1 Rimakkuwannanaro, Saudara-saudara, niga Saudara angkanna Saudara maèlo passalai tau laingngè? Dè' agaga nappunnai Saudara untu' mèwaiwi alèmu! Saba' rèkko Saudara passalai tau laingngè, padahal napogau' towi Saudara pangkaukeng iya pada-padaè mennang, tentu Saudara pakennai towi alèna pahukkungeng. 2 Riissenni makkedaè rèkko Allataala patatteppai pahukkungengngè ri yasè'na sining tau iya pogau'èngngi sining pangkaukeng pada-padaèro, iyaro apettunna Allataala tongengngi. 3 Iyakiya iko, Saudara-saudara, mupogau' towi gau'-gau' iya muteppuwangngèngngi sining tau laingngè! Namupikkiri'i mullèi leppe' polè ri pahukkungenna Allataala? 4 Iyarè'ga mupandang èntèngngi asèmpowanna Allataala sibawa asagènang atinna enrengngè asabbaraken-Na iya makkuwaèro loppona? Pasti muwisseng makkedaè Allataala mappaitangngi akessingeng atin-Na nasaba maèloi kuwammengngi mutoba' polè ri dosa-dosamu. 5 Iyakiya matedde atiko sibawa dè' mumaèlo tappinra. Rimakkuwannanaro alèmu muto mèbbui pahukkungemmu pèdè' tattamba tane'na ri Esso Kiyame', rèkko nappaitanni caina Allataala sibawa patatteppai pahukkungemmu iya adèlè'è. 6 Saba' Allataala mpale'i matu tungke' tau situru pangkaukenna. 7 Allataala mabbèrèyangngi atuwong tongengngè sibawa mannennungengngè lao ri mennang iya mattunru-tunruè pogau' dècèng untu' lolongeng iya malebbiè, iya ripakarajaè sibawa mannennungengngè. 8 Iyakiya sining tau iya pentingkangngèngngi alèna sibawa dè' namaèlo matinulu ri Allataala, sangadinna maccowèriwi iya majaè, iyaro sining tauwè riyacairi senna'i matu ri Allataala. 9 Tungke' tau iya pojiyèngngi pagau'i majaè masussai matu sibawa manrasa-rasai mula-mulanna tau Yahudiè, sibawato bangsa-bangsa laingngè. 10 Iyakiya sininna tau iya pojiyèngngi pogau' makessingngè riwèrèngngi matu alebbireng sibawa ripakarajai enrengngè asalèwangeng polè ri Allataala; mula-mulanna lao ri tau Yahudiè, makkuwatoro lao risining tau bangsa laingngè. 11 Saba' Allataala gaukengngi sininna tauwè pada-padai. 12 Sining tau bangsa laingngè madosai tennaisseng hukkunna agama Yahudiè. Jaji rihukkungngi risaliwenna hukkung-hukkungngèro. Iyakiya sining tau Yahudiè madosai puranana naisseng hukkung-hukkungngèro; rimakkuwannanaro rituntu' towi matu mennang situru hukkung-hukkungngèro. 13 Saba' simadècèngengngi paimeng tauwè sibawa Allataala, tenniya nasaba iyaro tauwè naissengngi hukkunna agama Yahudiè, sangadinna nasaba napogau'i aga taroki ri laleng hukkung-hukkungngèro. 14 Sining tau bangsa laingngè dè' naissengngi hukkung-hukkung agama Yahudiè. Iyakiya rèkko mennang nasaba èlo alèna pogau'i aga napparèntang iyaro hukkung-hukkungngè, atinna mennang ritu mancaji hukkung lao ri mennang, namuni mennang dè' naissengngi hukkung agama Yahudiè. 15 Ampè-ampèna mennang mappaitangngi makkedaè aga napparèntang iyaro hukkung-hukkungngè tarokii ri laleng atinna. Ati marilalenna muto mennang pettuiwi gau'èro, saba' biyasa towi mennang ripasala sibawa biyasa towi ripattongeng ri pikkiranna. 16 Makkuwaniro kajajiyangngè matti ri Esso puraè ripattenturo. Iyaro Essoè -- manuru' Karèba Madècèng iya uwabbirittangngè -- Allataala naolai Yèsus Kristus, madèlèkiwi matu rahasiyana atiè sibawa pikkiranna sininna tauwè. 17 Iyakiya makkekkuwangngè pèkkugi tosi Saudara-saudara? Mangakui Saudara tau Yahudi. Taggattungngi Saudara ri hukkunna agama Yahudiè sibawa maloppo nyawana ri laleng assisumpungenna Saudara sibawa Allataala. 18 Lolongengngi Saudara panunju'-panunju' polè ri hukkungngèro, angkanna muwisseng èlona Allataala sibawa muwissenna pattentui kèga makessing. 19 Mateppe'ko makkedaè Saudara iyanaritu pamimpinna tau butaè sibawa tajang lao ri mennang iya engkaè ri laleng pettangngè; 20 Saudara gurunna sining tau iya matunaè ampè-ampèna, sibawa gurunna sining tau iya namadonggoè. Mateppe'i Saudara makkedaè ri laleng hukkunna agama Yahudiè, nappunnaiwi Saudara sininna pangissengengngè sibawa pappagguruwang iya tongengngè. 21 Mupaggurui tau laingngè; magi nadè' mupaggurui alèmu? Mupaggurui tauwè kuwammengngi aja' naènnau, padahal Saudara muto mènnau! 22 Mupaggurui tauwè kuwammengngi aja' namalaweng, padahal Saudara muto malaweng! Mubenciwi barahalaè, padahal Saudara muto malai barab-barang polè ri bola-bola abbarahalangngè. 23 Nattempo-tempowangngi Saudara makkedaè nappunnaiwi Saudara hukkunna Musa, padahal napakatunai Saudara Allataala ri laleng dè'na muturusiwi parènta-Na. 24 Ri laleng Kitta'è tarokii makkuwaè, "Nasaba iko, sining tau Yahudiè, naricarèpai asenna Allataala ri yelle'na bangsa-bangsa laingngè. " 25 Rèkko matinului Saudara ri hukkunna agama Yahudiè, sunna'na Saudara engkato akkègunanna. Iyakiya rèkko dè' mullèi mapatoiwi gau'-gau' iya riyapparèntangngè ri laleng hukkung-hukkungngèro, sunna'na Saudara dè' sisenna nakkèguna. 26 Rèkko sèddiè tau tenniya Yahudi iya dè'è narisunna', turusiwi hukkunna agama Yahudiè, dè'ga nangga'i Allataala selaku tau iya puraènna risunna? 27 Nasining tau iya dè'è narisunna'ro napassalai matu tau Yahudiè, saba' mappunnaiwi Saudara hukkung agama Yahudi sibawa risunna'na Saudara, iyakiya muwajjalèkkaiwi hukkung-hukkungngèro. Dè' narisunna' mennang, iyakiya mala mennang ritu iya turusiyèngngi hukkunna agama Yahudiè. 28 Nasaba tau Yahudi iya tulèngngè tenniya iya asennaè bawang tau Yahudi; sibawa tau iya tonget-tongengngè risunna tenniya tau iya risunna'è secara mallahèreng bawang. 29 Sibalè'na, sèddiè tau Yahudi iya tulèngngè iyanaritu tau iya atinnaè mannyawa Yahudi; sibawa sunna' tongengngè iyanaritu sunna' ri atiè iya najamaè Rohna Allataala, tenniya iya riyokiè ri laleng kitta'è. Tau sinrupaèro tarimai pappojiyang polè ri Allataala, tenniya polè ri rupa tauwè.
