1 Tau iya dè'è namateppe' ri aga iya natepperiyè harusu'i ritarima sibawa madècèng ri yelle'na Saudara-saudara. Aja' muwassasa sibawa alèna passalenna sining pallolongenna. 2 Engka tau mappallolongeng makkedaè weddingngi naanrè agi-agi. Iyakiya engka tau laing iya malemmaè teppe'na; napèrasai makkedaè banna ukkaju-ukkaju bawang wedding naanrè. 3 Tau iya manrèèngngi agi-agi aja' naangga' mariyawai tau iya manrèèngngi banna anrèkanrè mattentuè bawang, aja'to napasalai tau iya manrèèngngi sini-sininnaè, saba' Allataala pura tarimai. 4 Niga Saudara angkanna Saudara harusu' madèlèkiwi atanna tau laingngè? Menruggi iyarè'ga tokkongngi iyaro ataè, iyanaritu urusanna puwanna. Na mèmeng iyaro ataè tettong lempui matu, nasaba naullèi Puwangngè patettong lempui. 5 Engka tau pèrasai sèddiè esso mattentuè lebbi pentingngi naiya esso-esso laingngè, na tau laingngè nangga tosi makkedaè iyaro essoè pada-pada muwa. Leppessangngi tungke'-tungke' tau pattentui pallolongenna. 6 Tau iya pentingkangngèngngi esso-esso mattentuè, iyaro tauwè napogau'i makkuwaèro untu' pakalebbii Puwangngè. Tau iya manrèèngngi sini-sininnaè, napogau'i makkuwaro untu' pakalebbii Puwangngè, nasaba sukkuru'i lao ri Allataala nasaba iyaro naanrè. Makkuwatoro sibawa tau iya manrèèngngi banna anrèkanrè mattentuè bawang; iyaro tauwè napakalebbi towi Puwangngè sibawa sukkuru' lao ri Allataala. 7 Dè' muwi sèddi tau ri idi iya tuwoè untu' alèna bawang; sibawa dè'to muwi sèddi tau polè ri idi iya matè untu' alèna bawang. 8 Rèkko tuwoki, tuwoki untu' Puwangngè. Sibawa rèkko matèki, matè tokki untu' Puwangngè. Jaji tuwo iyarè'ga matè, appunnangennaki Puwangngè. 9 Purani matè Kristus sibawa tuwo paimeng. Iyanaro saba'na nancaji Puwang untu' sining tau iya tuwoè sibawato untu' sining tau iya matèènna. 10 Jaji, Saudara-saudara! Untu' aga mupasalai saudaramu iya siyatepperengngè? Sibawa untu' aga muwangga' mariyawai? Idi manengngè mangoloki matu ri Allataala untu' riadèlèki. 11 Ri laleng Kitta'è tarokii, Makkedai Puwangngè, "Sitongenna, tungke'-tungke' tau suju'i matu massompa ri yolo-Ku; sibawa tungke' tau mangakui matu makkedaè Iyya'na ritu Allataala. " 12 Jaji tungke'-tungke'ki harusu' tanggung jawakiwi sininna pangkauketta lao ri Allataala. 13 Rimakkuwannanaro aja' tasisullè sipassala. Sibalè'na usahakangngi kuwammengngi dè' mupogau'i muwi sèuwa iya nassabariyè sèddiè Saudara siyatepperengngè rigoda sibawa madosa. 14 Nasaba iyya massèddika sibawa Puwang Yèsus, mateppe' senna'ka makkedaè dè' gaga muwi sèddi iya sitongennaè najisi'; iyakiya iyaro gau'è najisi'i lao risèddiè tau, rèkko iyaro tauwè nangga'i najisi'. 15 Iyakiya rèkko agi iya naanrè Saudara, sèddiè Saudara siyateppereng ripeddiriwi atinna, tentu Saudara dè'na nattinda' situru pammasè. Rèkko purani matè Kristus untu' sèddiè tau, aja' muleppessangngi iyaro tauwè risolangi ri aga iya muwanrè. 16 Iyanaro saba'na aja' muleppessangngi aga iya madècèngngè untu' Saudara, riyangga' dè' namakessing ri tau laingngè. 17 Saba' rèkko Allataala parèntai atuwonna rupa tauwè, aga iya weddingngè naanrè iyarè'ga naènung rupa tauwè, iyaro dè'na napenting. Iya pentingngè iyanaritu makkedaè rupa tauwè turusiwi èlona Allataala, napèneddingiwi atennangeng atiè sibawa tarimai ariyo-riyong iya nabbèrèyangngè Rohna Allataala. 18 Tau iya tumaningiyèngngi Kristus secara makkuwaro, iyaro tauwè napèsennangiwi atinna Allataala, sibawa riyangke'i risining tau laingngè. 19 Rimakkuwannanaro akkattata harusu'i tuli untu' gau'-gau' iya paompoè assipammasè-masèng sibawa sisullè sipètangngari. 20 Aja' nasaba soal inanrè, namusolangiwi aga iya puraè najama Allataala. Sininna anrèkanrè mèmeng hallala' untu' riyanrè; iyakiya rèkko aga iyaro naanrè Saudara nassabariwi tau laingngè madosa, tentu pasalai Saudara. 21 Lebbi kessing muwi aja' tanrè juku iyarè'ga mènung anggoro iyarè'ga pogau'i agi-agi rèkko iyaro gau'è nassabariwi sèddiè Saudara siyatepperetta mancajiwi madosa. 22 Leppessanni aga iya muwatepperiyèro, mupogau'i ri yolona Allataala bawang untu' alèna Saudara. Tau iya dè'è nappunnai alasang untu' marasa pasala iya nasengngè tongeng, iyaro tauwè masennangngi. 23 Iyakiya tau iya marasa bata-bataè untu' manrèi sèuwaè, nainappa paggangkanna nanrèi iyaro anrèkanrè, iyaro tauwè ripasalai ri Allataala; saba' iyaro tauwè dè' nattinda' situru atepperenna, passalenna aga iya tongengngè sibawa iya salaè. Na agi-agi iya ripogau'è dè' nasibawangngi ateppereng iyanaritu dosai.
