1 Makkekkuwangngè simadècèngenni paimeng sibawa Allataala, nasaba mateppe'ki. Rimakkuwannanaro tuwoki ri laleng adamèngengngè sibawa Allataala naolai Puwatta Yèsus Kristus. 2 Nasaba mateppe'ki ri Yèsus Kristus, namakkullèki pèneddingiwi pammasèna Allataala, nanasibawangngi iyaro pammasè natuwoki makkekkuwangngè. Rimakkuwannanaro mariyo-riyo atitta nasaba mappunnaiki paddennuwang makkedaè ripèrasai matu asennangengngè iya nabbèrèyangngè Allataala! 3 Nalebbi naiyaro, marennu tokki ri laleng anrasa-rasangngè, nasaba riissengngi makkedaè anrasa-rasangngè mèbbui tauwè mancaji matinulu, 4 na atinulurengngè mèbbui matu tauwè tahang ri paccobangngè; iyanaè paompo paddennuwang. 5 Paddennuwang iya pada-padaèwè dè' napakacèlèki matu, nasaba purani riliseki atitta ri Allataala sibawa pammasè. Napogau'i Allataala iyaro naolai Roh Mapaccin-Na, iya puraè nawèrèkki. 6 Wettutta ri laleng keadaang dè'gaga pakkullèng, matèi Kristus untu' idi ri wettu iya pura napattentuè Allataala; padahal idi sining tau iya mabèlaè polè ri Allataala. 7 Muwi untu' sèddiè tau adèlè mawatatto tauwè maèlo matè. Naullè untu' sèddiè tau iya makessingngè, engkato tau iya baraniè matè. 8 Iyakiya Allataala pannessai pammasè-Na lao ri idi wettunna Kristus matè untu' idi wettutta tau madosa mupa. 9 Makkekkuwangngè simadècèngenni paimeng sibawa Allataala naolai amatènna Kristus; rimakkuwannanaro mattentuni ripassalama' tokki matu polè ri caina nasaba Kristus. 10 Rèkko ri wettutta simusu sibawa Allataala; ripasidamèki sibawa Alèna naolai amatènna Ana'-Na, lebbi-lebbipi makkekkuwangngè simadècèngenna paimeng assisumpungetta sibawa Allataala, tentu ripassalama' tokki matu naolai atuwonna Kristus. 11 Nalebbi na iyaro, marennu tokki nasaba akessingenna Allataala naolai Puwatta Yèsus Kristus. Saba' naolai Kristus, ripèneddingiwi makkekkuwangngè assisumpungetta iya madècèngngèro sibawa Allataala. 12 Muttama'i dosaè ri laleng linoè naolai sèddi tau, na polè ri dosaèro momponi amatèngngè. Addimonrinna, iyaro amatèngngè nassanraiwi sininna rupa tauwè, saba' sininna tauwè madosani. 13 Riwettu dè'napa nariyabbèrèyang hukkunna agama Yahudiè, engka mèmenni dosaè ri laleng linoè. Iyakiya dè' narituntu' dosaè, nasaba dè'gaga hukkung iya weddingngè riyajjalèkkai. 14 Namuni polè ri wettunna Adam lettu ri wettunna Musa, sininna rupa tauwè rikuwasaiwi ri amatèngngè. Mala sining tau iya dè'è napogau' pelanggarang sibawa cara iya padaè iya napogau'è Adam, iyaro sining tauwè maccowè towi rikuwasai ri amatèngngè. Adam iyanaritu gambaran-Na polè ri iya maèloè polè matti. 15 Iyakiya dè' napada duwa iyaro; nasaba asèmpowang atinna Allataala mabèlai lebbi battowa rèkko ripasibandingngi sibawa palanggarang iya napogau'è Adam. Pelanggaranna sèddi tau nassabariwi maèga tau matè. Lebbi battowapasi addimonrinna pammasèna Allataala sibawa hadiya asalamakengngè iya nabbèrèyangngè lao ri maèga makkuwaro tau, naolai akessingeng atinna sèddiè tau iyanaritu Yèsus Kristus. 16 Hadiya polè ri Allataala lebbi battowa towi naiya dosana tau sèddièro. Saba' puranana sèddiè tau pogau' pelanggarang, tatteppani apettung "Pasalaè". Iyakiya maèganana tau pogau' dosa polèni pammasèna Allataala iya pannessaèngngi, "Dè' napasala". 17 Nasaba palanggaranna sèddi tau, massanrai amatèngngè lao kègi-kègi naolai tau sèddièro. Lebbi battowa pasi addimonrinna naiya napogau'è sèddiè tau laing, iyanaritu Yèsus Kristus. Naolai Alèna, nabbèrèyangngi Allataala pammasè-Na lao ri maèga tau sibawa nallalengiwi mennang simadècèngeng paimeng sibawa Allataala sibawa cuma-cuma; makuwasai matu mennang ri linoèwè naolai Kristus. 18 Jaji pèkkugi pelanggaranna sèddiè tau nassabariwi sininna rupa tauwè rihukkung, makkuwatoro pangkaukenna sèddiè tau iya maccowèriyèngngi èlona Allataala, nassabariwi sininna tauwè ripaleppe' polè ri asalanna sibawa riwèrèng atuwong. 19 Na pèkkugi namaèga tau mancaji tau madosa nasaba sèddi tau dè' namatinulu, makkuwatoniro maèga tau ripakkullè simadècèngeng paimeng sibawa Allataala nasaba sèddi tau matinulu ri Allataala. 20 Iya mabbèrèyangngèngngi hukkunna agama Yahudiè iyanaritu Allataala muto. Iyakiya pèdè' makkuragai tolinoè turusiwi iyaro hukkung-hukkungngè, pèdè' najjalèkkaiwi mennang sibawa madosa lao ri Allataala. Iyakiya namuni pèdè' pogau' dosa tolinoè, Allataala pèdè' mamasèiwi mennang. 21 Na, harusu'ki matè nasaba pogau'ki dosa, iyakiya Allataala mamasèiki sibawa mabbèrèi laleng lao ri idi untu' simadècèngeng paimeng sibawa Alèna. Nasaba assisumpungetta sibawa Allataala madècèngi paimeng, nabbèrèyang towi atuwong mannennungengngè lao ri idi naolai Yèsus Kristus, Puwatta.
