1 Nainappa uwita sèuwa kitta lulung ri limanna Alèna iya tudangngè ri kadèra arajangngèro. Iyaro kitta'è penno sibawa oki wali-wali enrengngè ri materèi sibawa pitu sègèlè'. 2 Nainappa uwita sèddi malaèka' iya mawatangngè, gora-gora sibawa sadda iya maloppoè, "Niga sipato' reppa'i iyaè sining sègèlè'è enrengngè timpa'i iyaè kitta'è?" 3 Iyakiya muwi ri surugaè iyarè'ga ri linoè iyarè'ga muwi ri yawana linoè dè'to gaga sèddi tau ri lolongeng iya mullèèngngi timpa'i iyaro kitta'è, enrengngè makkita ri lalenna. 4 Nauterina tassènge'-sènge' saba' dè'gaga muwi sèddi tau iya sipato'è timpa'i iyaro kitta'è, enrengngè makkita ri lalenna. 5 Nainappa sala sèddinna polè risining pamimpingngèro makkeda lao ri iyya, "Aja' muteri! Itai! Singa polè ri suku bangsa Yèhuda, wijanna Daud iya battowaè, pakalani. Naullèi reppo'i pitu sègèlè' enrengngè timpa'i iyaro kitta'è. " 6 Nainappa uwita sèddi Ana' Bimbala' tettong ri tengnga-tengngana kadèra arajangngèro, riyattulilingi ri iya eppa mahlu'è enrengngè sininna pamimpingngèro. Iyaro Ana' Bimbala'è samanna purani rigèrè. Mappunnaiwi pitu tanru' sibawa pitu mata: iyanaritu pitu roh polè ri Allataala iya puraè risuro lao ri sininna linoè. 7 Nainappa malluru iyaro Ana' Bimbala'è sibawa malai iyaro kitta lulungngè polè ri lima ataunna tau iya tudangngè ri yasè'na kadèra arajangngè. 8 Ri wettu kèdo makkuwannaro iyaro Ana' Bimbala'è, tassulunni iya eppa mahlu'è enrengngè iya duwappulo eppa pamimpingngèro ri yolona. Tungke'-tungke' mennang makkatenning kacapi enrengngè mangko' ulaweng iya mallise'è kamennyang, iyanaritu sining paddowangenna umma'na Allataala. 9 Napuwèlonni mennang sèddi èlong iya baruè: "Sipato'-Ko malai iyaro kitta'è enrengngè reppa'i sining sègèlè'na. Saba' pura-No riyuno, nanallalengiwi amatèn-Na, rupa tauwè polè ri sininna sukuè, basaè, wanuwaè enrengngè bangsaè purani muwelli untu' Allataala. 10 Purani mupancaji mennang sèuwa bangsa imang-ngimang iya ripallaingngè, kuwammengngi natumaniwi Allataalata, enrengngè mapparènta ri yasè'na linoè. " 11 Nainappa makkitasika. Uwèngkalingasi sadda malaèka' iya massebbu-sebbuè enrengngè majjuta-jutaè ègana! Tettongngi mennang mattulilingiwi kadèra arajangngè sibawa iya eppa mahlu'è enrengngè sining pamimpingngèro. 12 Namakkèlong mennang sibawa sadda battowa, "Iyaro Ana' Bimbala' iya puraènna rigèrè, sitinajai tarima akuwasang asugireng, apanrèng sibawa awatangeng; sitinajai ripakalebbi, ripakaraja enrengngè ripoji-poji!" 13 Nainappa uwèngkalinga sininna mahlu'è ri langiè, ri linoè, ri yawana linoè enrengngè ri laleng tasi'è -- rippe'na sininna mahlu'è ri lalenna alangngèwè -- makkèlong, "Alèna iya tudangngè ri yasè'na kadèra arajangngè, sibawa Ana' Bimbala'èro, iyanaritu iya ripoji-pojiyè enrengngè ripakalebbiè kuwaèttopa maraja nenniya makuwasa untu' mannennungeng!" 14 Nappèbalina iya eppa mahlu'èro, "Aming!" Sibawa iyaro sining pamimpingngè tassulung toni sibawa massompa.
