahana ba diamut, “Ala akatihasu meedam Alat mode?” laham bak lam ahebu fa fi tatoi neàdem di lam im ba im meida vekem vaba abo gi ame im ahebu ozobohudem bak. Abo damat im dauha ot aaiam labe bisi aame ozobohudem bakti ulohona modem bak. Neham bak. Etei nim Alat iba modi fi gatehena lam im gi fota zohota ozome ozobohudehe bak. Lahana ba diamut ame im lam ahebu modi fi tatoi im ba ozobohudem bak. Abo Alat Aho etei nibe im so nim ahebu ozobohudi neàdehe bak lamti ulohona iho fa ba neo Ala bake laha labihasu ozobohudem bak. 13Labihàmu iho etei gi ame bak lam vou faodam di nibe gi im làtela nehamda nim bisi iho im tombuli meedam im am bak. Ala bake abo tu vuzehi meedam bak bohu modesdam bak ame. Labi laha Alat, “Aho iba ba nehame mode tame,” lahame fet gagoho im laba iho tu ahumdi vou faodam bak ame. Labi laha im dam totbaho bake deeli meedam bak ame. Labihasu iho etei nibe tombuli vuusu meedam im làtela am bak. Lahana ame im làtela labe bisi tombuleheda gi iho dam bake deeli meedam bohu modesdam bak am bak.

will be added

X\