1 Purairo uwèngkalingani sèuwa sadda iya pada-padaè sadda merunna tau maègaè polè ri surugaè iya gora-goraè, "Pojiwi Allataala! Allataalata iyanaritu Allataala iya mappassalama'è; Allataala iya marajaè sibawa makuwasaè! 2 Adèlè'i pangadèlèken-Na sibawa mapanrèi! Purani napatakkenna pahukkungengngè ri yasè'na cakkuribang iya battowaè, iya solangiyèngngi linoè sibawa appangaddinna. Allataala pura hukkungngi iyaro cakkuribangngè, saba' naunoi ata-atanna Allataala. " 3 Nainappa iyaro saddanna tau maègaè gorasi, "Pojiwi Allataala! Rumpunna api iya mangurengngengngi kota battowaèro maddumpuni matu dè' nappèsau!" 4 Na iya duwappulo eppa pamimpingngè sibawa iya eppa mahlu' iya mattulilingiyèngngi kadèra arajangngèro tassulunni sibawa sompai Allataala iya tudangngè ri yasè'na kadèra arajangngè. Makkedai mennang, "Aming! Pojiwi Allataala!" 5 Nainappa riyèngkalingani polè ri kadèra arajangngèro oni sadda iya makkedaè, "Pojiwi Allataala, èh sininna atanna Allataala, sibawa sininna tauwè -- baiccu battowa -- iya sompaèngngi Allataala!" 6 Purairo uwèngkalingani sèuwa pada-pada sadda sikonrong tau iya maèga senna'è; oninna pada-pada bombang iya mangappo'è sibawa pada-pada guttu iya maddalenrungngè. Uwèngkalingai mennang makkeda, "Pojiwi Allataala! Saba' Puwang, Allataalata Iya Pommakuwasaèro mapparèntani makkekkuwangngè! 7 Laono mai tamariyo-riyo sibawa marennu; laono mai tapojiwi arajan-Na! Saba' narapini esso abottingenna iyaro Ana' Bimbala'è, sibawa bottin-Na sadiyani untu' akawingen-Na. 8 Purani riwèrèng pakèyang lènang iya lala'-lala'è untu' napakè. " (Iyaro pakèyang lènangngè iyanaritu sining pangkaukeng makessingngè iya napogau'è umma'na Allataala. ) 9 Nainappa makkeda iyaro malaèka'è lao ri iyya, "Okii iyaè: 'Masennangngi tau iya riundangngè lao ri pèsta akawingenna iyaro Ana' Bimbala'è. ' " Nainappa iyaro malaèka'è tambai towi, "Iyanaè biritta tongeng polè ri Allataala. " 10 Tassulunna ri yolona iyaro malaèka'è maèlo sompai, iyakiya makkedai lao ri iyya, "Aja'! Aja' musompaka, sompai Allataala! Saba' iyya atato pada-pada iko enrengngè pada-pada sininna saudaramu iya makkatenning masse'è ri asabbiyanna Yèsus!" Saba' asabbiyanna Yèsusnaro iya panurungengngèngngi tau iya mabbotoè. 11 Nainappa uwita tattimpa surugaè, nainappa paita sikaju anyarang putè. Pakkinnyaran-Na riyasengngi Iya Matinuluè sibawa Iya Tongengngè. Adèlè'i ri laleng pettuiwi pahukkungengngè sibawa ri laleng musu iya Napogau'è. 12 Matan-Na pada-pada luwa' apiè sibawa ri ulun-Na pakèi maèga passigera'. Ri Alèna tarokii sèuwa aseng; na banna Alèna bawang missengngi iyaro asengngè. 13 Jumba iya Napakè purani riremmè ri laleng daraè. Sibawa riyasengngi "Saddanna Allataala". 14 Tentarana surugaè maccowèriwi sibawa makkinnyarangiwi sining anyarang putè, sibawa mappakèyang lènang iya maputè mapaccingngè. 15 Polè ri bawa-Na massui sipeppa peddang iya matarengngè nasibawang iyaro peddangngè nacaui matu bangsa-bangsaè, sibawa mapparèntai matu mennang sibawa tekkeng bessi. Napara'i matu anggoro'è ri laleng apparakeng anggoro caina Allataala Iya Pommakuwasaè. 16 Ri jumbana sibawa ri poppan-Na tarokii asengngèwè, "Arunna sininna arungngè, sibawa Puwanna sininna puwangngè. " 17 Nainappa uwita sèddi malaèka' tettong ri yasè'na matanna essoè. Nasibawang sadda iya battowaè gorai lao ri sininna manu'-manu' iya luttuè ri yelle'è, "Laono mai maddeppungeng untu' hadèrèkiwi pèsta battowaè iya naramè-ramèiyè Allataala! 18 Laono mai manrèi jukuna sining arungngè, jukuna sining pallimaè, sibawa jukuna sining pahlawangngè; laono mai manrèi jukuna sining pakkinnyarang anyarangngè sibawa jukuna sining anyaranna enrengngè jukuna sininna rupa tauwè, battowa sibawa baiccu, ata sibawa tau maradèka'!" 19 Nainappa uwita iyaro olokolo'è, sibawa sining arung linoè enrengngè tentarana mennang, maddeppungengngi untu' mammusu mèwai iya tonangiyèngngi anyarang putèro sibawa tentara-Na. 20 Na iyaro olokolo'è ritikkenni silaong nabi palsuè iya mèbbuèngngi sining anu makalallaingngè ri yolona olokolo'èro. (Nasibawang sining anu makalallaingngèro iyaro olokolo'è bengnguwangngi sining tau iya mappunnaiyè tanrang olokolo'èro, sibawa sining tau iya sompaèngngi dato'-dato'na olokolo'èro. ) Nainappa iyaro olokolo'è sibawa nabi palsuèro riyabbèyang tuwo-tuwo ri laleng tasi apiè iya malluwa'-luwa'è sibawa balèrang. 21 Sibawa riyunoi tentarana sibawa peddang iya massuè polè ri bawana pakkinnyarang anyarang putèro. Napolè tona sining manu'-manu'è manrèi sibawa mallaku-laku jukuna mennang iya riyunoèro.
