Matiu 1

1Talisibaralae sulia tha Jisas na Kraes. Nia 'e futa mai 'ana 'aebara tha Deved na ngwane 'inito nee 'e futa mai 'ana kwalafaa tha Abraham. 2Ma na talisibaralae neri, 'e thafali mai 'ana tha Abraham. Na 'alakwa tha Abraham ne tha Aesak, tha Aesak alua tha Jakob, ma tha Jakob ka alua tha Jiuda fonea doorana ki. 3Ma na 'alakwa nia ki tha Jiuda ne tha Peres ma tha Sera. (Gaa keerua thatana ni Tama.) Ma na 'alakwa tha Peres ne tha Hesron, tha Hesron ne alua tha Ram. 4Tha Ram ka alua tha Aminadab, tha Aminadab ka alua tha Nason, tha Nason ka alua tha Salmon. 5Tha Salmon ka alua tha Boas, ma gaa nia thatana ni Rahab. Tha Boas ka alua tha Obed, ma gaa nia thatana ni Rut. Tha Obed ka alua tha Jesi. 6Tha Jesi ne alua tha Deved na ngwane 'inito 'i Israel. Tha Deved ka alua tha Solomon, ma gaa nia ne gwe 'oru bae tha Iuraea. 7Tha Solomon ka alua tha Rihoboam, tha Rihoboam ka alua tha Abaeja, tha Abaeja ka alua tha Asa. 8Tha Asa ka alua tha Jehosafat, tha Jehosafat ka alua tha Joram, tha Joram ka alua tha Iusaea. 9Tha Iusaea ka alua tha Jotam, tha Jotam ka alua tha Ehas, tha Ehas ka alua tha Hesekaea. 10Tha Hesekaea ka alua tha Manase, tha Manase ka alua tha Emon, tha Emon ka alua tha Josaea. 11Tha Josaea ka alua tha Jekonaea ma na thaasina ki. Kera da futa sui naa si manga na malimae kera ki da ngala imole ki 'i Israel 'uria maetoaa baita 'i Babilon. 12'I buri na malimae kera ki da ka ngala imole ki 'i Israel 'uria 'i Babilon, tha Jekonaea ka fi alua tha Sialtiel. Ma tha Sialtiel ka alua tha Serababel. 13Tha Serababel ka alua tha Abaeud, tha Abaeud ka alua tha Elaeakim, tha Elaeakim ka alua tha Aso. 14Tha Aso ka alua tha Sadok, tha Sadok ka alua tha Akim, tha Akim ka alua tha Eliud. 15Tha Eliud ka alua tha Eliesa, tha Eliesa ka alua tha Matan, tha Matan ka alua tha Jakob. 16Tha Jakob ka alua tha Josef arai ni Meri na gaa nia tha Jisas na da 'alangia laubo 'ania na Kraes, sulia nia nee na ngwane tha God 'e filia fasi ka 'inito. 17Ma 'e thafali mai 'ana tha Abraham lelea ka dao 'ana tha Deved na ngwane 'inito, akwala ma fai uuni ngwane. Sui ka thafali mai 'ana tha Deved na ngwane 'inito lelea mai ka dao 'ana si manga bae maalimae kera ki da ngala imole ki 'i Israel 'uria 'i Babilon, tee akwala ma fai uuni ngwane. Ma ka thafali 'ana si manga imole ki 'i Israel da lea 'uria 'i Babilon lelea mai ka dao 'ana si manga na Kraes 'e futa, tee akwala ma fai uuni ngwane laubo. 18Na futalana mai tha Jisas na Kraes 'e 'urii: Si manga da alufaafia ni Meri na gaa tha Jisas fuana tha Josef, ma 'e langi daru si too ofu 'ua, ni Meri e thaitamana nia 'e kulua naa 'ana Mangoedoo Abu. 19Ma tha Josef, na ngwane ne da alufaafia fuana, ka manata 'uria lukatailana, sulia nia na ngwane 'o'olo. Sui ta, 'e otenia 'ana faanonisusualalana ni Meri 'i maana imole ki, ma ka manata 'uria lukatai agwalae 'ani nia. 20Sui ta, si manga 'e manata 'ua bana sulia si doo neri, na enselo nia tha God ka daofaatai fuana 'i laona moosubolelae ka 'urii, “Josef 'ae, 'oe ngwane 'ana kwalafa tha Deved, 'o si mau lau 'ana talailana ni Meri 'uria 'afe 'oe. Sulia ni nia 'e kulua naa 'ana Mangoedoo Abu. 21Ma nia kau tharea tee ngwela ngwane, ma 'oko 'alangia 'ana tha Jisas (na maalutana ne na ‘Faamoori’), sulia nia ne kau faamooria imole nia ki faasia abulo ta'alae kera ki.” 22Ma si doo nee ki 'e fuli fasi ka faamamanea si doo bae tha God 'e faarongo mai 'ania, 'ana si manga bae na profet 'e bae 'urii, 23“Tee keni thaarii kau iana ma kau tharea tee fe ngwela ngwane, ma dau 'alangia 'ana tha Emanuel.” Ma maalutana si thata neri: “Tha God 'e too fone kolu.” 24Ma si manga tha Josef 'e tharai, nia ka ade naa sulia si doo neri ki na enselo nia tha God 'e thaea fuana. Ma nia ka adea naa ni Meri. 25Sui ta, 'e langi daru si too ofu 'ua lelea ka dao 'ana si manga ni Meri 'e tharea 'alakwa nia. Ma tha Josef ka 'alangia naa 'ana tha Jisas.


Copyright
Learn More

will be added

X\