1 Saudara-saudara! Naisseng manenni Saudara hukkungngè. Jaji, muwisseng makkedaè akuwasanna hukkungngè ri yasè'na sèddiè tau, takkennai ri wettu tuwona mupa iyaro tauwè. 2 Ebara'na, sèddiè makkunrai iya mallakkaiyè, tassiyoi lao ri hukkungngè lao ri lakkainna banna ri wettu tuwona mupa lakkainna. Rèkko matèni lakkainna, iyaro bainè leppe'i polè ri hukkung iya siyoèngngi lao ri lakkainna. 3 Rèkko iyaro makkunraiè siyonrongngi sibawa worowanè laingngè ri wettu tuwona mupa lakkainna, secara hukkung, iyaro makkunraiè riyasengngi malaweng. Iyakiya rèkko matèni lakkainna, secara hukkung, iyaro makkunraiè leppe'ni. Narèkko kawingngi paimeng sibawa sèddiè worowanè laing, dè' namalaweng. 4 Makkuwatoro gau'na sibawa iko, Saudara-saudara. Lao ri hukkunna agama Yahudiè matèno, nasaba pura ripassèddino sibawa tubunna Kristus sibawa mancaji appunnangen-Na iya puraè ripatuwo paimeng polè ri amatèngngè. Ripatuwoi polè ri amatèngngè kuwammengngi tamancaji makkèguna lao ri Allataala ri laleng atuwotta. 5 Saba' riyolo tuwoki manuru' sipa-sipa tolinoè. Iyaro wettuè sining cinnata iya madosaè, iya mompoè nasaba engkana hukkunna agamaè, mappattentu ri laleng alèta. Iyanaro saba'na naripogau' gau'-gau' iya nassabariyè amatèng. 6 Iyakiya makkekkuwangngè dè'na tatassiyo ri hukkunna agama Yahudiè. Purani matè lao ri hukkung-hukkung iya makuwasaiyèkki riyolo. Dè'na tassompa sibawa cara-cara maittaè, situru hukkung-hukkung iya tarokiè. Makkekkuwangngè massompaki situru cara baru iya nappaitangngè Rohna Allataala lao ri idi. 7 Rèkko makkuwaitu, agana wedding tapowada? Majaga hukkunna agama Yahudiè? Tentu dè'! Iyakiya hukkung ngènnaro pagguruka passalenna dosaè. Dè' uwissengngi aga iyaro mangowaè, rèkko hukkung agamaè dè' napowadai, "Aja' mumangowa. " 8 Naolai hukkung agamaè, nalolongeng kasempatang dosaè untu' paompoi sininna rupanna cinnaè iya mangowaè ri laleng atikku, saba' rèkko dè'i gaga hukkunna agamaè, tentu matè towi dosaè. 9 Iyya riyolo tuwoka temmakkè hukkung agama. Iyakiya wettunna mompo hukkung agamaè, mammulani tuwo dosaè 10 na iyya matèka. Na hukkung agamaèro, iya bunge'-bunge'naè naseng untu' mabbèrè atuwong, mala papolèi amatèng lao ri iyya. 11 Nasaba naolai hukkung agamaèro, malai kasempatang dosaè bengnguwakka sibawa mpunoka. 12 Assalenna hukkung agamaè polèi ri Allataala, na tungke' parènta ri laleng hukkungngèro apolènna polèi ri Allataala, jaji adèlè sibawa makessing. 13 Nah, aga iyaè makkèbettuwangngi makkedaè iya makessingngèro mappapolèi amatèng lao ri iyya? Tentu' dè'! Dosaè ritu mappapolè amatèng. Ri laleng napakèna iya makessingngè, namappapolè dosaè amatèng lao ri iyya, kuwammengngi sipa-sipa dosaè napaita sibawa namanessa. Naolai parènta-parèntana Allataala, pabuttini pèkkugi jana dosaè. 14 Riissenni makkedaè hukkunna agama Yahudiè assalenna polèi ri Rohna Allataala; iyakiya iyya'è tolino malemmaka. Purana ribalu' untu' mancaji atanna dosaè. 15 Saba' alèku paimeng dè'to upahangngi pangkaukekku. Gau'-gau' iya macinnaè upogau', iyaro dè' upogau'i; iyakiya gau'-gau' iya ubenciyè, mala iyaro upogau'. 16 Rèkko upogau'i gau'-gau' iya sièwaè sibawa cinnaku, bettuwanna iyaro uwangakuiwi makkedaè iyaro hukkunna agama Yahudiè makessingngi. 17 Jaji, tenniyana iyya sitongenna pogau'i iyaro, sangadinna dosa iya kuwasaiyèngngi alèku. 18 Uwisseng makkedaè dè'gaga muwi sèuwa iya makessingngè ri laleng alèku; iyanaritu ri laleng ampè-ampèku selaku tolino. Saba' engka cinna ri alèku untu' pogau'i makessingngè, iyakiya dè' uwullèi pajoppai. 19 Dè' upogau'i iya makessingngè iya macinnaè upogau'; sibalèna upogau'i gau'-gau' iya majaè, iya dè'è umaèlo pogau'i. 20 Rèkko upogau'i gau'-gau' iya dè'è umaèlo pogau'i, bettuwanna iyaro tenniyana iyya pogau'i iyaro gau'-gau'è, sangadinna dosaè iya kuwasaiyèngngi alèku. 21 Jaji, malaka apettung makkedaè hukkungngènnaè makkatenning peranang: iyanaritu makkedaè rèkko maèloka pogau'i iya makessingngè, na banna iya majaè bawang mompo ri alèku. 22 Napoji batèkku hukkunna Allataala, 23 iyakiya mainge'ka makkedaè ri laleng alèku engkato hukkung laing iya mattenningngè peranang -- iyanaritu hukkung iya siyèwaè sibawa hukkung iya riyangakuiyè ri akkalekku. Iyanaro saba'na tassiyoka ri hukkung dosaè iya makkatenningngè peranang ri laleng alèku. 24 - 26 Makkuwaniè keadaakku: uturusiwi hukkunna Allataala sibawa akkalekku, iyakiya nasaba ampè tolinoku, tunru'ka lao ri dosaè. Temmaka cilakaku iyya'è! Nigana maèlo passalama'ka polè ri watakkalèwè iya tiwièkka lao ri amatèngngè? Sukkuru'ki lao ri Allataala! Maèloi passalama'ka naolai Yèsus Kristus.
