1 Rèkko makkuwaitu, aga sarona mancaji tau Yahudi? Sibawa aga gunana turusiwi peraturang sunna'è? 2 Tentu maèga muwa gunana! Bunge'-bunge'na, nasaba lao ri tau Yahudiè ritu Allataala mappaddettangengngi ada-adanna Allataala. 3 Iyakiya pèkkugi rèkko sibagiyang tau Yahudiè dè' namatinulu? Nassabarigaro na Allataala dè'to namatinulu? 4 Tentu dè'! Nasaba manessani Allataala tuli tongengngi, namuni tungke' tauwè mabbellèi. Ri laleng Kitta'è tarokii, "Sitinajako pabutti tongeng ri laleng aga iya mupogau'è, sibawa pakalako wettummu riyadèlèki. " 5 Iyakiya rèkko pèdè' manessani adèlèkenna Allataala, nasaba pogau'ki iya dè'è natongeng, agana maèlo tapowada? Makkedaè Allataala dè' naadèlè' rèkko nahukkukki? (Mèmeng iyaè pakkutanaè siratangngi secara tolino. ) 6 Dè' sises-siseng! Saba' rèkko dè' naadèlè' Allataala, pèkkugi naullèi madèlèkiwi linoèwè? 7 Iyakiya narèkko pangkaukeng iya dè'è natongeng, aga iya tongengngè passalenna Allataala pèdè' paitai, angkanna ripojiwi, magi tau iya pogau'èngngi majaèro ripasala mupi selaku tau madosa? 8 Na magi nadè' naweddikki makkeda, "Madècèngengngi pogau'ki majaè kuwammengngi mompoi dècèngngè?" Mèmeng engka sining tau iya pakatunaiyèkka sibawa powadai makkedaè purana makkeda makkuwaro. Sining tau sinrupaèro siratangngi rihukkung ri Allataala. 9 Aga tudangetta selaku tau Yahudi lebbi makessingngi naiya pangka'na sining tau bangsa laingngè? Dè' sises-siseng! Purani upowada makkedaè muwi tau Yahudiè iyarè'ga bangsa laingngè, iya manenna rikuwasaini ri dosaè. 10 Pada-pada iya tarokiè ri laleng Kitta'è, "Dè' muwi sèddi tau tongeng, 11 dè' muwi sèddi tau pahangngi sibawa dè' muwi sèddi tau sompai Allataala. 12 Sininna tauwè purani napabèlai alèna polè ri Allataala; pusa manenni. Dè' muwi sèddi tau pogau'i tongengngè; muwi sèddi dè'to! 13 Tigero'na mennang pada-padai tampung tattimpa'è. Bellè massolo polè ri lilana, sibawa tèmunna mennang mapporokeng pètenna, pada-pada moso ulaè. 14 Pennoi tèmunna mennang sibawa tanro enrengngè mabbanta. 15 Masitta jongkana mennang rèkko maèloi mabbuno tau. 16 Ancurekeng sibawa asussangngè, namporengngi mennang kègi-kègi. 17 Butai mennang lao ri laleng asalèwangengngè, 18 sibawa dè' nappakalebbi ri Allataala. " 19 Riissenni makkekkuwangngè makkedaè sininna iya tarokiè ri laleng hukkunna agama Yahudiè, iyanaritu untu' sining tau iya engkaè riyawa parèntana hukkung-hukkungngèro. Rimakkuwannanaro dè' sèddi tau mullèi mabbèrè alasang muwi agi-agi sibawa sininna linoè naullèi Allataala tuntu'i. 20 Saba' dè' sèddi tau makkullè simadècèngeng Allataala nasaba iyaro tauwè nattuwangngi gau'-gau' iya engkaè ri laleng hukkunna agamaè. Sibalè'na iyaro hukkung-hukkungngè banna najjellokengngi lao ri rupa tauwè makkedaè madosai rupa tauwè. 21 Iyakiya makkekkuwangngè Allataala pura mappaitangngi lalengngè pèkkugi tolinoè nasimadècèngeng sibawa Allataala; na caranaro dè' gaga assisumpungenna sibawa hukkunna agama Yahudiè. Kitta'-kitta'na Musa sibawa kitta'-kitta'na nabi-nabiè mala pannessai gau'èro, 22 makkedaè Allataala mpèrèngngi pakkullèng tolinoè simadècèngeng sibawa Allataala, banna rèkko rupa tauwè mateppe'i ri Yèsus Kristus. Napogau'i Allataala iyaè untu' sininna tau iya mateppe'è ri Kristus; saba' dè'gaga assilaingenna: 23 Sininna tauwè madosani sibawa mabèlai polè ri Allataala iya maèloè passalama'i mennang. 24 Banna nasaba pammasèna Allataala bawang iya nabbèrèyangngè sibawa cuma-cuma; assisumpungenna tolinoè sibawa Allataala madècèngngi paimeng; carana iyanaritu: ripaleppe'i tolinoè ri Yèsus Kristus. 25 Allataala makkarobangengngi Yèsus Kristus kuwammengngi na amatèn-Naro ripannessai tolinoè leppe'i polè ri asalangngè rèkko mateppe'i mennang ri Alèna. Napogau'i Allataala makkuwaèro untu' mappaitangngi adèlèken-Na. Saba' ri wettu labe'è sabbara'i Allataala lao ri dosa-dosana tolinoè, angkanna dè' nahukkungngi mennang. 26 Iyakiya makkekkuwangngè tinda'i lao ri dosaè untu' pabuttiwi adèlèken-Na. Nasibawang caraèro, nappaitangngi makkedaè tongengngi Alèna; sibawa tungke' tau iya mateppe'è ri Yèsus, Ripannessai selaku tau iya simadècèngengngè paimeng sibawa Allataala. 27 Rimakkuwannanaro dè'na gaga alasang ri idi untu' mammingki-mingki. Magi nakkuwaro? Aga nasaba ripogau'i iya tarokiè ri laleng hukkunna agama Yahudiè? Tenniya. Iyakiya nasaba mateppe'ki. 28 Saba' rippe'na iyanaritu makkuwaiyè: Ripannessai tauwè simadècèngeng paimeng sibawa Allataala, tenniya nasaba nattuwangngi aga iya tarokiè ri laleng hukkunna agama Yahudiè, sangadinna nasaba mateppe'i ri Yèsus Kristus. 29 Iyarè'ga iyaro Allataala, Allataalanai tau Yahudiè bawang? Dè'ga na Allataalana towi bangsa laingngè? Ya, mèmeng Allataalana towi bangsa laingngè! 30 Saba' sèddi bawang Allataala. Alèna ritu nakkullèngiwi sining tau Yahudiè nasimadècèngeng paimeng sibawa Allataala nasaba mateppe'i mennang. Na Alènato nallalengi nasining tau bangsa laingngè simadècèngngi paimeng sibawa Allataala; iyatoro nasaba mateppe'i mennang. 31 Aga iyaè bettuwanna makkedaè nasaba mateppe'ki ri Kristus, riyabbèyangngi hukkunna agama Yahudiè? Dè' sises-siseng! Mala nasaba atepperettaro, naripakarajai hukkung-hukkungngèro.
