1 Purairo uwitani sèddi malaèka' nonno polè ri surugaè. Ri limanna nakkatenningngi goncinna balorang amatèngngè sibawa sèddi balenggu iya battowaè. 2 Nainappa natikkeng iyaro nagaè, ula macowaè -- iyanaritu Ibillisi'è iyarè'ga Roh Majaè -- sibawa balenggui untu' sisebbu taung ittana. 3 Nainappa iyaro malaèka'è nabuwang iyaro nagaè ri laleng balorang amatèngngè, nainappa nagoncing iyaro peppingngè sibawa nasègèlè', kuwammengngi iyaro nagaè dè'na naullèi bengnguwangngi bangsa-bangsaè sisebbu taung ittana, riwettu dè'napa nacappu. Purairo harusu'i rileppessang untu' wettu iya dè'è namaitta. 4 Nainappa uwita sining kadèra akkarungengngè, sibawa sining tau iya tudangngè risining kadèra arajangngèro riwèrèng kuwasa untu' pettuiwi pahukkungengngè. Uwita towi sining nyawana tau iya puraè rirette ulunna nasaba mabbèrèi mennang asabbiyang passalenna Yèsus, sibawa mappallebbangengngi paseng polè ri Allataala. Iyaro sining tauwè dè' nasompai olokolo'è, iyarè'ga dato'-dato'na. Dè'to mennang naengka natarima tanranna iyaro olokolo'è ri linrona iyarè'ga ri limanna. Natuwona mennang paimeng sibawa mapparènta selaku arung silaong Kristus sisebbu taung ittana. 5 Iyanaè pammulanna ripaoto'na sining tau matè. (Iyakiya sining tau matè laingngè dè' naripatuwo paimeng ri wettu sisebbuè taung ittanaro. ) 6 Masennangngi sining tau iya maccowèè ripaoto' ri pammulannaro. Ritarimai mennang mancaji appunnangenna Allataala. Amatèng maduwaè dè'na namakuwasa lao ri mennang. Mancajiwi matu mennang imang-ngimanna Allataala, sibawa imang-ngimanna Kristus; enrengngè mapparèntai matu mennang silaong Alèna sisebbu taung ittana. 7 Cappunana wettu sisebbuè taunro, rileppessangngi matu Ibillisi' polè ri tarungkuè, 8 nalaona matu bengnguwangngi bangsa-bangsaè iya tassiyaè ri sininna linoè, iyanaritu Gog sibawa Magog. Ibillisi' paddeppungengngi mennang untu' mammusu, sèuwa jumella iya battowa senna'è, singngèga kessi'è ri tasi'è. 9 Natassiyana mennang lao ri sininna linoè, nainappa nakeppung akkèmangenna umma'na Allataala sibawa kota iya Namasèiyè Allataala. Iyakiya nonnoi apiè polè ri langiè nanapaccappui mennang. 10 Nainappa Ibillisi' iya bengnguwangngèngngi mennanro, riyaggenrungengngi muttama ri tasi apiè sibawa balèrangngè. Kuwaniro onronna olokolo'è sibawa nabi palsuèro ribuwang lebbi riyolo. Risissai matu mennang esso wenni lettu mannennungeng. 11 Purairo uwitani sèuwa kadèra arajang putè iya battowaè sibawa Alèna iya tudangngè ri yasè'na. Lennye'i langiè sibawa linoè polè ri yolo-Na, angkanna dè'na napaitana. 12 Sibawa uwitai sining tau matè, baiccu battowa, tettong ri yolona kadèra arajangngèro. Naritimpa'na sining kitta'è. Nainappa sèddi kitta laingngè ritimpa, iyanaritu Kitta'na Tau Tuwoè. Nainappa ripatatteppa pahukkungengngè ri yasè'na sining tau matè, situru pangkaukenna mennang iya riyokiè ri laleng sining kitta'èro. 13 Nainappa nabbèrèyang tasi'è sining tau matè iya engkaè ri lalenna. Amatèngngè sibawa Linona Amatèngngè nabbèrèyang toni sining tau matè iya engkaè ri alèna. Na iyaro sining tau matè ripateppai manenni pahukkungeng situruè pangkaukenna. 14 Nainappa Amatèngngè sibawa Linona Amatèngngè riyaggenrungeng ri laleng tasi apiè. (Iyaè tasi apiè iyanaritu amatèng maduwaè. ) 15 Sining tau iya dè'è nariyoki asenna ri laleng Kitta'na Tau Tuwoè, iyaro sining tauwè ribuwangngi ri laleng tasi apiè.
