1 Idi iya tonget-tongengngè mateppe' ri aga iya riyatepperiyè harusu'i sabbara' lao risining pappotane'na sining tau iya malemmaè atepperenna. Aja' tamaèlo sennangiwi alèta bawang. 2 Sibalè'na harusu'ki tungke'-tungke' sennangiwi atinna pada-padatta untu' adècèngenna kuwammengngi atepperenna natattamba awatangenna. 3 Saba' Kristus dè'to napikkiri'i asennangeng Alèna bawang. Ri laleng Kitta'è tarokii makkuwaè, "Sininna paccellaè iya ripattujuè ri Iko sempè'ni ri yasè'ku. " 4 Sininna iya riparisure'è ri laleng Kitta'è iyanaritu untu' pagguruki. Saba' pappagguruwang iya ritarimaè polè ri Kitta'è pancajiki sabbara' sibawa mawatang, angkanna weddikki maddennuwang lao ri Allataala. 5 Tennapodo Allataala, iya mabbèrè asabbarakeng sibawa passalèwo lao ri rupa tauwè, tulukko untu' tuwo massiati, turusiwi pappaitana Yèsus Kristus. 6 Sibawa massiatiwi Saudara iya maneng massibawa weddingngi pojiwi Allataala, Ambo'na Puwatta Yèsus Kristus. 7 Rimakkuwannanaro sitinajai Saudara-saudara tarimai sèddiè sibawa laingngè sibawa masennang ati, pada-pada towi Kristus tarimako untu' pakalebbii Allataala. 8 Nasaba, èngngerangngi, makkedaè Kristus purani natumaningi tau Yahudiè untu' mappaitangngi makkedaè Allataala matinului rupaiwi sining jancin-Na lao ri nènè-nènèta. 9 Naèbbu towi Yèsus bangsa-bangsa laingngè pakalebbii Allataala nasaba akessingeng atin-Na lao ri mennang. Ri laleng Kitta'è tarokii makkuwaè, "Rimakkuwannanaro maèloka poji-Ko ri yelle'na bangsa-bangsaè, maèloka makkèlong pappojiyang untu' asem-Mu. " 10 Engkato taroki makkuwaè, "Ariyo-riyono silaong umma'na Allataala iya tappilè, èh bangsa-bangsa!" 11 Sibawa iyatoè, "Pojiwi Allataala, èh sininna bangsaè, sitinajai sininna tauwè pojiwi!" 12 Sibawa iyatoè napowada Yèsaya, "Polè ri wija-wijanna Isai mompoi matu sèddi tau iya parèntaèngngi matu bangsa-bangsaè; ri Alènai matu bangsa-bangsaè mammènasa. " 13 Allataala iyanaritu onronna Saudara mammènasa. Tennapodo nalisekiwi atimmu sibawa sininna ariyo-riyongngè sibawa asalèwangengngè nasaba mateppe'ko ri Alèna, kuwammengngi nasaba akuwasanna Rohna Allataala pèdè' mammènasako lao ri Allataala. 14 Saudara-saudaraku! Mateppe'ka makkedaè engka maèga senna' passaleng iya makessingngè ri iko. Muwisseng towi sini-sininnaè sibawa mullè mappagguru sèddiè sibawa laingngètto. 15 Iyakiya passalenna gau'-gau' mattentuè, uparèngngerangiko sibawa matedde ri laleng sure'èwè, nasaba Allataala pura mpèrèkka jamangngèro. 16 Puraka napancaji pattumaninna Kristus Yèsus untu' rikiring lao ri bangsa-bangsaè iya tenniyaè Yahudi. Sibawa tinda'ka selaku imang, iya mappallebbangengngèngngi Karèba Madècèng polè ri Allataala, kuwammengngi sining tau tenniyaè Yahudi mancajiwi sèuwa pakkasuwiyang lao ri Allataala iya weddingngè natarima Allataala. Tennapodo Rohna Allataala mèbbui mennang mancaji sèddi pakkasuwiyang iya ripallaingngè untu' Allataala. 17 Jaji, nasaba massèddika sibawa Kristus Yèsus, naweddikka marasa battowa nyawaku ri jama-jamakku untu' Allataala. 18 Baranika mabbicara makkuwaro banna passalenna aga iya puraè napogau' Kristus naolaka untu' pancajiwi sining tau tenniyaè Yahudi mapato lao ri Allataala. Upogau'i iyaro sibawa ada-ada enrengngè pangkaukeng, 19 iya nasibawangngè gau'-gau' makalallaing sibawa gau'-gau' iya dè'è padanna; iya manennaro polèi ri akuwasanna Rohna Allataala. Karèba Madècèngngè passalenna Kristus pura manenni uwabbirittang lao ri risining tauwè, mappammulai ri Yèrusalèm lettu ri Ilirikum. 20 Cita-citaku iyanaritu mabbirittangngi Karèba Madècèng polè ri Allataala risining tau iya dè'èppa naengka naèngkalingai passalenna Kristus. Saba' dè' umaèlo patettong jamang ri pandamèng iya napalènne'è tau laingngè. 21 Ri laleng Kitta'è tarokii, "Sining tau iya dè'èppa naengka natarima karèba passalenna Alèna, naitai matu; sibawa iya dè'èppa naengka naèngkalingai, najeppuiwi matu. " 22 Iyanaro saba'na biyasaka tassangkalangeng untu' cèllèngiko. 23 Iyakiya makkekkuwangngè jama-jamakku ri daèra-daèraèro cappuni. Mattaut-taunni ittana macinnaka cèllèngiko. 24 Rèkko laloka matu ri kotamu ri laleng allalengekku lao ri Spanyol, mammènasaka wedding siruntu' saudara sibawa mariyo-riyo cinampe' sibawa iko. Purairo mammènasaka ri iko kuwammengngi weddingngi tabantuka untu' allalengekku lao ri Spanyolro. 25 Iyakiya makkekkuwangngèwè maèloka lao ri Yèrusalèm untu' tiwi bantuwang untu' umma'na Allataala kuwaro. 26 Saba' jema'-jema'è ri Makedonia sibawa Akhaya nasitujuini untu' mabbèrè sumbangeng lao ri Saudara-saudara iya kasiyasiè ri yelle'na umma'na Allataala ri Yèrusalèm. 27 Masennang atinna mennang pettuiwi untu' pogau'i iyaro. Mèmeng sitongenna sitinajai mennang tulungngi Saudara-saudara iya kasiyasiè ri Yèrusalèm, saba' polè risining tau Yahudiè ritu nasining tau tenniyaè Yahudiro purani natarima barakka-barakka polè ri Allataala. Jaji, sining tau tenniyaè Yahudiro sitinaja towi natulung sining tau Yahudiè sibawa barakka-barakka maddupa barab-barangngè. 28 Rèkko purani upattèppu jama-jamakkuè, sibawa mabbèrèyangngi lao ri mennanro iya engkaè ri Yèrusalèm sumbangeng iya pura ripaddeppungengngèro, maèloka joppa lao ri wanuwa Spanyol laloiwi kotamu. 29 Rèkko laoka ri iko, pasti polèka sibawa maèga barakka polè ri Kristus untu' iko. 30 Nasaba Puwatta Yèsus Kristus, sibawa nasaba pammasè iya nabbèrèyangngè Rohna Allataala, uwèllauwi sibawa masero ri iko, tennapodo maccowèko massempajang tonget-tongeng sibawakka lao ri Allataala untu' alèku. 31 Assempajanno kuwammengngi Allataala napaleppe'ka polè ri limanna sining tau iya dè'è namateppe' ri Yudèa, sibawa kuwammengngi na jama-jamakku untu' tiwii sumbangengngè ri Yèrusalèm natarimai sibawa masennang atinna umma'na Allataala kuwaro. 32 Rimakkuwannanaro, narèkko napuwèloi Allataala, weddikka lao ri iko sibawa ati iya masennangngè. Sibawa tassalèwoka matu ri tengnga-tengngamu. 33 Tennapodo Allataala, iya mabbèrè asalèwangeng ri rupa tauwè, sibawang manengngi Saudara. Aming.
