1 Nainappa uwita langi iya baruè sibawa lino iya baruè. Langi mammulangngè sibawa lino mammulangngè teddèng toni, enrengngè lennye'ni tasi'è. 2 Nauwitani iyaro kota mapaccingngè, iyanaritu Yèrusalèm iya mabaruè, nonno polè ri Allataala. Iyaro kotaè purani ripassadiya pada-pada sèddiè botting makkunrai iya ribèlo-bèloiyè untu' duppaiwi bottimpuranè. 3 Nainappa uwèngkalinga sadda polè ri kadèra arajangngèro gora sibawa maloppo, "Makkekkuwangngè onronna Allataala iyanaritu silaongngi tolinoè! Tuwoi matu sibawa mennang, nancaji matu mennang umma'-Na. Alèna Allataala sionrong matu sibawa mennang enrengngè namancaji Allataalana mennang. 4 Nasussui matu sininna uwai mata polè ri matanna. Dè'na gaga matu amatèng; atassinnaureng, teri, iyarè'ga muwi lasa dè'tona gaga. Gau'-gau' iya malaungngè lennye'ni. " 5 Nainappa Alèna iya tudangngè ri yasè'na iyaro kadèra arajangngè makkeda, "Makkekkuwangngè Uwèbbuni sininna mabaru!" Makkeda towi lao ri iyya, "Okii iyaè, saba' iyaè sining ada-adaèwè tongengngi sibawa weddingngi riyatepperi. " 6 Nainappa makkeda, "Tèpuni! Iyya'na ritu mammulang sibawa paccappureng; Iyya'naè Puwang polè ri Pammulanna lettu ri Paccappurenna. Tungke' tau iya madekkaè, Upaènungngi matu cuma-cuma polè ri mata uwai iya mabbèrè atuwong. 7 Tau iya pakalaè natarimai matu iyaro gau'-gau'è polè ri Iyya. Mancaji-Ka matu Allataalana, na alèna matu mancaji ana'-Ku. 8 Iyakiya tau pellorengngè, tau bali'bellaè, tau maja ampè, tau pabbunoè, pappangaddiè, tau iya pakè paddissengeng mappalennye'-lennye'è, passompa barahalaè, sibawa sininna pabbellèngngè, ribuwangngi matu ri laleng tasi apiè sibawa balèrangngè iya malluwa'-luwa'è, iyanaritu amatèng maduwaè. " 9 Sèddi polè ri iya pitu malaèka' iya puraè makkatenningngi sining onrong iya pennoè sibawa iya pitu abala paccappurengngèro laoni ri iyya sibawa makkeda, "Laono mai! Maèloka jellokekko Bottingngè, iyanaritu bainèna Ana' Bimbala'è. " 10 Nanakuwasaina Rohna Allataala, sibawa iyaro malaèka'è natiwika ri coppo'na bulu iya matanrè senna'è. Najellokenna Yèrusalèm, kota mapaccingngèro. Iyaro kotaè nonnoi polè ri surugaè, polè ri Allataala, 11 sibawa mattappa enrengngè arajanna Allataala. Iyaro kotaè millakkillang pada-pada batu paramataè, pada-pada batu baiduri pandangngè iya macinnongngè pada-pada kacaè. 12 Tèmbo' iya mattulilingiyèngngi matanrèi na battowa, sibawa seppulo duwa pintu gerbanna, enrengngè rijagaiwi ri seppulo duwa malaèka'. Risining pintu gerbanna tarokii aseng-ngasenna seppulo duwa suku bangsa Israèliè. 13 Engka tellu pintu gerbang iya mangoloè ri tungke' sulapa': tellu ri alau, tellu ri yattang, tellu ri manorang sibawa tellu ri yajang. 14 Iyaro tèmbo'na kotaè ripatettongngi ri yasè'na seppulo duwa batu pandamèng. Ri batu-batu pandamèngngèro riyokii aseng-ngasenna seppulo duwa rasulna Ana' Bimbala'èro. 15 Malaèka' iya mabbicaraè sibawa iyya'ro mappunnaiwi tekkeng pangukkuru' polè ri ulawengngè, untu' mukkuru'i iyaro kotaè, pintu-pintu gerbanna sibawa tèmbo'na. 16 Iyaro kotaè massulapa eppai -- padai lampèna sibawa sakkana. Na iyaro malaèka'è naukkuru'ni iyaro kotaè sibawa tekkeng pangukkuru'na; na lampèna 2400 kilo; sakka sibawa tanrèna padai lampèna. 17 Wettunna iyaro malaèka'è mukkuru'i tèmbo'na, tanrèna iyaro tèmbo'na enneng pulona mètèrè. Ukkurang iya napakè iyaro malaèka'è iyanaritu ukkurang iya napakè tolinoè. 18 Iyaro tèmbo'na kotaè riyèbbui polè ri batu baiduri pandangngè, na kotana polèi ri ulaweng tulèngngè, macinnong pada-pada kacaè. 19 Iyaro batu-batu pandamènna kotaèro ribèlo-bèloiwi sibawa sininna rupanna batu paramataè. Batu pandamèng iya mammulangngè riyèbbui polè ri batu baiduri pandangngè, iya maduwaè polèi ri batu nilangngè, matelluè polèi ri batu yaku'è, maeppaè polèi ri batu zamrud-è, 20 malimaè polèi ri batu baiduri sèpa'è, maennengngè polèi ri batu dalimaè, mapituè polèi ri batu ratna cempakaè, maaruwaè polèi ri batu pirus-è, maasèraè polèi ri batu topas-è, maseppuloè polèi ri batu krisopras-è, maseppuloè sèddi polèi ri batu lazuwardiè, sibawa maseppuloè duwa polèi ri batu kecubungngè. 21 Iya seppulo duwa pintu gerbanna polèi riseppulo duwa mutiyara, tungke'-tungke' sumpanna riyèbbui polè risèddi mutiyara. Watattanana iyaro kotaè riyèbbui polè ri ulaweng tulèngngè, macinnong pada-pada kaca iya lala'-lala'è. 22 Dè' uwitai Bolana Allataala ri laleng kotaèro, saba' Bolana Allataalana iyanaritu alèna Puwangngè, Allataala Iya Pommakuwasaè, sibawa iyaro Ana' Bimbala'è. 23 Iyaro kotaè dè' naparellu ritappari mata esso iyarè'ga kèteng, saba' arajanna Allataala tappariwi, sibawa iyaro Ana' Bimbala'è iyanaritu lampunna. 24 Joppai matu bangsa-bangsaè ri linoè ri laleng cahayana, sibawa sining arungngè natiwi towi matu asugirenna mennang ri laleng kotaèro. 25 Iyaro sining pintu gerbanna kotaèro tattimpa'i matu puppu esso; dè' naritongko, saba' dè'gaga wenni kuwaro. 26 Arajanna sibawa asugirenna bangsa-bangsaè ritiwii matu ri laleng kotaèro. 27 Iyakiya sining tau iya pogau'èngngi gau'-gau' iya mappakaciddi-ciddi'è iyarè'ga tau iya mabbellè -- rippe'na agi-agi iya najisi'è, dè' sises-siseng nauttama ri lalenna. Iya muttama'è matu banna sining tau iya asennaè taroki ri laleng Kitta'na Tau Tuwoè, kitta'na Ana' Bimbala'èro.
