1 Purairo uwitasi iyaro Ana' Bimbala'è reppa'i sègèlè' mammulangngè ri yelle'na iya pitu sègèlè'èro. Nainappa uwèngkalinga sèddi polè ri yelle'na iya eppa mahluèro makkeda, "Laono mai!" Iyaro oni saddanna pada-padai oni lettè. 2 Nauwakkita, nainappa paita sikaju anyarang putè. Tau iya tonangiyèngngi makkatenningngi sèddi pana, sibawa ri alèna riwèrèngngi sèddi passigera'. Majui selaku sèddi tau pakala iya laowè untu' pakala. 3 Nainappa iyaro Ana' Bimbala'è reppa'i sègèlè' iya maduwaè, nauwèngkalingai mahlu' iya maduwaè makkeda, "Laono mai!" 4 Nainappa sikaju anyarang iya laingngè massusi. Iyaro anyarangngè macella mabbara bulunna. Tau iya tonangiyèngngi riwèrèngngi akuwasang untu' pallennye'i keadaang damè polè ri linoè, kuwammengngi nasisullè siyuno rupa tauwè. Nariwèrènna sipeppa peddang iya battowaè. 5 Nainappa iyaro Ana' Bimbala'è reppa'i sègèlè' iya matelluè. Nauwèngkalingai mahlu' iya matelluè makkeda, "Laono mai!" Makkitana, napaita sikaju anyarang bolong. Tau iya tonangiyèngngi makkatenning sipasang dacing ri limanna. 6 Nauwèngkalinga sèuwa iya riyèngkalingaè pada-pada sadda iya goraè polè ri tengnga-tengngana iya eppa mahlu'èro. Iyaro saddaè makkedai, "Sibang gandong ellinna gaji siessoè, sibawa tellubbang gandong laingngè ellinna untu' gaji siessoètto. Iyakiya aja' musolangiwi poppong zaitungngè sibawa dare anggoro'è!" 7 Nainappa iyaro Ana' Bimbala'è reppa'i sègèlè' iya maeppaè. Nauwèngkalingai mahlu' iya maeppaè makkeda, "Laono mai!" 8 Makkitana, napaita sikaju anyarang iya makawiyaè. Tau iya tonangiyèngngi riyasengngi Amatèng. Polè ri munri, riyaccowèriwi macawè'-cawè' ri Linona Amatèngngè. Akuwasangngè ri tawa eppana linoèwè riyabbèrèyangngi lao ri mennang, kuwammengngi naullèi mabbuno naolai musuè, naolai wettu akkadèrengngè, naolai saiyè enrengngè naolai olokolo' masekkangngè. 9 Purairo iyaro Ana' Bimbala'è reppa'i sègèlè' iya malimaè. Nauwitai ri yawana mèzbaè engka nyawa-nyawa tau iya matè riyuno nasaba napèwatangiwi mennang paseng polè ri Allataala naolai asabbiyanna mennang. 10 Gorani mennang sibawa sadda iya battowaè, "Oh Puwang Pommakuwasaè, iya mapaccingngè sibawa tongengngè! Siyagapi ittana nappa-Ko madèlèkiwi pabbanuwana linoè enrengngè hukkungngi mennang nasaba purani naunoki?" 11 Tungke'-tungke' mennang riwèrèngngi silampa waju iya maputè. Nainappa risuro mennang mappèsau cinampe'si, narapi sukkuni jumellana sellao-sellao seperjuwanganna enrengngè saudara-saudarana mennang iya maèloè riyuno pada-pada mennang. 12 Nainappa uwita iyaro Ana' Bimbala'è reppa'i sègèlè' iya maennengngè. Kajajiyanni mpèwang tanaè iya maseroè. Mancaji malotonni mata essoè pada-pada kaing lotong iya makassara'è, enrengngè kètengngè mancaji macella pada-pada daraè. 13 Madduttungeng sining wèttowingngè polè ri langiè nonno ri linoè pada-pada buwa ara iya dè'è namatasa madduttung polè ri ponna ri wettunna rigottang ri anginrajaè. 14 Teddèngngi matu langiè pada-pada karettasa' rilulungngè enrengngè sininna buluè sibawa puloè ripaèsu' polè ri onronna. 15 Nainappa sining arung ri linoè, sining tomarajaè, pallima-pallimaè, sining tau sugiè enrengngè sining tau makuwasaè, kuwaèttopa sining tau laingngè, muwi ata iyarè'ga tau maradèka', iya manenna subbui alèna ri laleng gowa-gowaè enrengngè ri selle'-selle'na batu buluè. 16 Lao risining buluè sibawa batuèro, gorai mennang, "Geppaki! Subbuki polè ri pakkitanna Alèna iya tudangngè ri yasè'na kadèra arajangngè, enrengngè polè ri caina Ana' Bimbala'èro! 17 Polèni esso maseroè, makkekkuwangngè nabollowanni mennang caina, nadè' muwi sèddi tau mullèi tahang ri yolona mennang!"
