1 Tungke' tau harusu'i tunru' lao ri pamarèntaè, saba' dè'gaga pamarènta iya dè'è nalolongengngi akuwasanna polè ri Allataala. Na pamarènta iya engkaè makkekkuwangngèwè, napajoppai akuwasanna nasaba parènta polè ri Allataala. 2 Iyanaro saba'na tau iya mèwaèngngi pamarènta pada-padai mèwai aga iya pura napattentuè Allataala. Na tau iya pogau'èngngi makkuwaèro tarimai matu pahukkungeng. 3 Nasaba tau iya pogau'èngngi makessingngè dè' naparellu mètau ri pamarèntaè. Banna tau iya pogau'èngngi majaè bawang harusu' mètau. Rèkko macinnai Saudara kuwammengngi dè' namètau ri pamarèntaè, harusu'i Saudara pogau'i makessingngè, ripojiwi matu Saudara. 4 Saba' pamarèntaè iyanaritu atannai Allataala iya majjamaè untu' adècèngemmu. Iyakiya rèkko Saudara pogau'i majaè, mèmeng Saudara harusu'i mètau ri alèna, saba' dè' nasiya-siya bawang makuwasai untu' hukkungngi tauwè. Alèna iyanaritu atanna Allataala, iya pateppaèngngi pahukkungenna Allataala lao ri risining tau iya pogau'èngngi majaè. 5 Iyanaro saba'na Saudara naharusu' matinulu lao ri pamarèntaè -- tenniya bawang nasaba dè' namaèlo Saudara rihukkung, iyakiya nasaba sadda ati marilalemmu. 6 Iyanaro saba'na magi nakkamaja sima Saudara, nasaba pamarèntaè iyanaritu pegawènai Allataala iya pogau'èngngi jamang iya dè'è padanna. 7 Jaji wajani ri pamarèntaè aga iya harusu'è nawaja Saudara ri alèna. Wajai simaè, rèkko harusu'i Saudara makkamaja sima; sibawa wajai cukè rèkko harusu'i Saudara makkamaja cukè. Pakarajai mennang iya harusu'è ripakaraja sibawa pakalebbii mennang iya harusu'è ripakalebbi. 8 Aja' muwakkinreng muwi aga lao ri niga, sangadinna makkinreng pammasè lao risèddiè sibawa laingngè. Saba' tau iya mamasèiyèngngi pada-padanna rupa tau, purani naturusi sininna pamarèntana Allataala iya napalettu'è Musa. 9 Saba' hukkunna agama Yahudiè, iyanaritu: Aja' mumalaweng, aja muwabbuno; aja' muwènnau; aja' mumacinna mappunnaiwi aga nappunnai tau laingngè; iya manennaro silaongngi hukkung-hukkung iya laingngè, purani ririppeki mancaji sèddi hukkung bawang, iyanaritu, "Amasèiwi pada-padammu rupa tau pada-pada muwamasèinna alèmu. " 10 Tau iya mamasèiyèngngi tau laingngè, dè' namaèlo pogau'i majaè lao ri tauwèro. Jaji tau iya mamasèiyèngngi pada-padanna iyanaritu tau iya puraè turusiwi sininna sara'-sara'na hukkung agamaè. 11 Ri lainnaè iya manennaro muwisseng makkedaè iyaè wettuè iyanaritu wettummu untu' pèsedding polè ri tinroè. Saba' wettunnana untu' ripassalama'ki pèdè' macawè'ni makkekkuwangngèwè naiya wettutta bunge' nappa mammula mateppe'. 12 Mawè'ni labe' wenniè; nadè'na namaitta namatajang. Jaji, madècèngenni mappèsauki pogau'i pangkaukeng-pangkaukeng mapettangngè. Harusu'ki passakkekiwi alèta sibawa senjata tajang. 13 Harusu'ki pogau'i gau'-gau' malebbiè pada-pada biyasaè napogau' tauwè ri essoè; aja' muwappèsta talliwe'-liwe', iyarè'ga mabo'. Aja' mupogau'i iya ricellaè, iyarè'ga maja ampè-ampè. Aja' muwallaga, iyarè'ga mangèmpuru. 14 Leppessanni Puwang Yèsus Kristus pattentui aga iya harusu'è mupogau'. Sibawa aja' muturusiwi sipa-sipa tolino iya madosaè untu' turusiwi napessummu.
