1 Makkutanaka: Puraniga nabbèyang Allataala umma' ri Alèna? Tentu dè'! Alèku paimeng sèddi tau Israèl wija-wijanna Abraham, sibawa polè ri suku Bènyamin. 2 Dè'! Dè' nabbèyangngi umma'na Allataala iya puraè Napilè mappammulai pammulanna. Naisseng Saudara-saudara aga taroki ri laleng Kitta'è passalenna Elia, wettunna napparapekeng passalenna Israèliè lao ri Allataala. Makkedai Elia, 3 "Puwang, sining tauwè purani nauno nabi-nabim-Mu sibawa nancuru'i sining onrong makkasuwiyangengngè akkarobangeng untu'-Mu. Iyya mani alè-alèku monro, namaèlo towi mennang mpunoka. " 4 Aga pappèbalinna Allataala lao ri Elia? Mappèbaliwi Allataala, "Purani Utarongeng alè-Ku pitussebbu tau. Dè'pa naengka mennang nassompa ri Dèwata Baal. " 5 Makkuwatoniro makkekkuwangngè: Engka cèddè iya puraè napilè Allataala nasaba pammasè-Na. 6 Napilèi mennang situru pammasè-Na sibawa tenniya situru pangkaukenna mennang. Saba' rèkko iyaro pappilèna Allataala siturui pangkaukenna tolinoè, tentu iyaro pammasèna Allataala tenniyana pammasè iya tongengngè. 7 Jaji, pèkkugi? Umma' Israèliè dè' nalolongengngi aga iya nasappaè mennang. Iya lolongengngèngngi banna sèddi golongang baiccu tau iya puraè napilè Allataala. Iya maneng laingngè mancajiwi matedde ati lao ri pangobbina Allataala. 8 Saba' ri laleng Kitta'è tarokii makkuwaè, "Allataala mèbbui atinna sibawa pikkiranna mancaji madonggo; nanarapi makkekkuwangngèwè matanna dè' naullèi makkita sibawa daucculinna dè' naullèi marèngkalinga. " 9 Makkeda towi Daud, "Leppessanni siya pèsta-pèstana mancaji jebba lao ri alèna mennang, sibawa mancaji kalebbong, onronna sempè sibawa ancuru! 10 Leppessanni siya pakkitanna mancaji mapettang kuwammengngi dè' naullèi mennang makkita; sibawa leppessanni siya mancaji bukku lettu mannennungeng. " 11 Makkutanasika: Wettunna mabuwang tau Yahudiè, kajajiyangngi iyaro kuwammengngi naancuru mennang? Dè' sises-siseng! Iyakiya nasaba madosai mennang, naripassalama' bangsa laingngè, nanassabariwi bangsa Yahudiè mangèmpuru lao ri bangsa laingngèro. 12 Nasaba pasalai bangsa Yahudiè sibawa dè' naturusiwi èlona Allataala, naribarakkaki bangsa-bangsa laingngè ri Allataala. Apalagi rèkko assisumpungenna bangsa Yahudiè sibawa Allataala madècèngngi paimeng; tentu lebbi battowa pasi barakka iya maèloè nabbèrèyang Allataala! 13 Iyakiya makkekkuwangngè madècèngengngi mabbicaraka lao ri Saudara-saudara iya tenniyaè Yahudi! Lettu makkekkuwangngè, selaku rasul untu' bangsa-bangsa iya tenniyaè Yahudi, upakaraja senna'i jama-jamakku. 14 Mammènasaka uwullèi paompoi angèmpurunna bangsaku, kuwammengngi nallalengiro uwullèi passalama'i sibagiyang polè ri mennang. 15 Nasaba risampèyangngi mennang ri Allataala, namadècèng paimeng assisumpungenna linoè sibawa Allataala; apalagi rèkko ritarimai mennang ri Allataala! Tentu iyaro pada muwi tau matè tuwosi paimeng! 16 Rèkko sipoloè roti mammulangngè purani riyabbèrèyang lao ri Allataala, bettuwanna sininna rotiè riyabbèrèyang towi lao ri Allataala. Sibawa rèkko ure'na ajuè iyanaritu appunnangennai Allataala, bettuwanna takkè-takkèna iyanaritu appunnangen-Nato. 17 Sibagiyang polè ri takkè-takkèna pong zaitungngè -- iyanaritu sining tau Yahudiè -- purai rirette. Na ri onrong addettekengngèro ricangko'kangngi takkè pong zaitun liyaè, iyanaritu Saudara-saudara tenniyaè Yahudi. Ricangko'kangngi Saudara kuwaro kuwammengngi napèneddingiwi Saudara sininna makessingngè polè ri atuwong atepperenna sining tau Yahudiè. 18 Rimakkuwannanaro, aja' muangga' èntèngngi mennang iya puraè rirette pada-pada takkèro. Harusu'ko mèngngerangngi makkedaè banna takkèko bawang. Na tenniya takkè mabbèrè anrè lao ri ure'è, sangadinna ure'è mabbèrè anrè lao ri takkè. 19 Iyakiya makkedai matu Saudara, "Iyyè, iyakiya iyaro takkè-takkè rirette'i kuwammengngi weddikka riyaccangkokeng ri ponna!" 20 Mèmeng tongeng iyaro. Iyakiya riyabbèyangngi mennang nasaba dè' namateppe' mennang, na Saudara ritarima nasaba mateppe'i Saudara. Jaji aja'na namatempo Saudara nasaba iyaro; sibalè'na harusu'i Saudara mètau. 21 Saba' rèkko Allataala dè' namarasa kasiyang untu' mabbèyangngi tau Yahudiè iya pada-padaè takkè-takkè tulèngngèro, aja' muwasengngi kasiyangngi matu untu' mabbèyangngi Saudara! 22 Jaji riitani kuwaè pèkkugi kessinna Allataala sibawa pèkkugi towi tedde'na. Matedde'i mattinda' lao ri mennang iya madosaè, iyakiya makessing atiè lao ri Saudara -- assaleng tette'i Saudara tuwo polè ri akessingen-Na. Rèkko dè', riyabbèrèyang towi Saudara. 23 Na passalenna sining tau Yahudièro, rèkko mappèsauwi mennang kèdo-kèdo dè' namateppe', ritarimai matu mennang paimeng; saba' makuwasai Allataala untu' tarimai mennang paimeng. 24 Saudara iya dè'è na assalenna polè ri bangsa Yahudiè iyanaritu pada-padai takkè polè ri zaitun liyaè. Rèkko Saudara, sièwai sibawa sipa'na Saudara, weddingngi riyaccangkokeng ri pong zaitun tulèngngè, apalagi sining tau Yahudi iya riyakkalarapangengngè sibawa takkè-takkè pong zaitun tulengngèro. Tentu lebbi gampangngi ri Allataala untu' palisui mennang ri pong zaitunna muto mennang. 25 Saudara-saudara! Uwèllauko aja' muwasengngi muwissenni sini-sininnaè. Saba' engka sèddi passaleng iya napuwèloè Allataala, iyakiya dè'pa naissengngi tauwè. Nauwèloriwi muwisseng; iyanaritu iyaè: Sibagiyang polè ri tau Yahudiè matedde atiwi, iyakiya attangenna mennanro matteru-terui matu banna lettu ri jumella sining tau Yahudi iya laowè ri Allataala genne'ni. 26 Makkuwaniro sininna tau Yahudiè salama'i matu. Saba' ri laleng Kitta'è tarokii makkuwaè, "Arung Pappassalama'è polèi matu ri Sion; naleddai matu sininna ja polè ri wija-wijanna Yakub. 27 Maèlo-Ka siyoi assijancingengngèwè sibawa mennang ri wettunna Uwaddampengengngi dosa-dosana. " 28 Nasaba tau Yahudiè dè' namaèlo tarimai Karèba Madècèng polè ri Allataala, mancajiwi mennang balinna Allataala; na mala iyaro mancajiwi amaupekeng lao ri Saudara-saudara iya tenniyaè Yahudi. Iyakiya nasaba pappilèna Allataala, na iyaro sining tau Yahudiè tette'i riyamasèi ri Allataala nasaba nènè-nènèna. 29 Saba' rèkko Allataala pilèi tauwè sibawa barakkakiwi iyaro tauwè, dè' naengka nagettengngi paimeng Allataala aga iya puraè Napogau'. 30 Riyolo dè' mumatinulu lao ri Allataala. Iyakiya makkekkuwangngè Allataala pura pannessai makkedaè leppe'ko polè ri asalangngè, nasaba dè' namatinulu sining tau Yahudiè. 31 Makkuwatoro sining tau Yahudièro. Makkekkuwangngèwè dè' namatinulu lao ri Allataala, kuwammengngi naripannessako leppe' polè ri asalangngè. Iyakiya matti mennang maèlo towi ripannessa leppe' polè ri asalangngè. 32 Saba' pura naleppessangngi Allataala sininna rupa tauwè rikuwasai ri atemmatinulurengngè, kuwammengngi Naullèi mappaitangngi paressè babuwana lao ri iya maneng mennang. 33 Masero senna' asugirenna Allataala! Battowa tongeng apanrèngen-Na sibawa pangissengen-Na! Nigana mullèi salidikiwi sining apettun-Na? Nigana mullèi majeppuiwi cara-carana majjama? 34 Ri laleng Kitta'è tarokii makkuwaè, "Nigana missengngi pikkiranna Puwangngè? Nigana mullèi pangajariwi? 35 Nigana pura mpèrèngngi sèuwa lao ri Puwangngè naweddingngi natuntu' pamale'-Na?" 36 Allataala pancajiwi sininna sèuwa-sèuwaè. Iya manenna assalenna polèi ri Allataala sibawa iyanaritu untu' Allataala. Ripojiwi Allataala lettu mannennungeng! Aming.
