1 Saudara-saudara! Makessing senna'i Allataala lao ri idi. Iyanaro saba'na uwèllauwi sibawa masero kuwammengngi muwakkasuwiyangengngi alèna selaku sèddi akkalarapangeng tuwo iya ripallaingngè untu' Allataala sibawa pèsennangiwi atin-Na. Assompako lao ri Allataala harusu'i makkuwaro. 2 Aja' muwaccowèriwi peraturang-peraturang linoèwè. Leppessanni Allataala mèbbui paribadimmu mancaji mabaru, kuwammengngi mutappinra. Rimakkuwannanaro mullèi missengngi èlona Allataala -- iyanaritu aga iya makessingngè sibawa iya sennangiyèngngi atin-Na sibawa iya sukkuè. 3 Allataala pura mabbèrè pammasè lao ri iyya. Iyanaro saba'na upangajari manengngi Saudara-saudara: Aja' muwasengngi alèmu lebbi matanrè naiya sitongennaè. Sitinajako mangke'i keadaammu sibawa ati mariyawa; tungke'-tungke' mangke'i alèna situru pakkullèng iya nabbèrèyangngè Allataala lao ri alèna nasaba mateppe'i lao ri Yèsus. 4 Watakkalèta mappunnaiwi maèga anggota. Tungke' anggota mappunnaiwi jamang. 5 Makkuwatoro sibawa idi. Namuni idi manengngè maègaki, iyakiya sinrupaki sèddiè watakkalè nasaba idi massèddiki ri Kristus. Sibawa tungke'-tungke'ki sisumpung sèddiè sibawa laingngè selaku anggota-anggota polè risèddiè watakkalè. 6 Tungke'-tungke'ki mappunnai wèrè attumaningeng iya laingngè. Iyaro sining wèrè nawèrèkki Allataala situru pammasè-Na. Rimakkuwannanaro harusu'ki pakèi iyaro sining wèrè. Tau iya mappunnaiyè wèrè untu' mabbirittangngi karèba polè ri Allataala, iyaro tauwè harusu'i mabbirittangngi iyaro karèba polè ri Allataala situru amampungeng iya engkaè ri alèna. 7 Tau iya mappunnaiyè wèrè untu' tulungngi tau laingngè, iyaro tauwè harusu'i mattonget-tongeng tulungngi tau laingngè. Tau iya mappunnaiyè wèrè untu' mappagguru, iyaro tauwè harusu'i tonget-tongeng mappagguru. 8 Tau iya mappunnaiyè wèrè untu' mpèrèngngi sumange' tau laingngè, iyaro tauwè harusu'i tonget-tongeng mpèrèngngi sumange' tau laingngè. Tau iya mappunnaiyè wèrè untu' mpèrèngngi tau laingngè aga iya nappunnaiyè, iyaro tauwè harusu'i napogau' iyaro sibawa malabo iya sitinajaè. Tau iya mappunnaiyè wèrè untu' mappimping, iyaro tauwè harusu'i tonget-tongeng mappimping. Tau iya mappunnaiyè wèrè untu' mappaitangngi paressè babuwaè lao ri tau laingngè, iyaro tauwè harusu'i napogau' sibawa masennang ati. 9 Mamasèno sibawa matinulu. Benciwi iya majaè, sibawa akkatenninno lao ri aga iya makessingngè. 10 Sitinajai Saudara-saudara siyamasèi sèddiè lao ri laingngè sibawa siyèlori pada-pada tau iya massilessurengngè ri laleng sèddiè kaluwarga, sibawa sitinajako sipoddiyoloi sipakaraja. 11 Ajjamano sibawa mapato. Aja' mumakuttu. Ajjamano untu' Puwangngè sibawa sumange' polè ri Rohna Allataala. 12 Sitinajai Saudara mammènasa lao ri Puwangngè sibawa marennu, sabbara'no ri laleng asussangngè, sibawa mattinetto massempajang. 13 Tulungngi paggenne'i apparelluwanna sining tau Kristèng laingngè enrengngè tarimai Saudara-saudara siatepperengngè iya dè'è muwissengngi, sibawa ati masennang ri lalempolamu. 14 Ellauwi ri Allataala kuwammengngi nabarakkakiwi sining tau iya mapèddaraè lao ri iko. Ellauwi Allataala barakkakiwi mennang, aja' mutanroiwi. 15 Accowèno marennu silaong sining tau iya marennuè, sibawa terino silaong mennang iya teriyè. 16 Tuwono sipammasè-masè sèddiè lao ri laingngè. Aja' mumatanrè ati, iyakiya pappada-padai alèmu sibawa tau iya mariyawaè. Aja' muwangga'i alèmu lebbi acca naiya sitongennaè. 17 Rèkko pogau'i ja tauwè lao ri iko, aja' muwale'i sibawa ja. Pogau'i aga iya nangga' makessingngè sininna tauwè. 18 Polè ri iko, akkuragano siullè-ullèmu untu' tuwo sidamè sibawa sininna tauwè. 19 Saudara-saudaraku! Aja' sises-siseng muwakkabale, leppessangngi Allataala pahukkung. Saba' ri laleng Kitta'è tarokii, "Iyya ritu makkabale'. Iyya maèlo hukkungngi, adanna Puwangngè. " 20 Sibalè'na, rèkko malupui balimmu, panrèi, sibawa rèkko madekkai, paènungngi. Nasaba ri laleng mupogau'na makkuwaèro, mupakasirii matu. 21 Aja' muleppessangngi alèmu ricau ri majaè, iyakiya sitinajai Saudara caui jaè sibawa adècèngeng.
