1 Saudara-saudara! Muddani senna'ka kuwammengngi bangsaku ripassalama'i. Mattonget-tongekka massempajang lao ri Allataala untu' mennang. 2 Baranika powadai makkedaè massumange' senna'i mennang massompa lao ri Allataala. Iyakiya sumange'na mennanro dè' natettong ri pangissengeng polè ri Allataala. 3 Dè' naissengngi mennang carana Allataala mèbbui assisumpungenna tolinoè sibawa Alèna mancaji makessing paimeng. Sibawa nasaba maèloi mennang maccowèriwi cara alèna, nadè' natunru' mennang ri cara iya najello'è Allataala. 4 Hukkung agamaè purani narupai Kristus, angkanna tungke' tau iya mateppe'è lao ri Kristus, assisumpungenna sibawa Allataala mancaji makessingngi paimeng. 5 Naokii Musa makkedaè tau iya simadècèngengngè sibawa Allataala situru hukkung agamaè, iyaro tauwè tuwoi matu nasaba matinului lao ri hukkung agamaèro. 6 Iyakiya passalenna carana tauwè simadècèngeng sibawa Allataala situru atepperenna lao ri Allataala, napowadai Kitta'è makkedaè, "Aja' lalo namuwakkeda ri laleng atimmu, 'Nigana mènrè ri surugaè?' (bettuwanna tiwii Kristus nonno), 7 iyarè'ga, 'Nigana matu nonno ri linona tau matè?' (bettuwanna makkai Kristus mènrè polè ri amatèngngè). " 8 Akkatana iyanaritu makkuwaiyè, "Iyaro karèba polè ri Allataala macawè'è senna' ri iko; ri tèmummu sibawa ri laleng atimmu. " Iyanaro karèba iya riyappallebbangngè idi; karèba makkedaè harusu'i tauwè mateppe' lao ri Yèsus Kristus. 9 Saba' rèkko mangakui Saudara sibawa tèmunna makkedaè "Yèsus ritu Puwang", sibawa mateppe'i Saudara ri laleng atinna Saudara makkedaè Allataala pura patuwoi Yèsus polè ri amatèngngè, salama'i matu Saudara. 10 Nasaba mateppe'i tauwè sibawa atinna, angkanna Allataala tarimai selaku tau iya simadècèngengènna sibawa Allataala. Nasibawang tèmunna tauwè mangakui, angkanna ripassalama'. 11 Ri laleng Kitta'è tarokii, "Sininna tau iya mateppe'è dè' naripakacèlè. " 12 Iyaro kajajiyangngi lao ri sininna tauwè, saba' dè' gaga assilaingenna tau Yahudiè sibawa tau bangsa laingngè. Allataala iya sèddièro iyanaritu Puwang untu' sininna tauwè. Mabbèrèi barakka iya tabbollompollongngè lao ri sininna tauwè iya mèllauwè pattulung ri Alèna. 13 Ri laleng Kitta'è tarokii, "Sininna tauwè iya goraè mangobbi lao ri Puwangngè, salama'i matu. " 14 Iyakiya pèkkugiwi tauwè naullèi mangobbi lao ri Puwangngè rèkko dè'pa mennang namateppe'? Sibawa pèkkugiwi mennang naullèi mateppe' lao ri Puwangngè rèkko dè' mennang naèngkalingai passalenna Alèna? Makkuwatoro, pèkkugiwi mennang naullèi marèngkalinga passalenna Puwangngè, rèkko dè'gaga mabbirittangngi? 15 Sibawa pèkkugi tauwè naullèi tiwii iyaro karèbaè rèkko dè' mennang narisuro? Ri laleng Kitta'è tarokii makkuwaèwè, "Temmaka kessinna apolènna sining tau iya tiwiè Karèba Madècèng polè ri Allataala!" 16 Iyakiya dè' nasininna tauwè tarimai Karèba Madècèngngèro. Saba' makkedai Yèsaya, "Puwang, nigana mateppe' ri karèbatta?" 17 Iyanaro saba'na namancaji mateppe' sining tauwè nasaba naèngkalingai mennang karèbaè, na iyaro karèbaè naèngkalingai nasaba engka tau mabbirittangngi passalenna Kristus. 18 Iyakiya makkutanaka: Mèmegga mennang dè'pa naèngkalingai iyaro karèbaè? Tentu purani! Saba' ri laleng Kitta'è tarokii makkuwaè, "Mengngoni saddanna mennang ri sininna linoè, ada-adanna lettu'ni ri cappa'na linoè. " 19 Makkutanasika: Dè'paga naissengngi bangsa Israèliè? Leppessangngi siya iyaro pakkutanaè Musa bunge' baliwi. Makkedai Musa, "Makkuwaiyè adanna Allataala, 'Uwèbbuko matu mangèmpuru lao ri sèddiè bangsa iya tenniyaè umma' sibawa Uwèbbuko matu macai lao ri sèddiè bangsa iya madonggoè. ' " 20 Lebbi baranipasi Yèsaya. Makkedai, "Makkuwaniè adanna Allataala, 'Sining tau iya dè'è nasappa-Ka, naruntu'na; sibawa Uwappaitangngi alè-Ku lao ri mennang iya dè'è nakkutanangngi passalek-Ku. ' " 21 Iyakiya passalenna bangsa Israèliè makkedai Yèsaya, "Makkuwaniè adanna Allataala, 'Puppu esso Uloro'i limak-Ku lao ri risèddiè bangsa iya matedde atiè sibawa dè'è namatinulu. ' "
