1 Ana'ku Titus! Iyya, Paulus, mokii iyaè sure'è selaku atanna Allataala sibawa rasulna Yèsus Kristus. Ripilèka sibawa risuro untu' tulungngi sining tau napilè Allataala kuwammengngi namancaji mawatang ri laleng teppe'na mennang. Harusu tokka pimpingngi mennang kuwammengngi naissengngi pappagguruwang iya tongengngè iya nappagguruwangngè agamata. 2 Iyaro pappagguruwangngè nallalengi mammènasa makkedaè tarimaki matu atuwong tongengngè sibawa mannennungengngè. Allataala pura majjanciyangngi iyaro atuwongngè riwettu dè'napa nappammula wettuè -- na Allataala dè' nakkullè mabbellè. 3 Ri wettu iya teppa'è, napannessai Allataala iyaro jancin-Na ri laleng pasen-Na. Iyaro pasenna purani nappaddettangeng ri iyya, sibawa uwabbirittangngi nasaba parèntana Allataala Pappassalama'ta. 4 Titus, tonget-tongekko iyanaritu ana'ku, saba' iko sibawa iyya pada-pada mateppe' ri Kristus. Mammènasaka tennapodo Allataala Ambo'è sibawa Kristus Yèsus Arung Pappassalama'ta, mabbèrè barakka, sibawa asalèwangeng lao ri iko. 5 Usalaiko ri Krèta kuwammengngi mullèi murusu'i gau'-gau' iya parelluè riatoro'. Makkuwatoro, kuwammengngi muwakka pamimping-pamimping jema' ri tungke' kota. Na èngngerangngi matu iyaè panunju'-panunju'ku: 6 Sèddiè pamimping jema' sitinajai sèddi tau iya dè'è gaga cellana; harusu'i mappunnai sèddi bawang bainè; ana'-ana'na harusu'i mateppe'ni ri Kristus sibawa tenniya iya riissengngè selaku ana' benna sibawa dè' nawedding riyatoro'. 7 Pamimping jema'è iyanaritu tau iya murusu'èngngi jama-jamanna Allataala, dè' nawedding engka cellana. Dè' nawedding matempo iyarè'ga paccai-caireng, iyarè'ga pammabokeng, iyarè'ga napoji mallaga, iyarè'ga mammata dowi. 8 Harusu'i masennang tarima tau ri bolana, napoji gau'-gau' iya makessingngè, naullèi tahangngi alèna, malempu, mapaccing sibawa taratoro'. 9 Harusu'i makkatenning masse ri pappagguruwang iya weddingngè riyatepperi, pada-pada iya puraè riyappagguruwang lao ri alèna. Nanallalengiro naullèi pangajariwi tauwè naolai pappagguruwang iya tongengngè, sibawa mappaitangngi asalanna sining tauwè iya mèwaèngngi. 10 Saba' maèga tau iya pojiyèngngi maronta, lebbi-lebbipi sining tau iya riyolonaèro maggama Yahudiwi; nabengnguwangngi mennang sining tau laingngè sibawa omong kosonna. 11 Sining tau pada-padaèro harusu'i ritutu' tèmunna, saba' napakacauwi mennang maèga kaluwarga sibawa sining pappagguruwang iya omong kosongngè. Napogau'i mennang iyaro banna nasaba maèloi sappa asarong iya dè'è nasipato! 12 Engka naengka sèddi nabinna muto mennang, iya assalennaè polèto ri Krèta, makkeda, "Sining tau Krètaè tuli pabbellèngngi, sibawa pada-padai olokolo' masekkangngè, iya mabuwajaè sibawa makuttu. " 13 Aga iya napowadaè iyaro nabiè mèmeng tongengngi. Iyanaro saba'na harusu'ko mamparengngi mennang sibawa matedde; kuwammengngi natette mennang makkatenning ri pappagguruwang iya tongengngè 14 sibawa dè'na nakkatenning ri pau-pau rikadonna Yahudiè iyarè'ga peraturang-peraturang iya naèbbuè sining tau iya sampèyangngèngngi pappagguruwang iya tongengngèro. 15 Sininna sèuwa-sèuwaè mapaccing lao risining tau iya mapaccingngè. Iyakiya lao risining tau iya macarèpaè pikkiranna sibawa iya dè'è namateppe', dè' muwi sèddi iya mapaccingngè, saba' pikkirang sibawa atinna mennang macarèpani! 16 Makkedai mennang makkedaè naissengngi mennang Allataala, padahal pangkaukenna mennang massakkarengngi. Mappakaciddi-ciddi mennang sibawa dè' namaèlo turu'; mennang iyanaritu sining tau iya dè'è naullèi pogau'i sèuwa iya makessingngè.
