1 Purairo uwitani sèddi malaèka' laing nonno polè ri surugaè. Mappunnaiwi akuwasang iya battowaè, sibawa tappana mèbbui sininna linoèwè mancaji macakka. 2 Nasibawang sadda iya battowaè, gorai, "Sempè'ni! Sempè'ni Babèl battowaè! Makkekkuwangngè mancajini onronna sining sètangngè sibawa sining roh majaè. Ri lalenna tuwoi sininna rupanna manu'-manu' iya najisi'è sibawa iya nacèccè tauwè. 3 Saba' sininna bangsaè purani naènung anggoro napessu appangaddinna. Sining arunna linoè siappangaddingngi, sibawa sining padangkangngè ri linoè mancaji sugii polè ri napessunna iya dè'è narikuwasairo. " 4 Nainappa uwèngkalinga sadda laing polè ri surugaè makkeda, "Massuno umma'-Ku! Massuno polè ri lalenna! Aja' muwaccowèriwi dosa-dosana, sibawa maccowè tanggungngi pahukkungenna! 5 Saba' sitenre-tenre'ni dosana lettu ri langiè, sibawa naèngngerangngi Allataala jana matu. 6 Gaukenni pada-pada pura nagaukekko; wale'ni leppe' wèkkaduwa untu' iya maneng iya puraè napogau'. Lisekiwi mangko'na sibawa ènungeng iya wèkkaduwaè lebbi maseriè naiya ènungeng iya napassadiyangengngèkko. 7 Wèrèngngi anrasa-rasang sibawa saraninnawa iya padaè ègana sibawa arajangngè sibawa asugireng iya nabbèrèyangngè lao ri alèna muto. Saba' tuli makkedai bawang lao ri alèna, 'Iyya'naè arung makkunrai iya mapparèntaè! Tenniyaka janda; dè' upèneddingiwi matu atassinnaurengngè!' 8 Nasaba gau'èro, na ri laleng si esso bawang nanakennai matu abala -- lasa, atassinnaureng, sibawa akkadèreng. Enrengngè riyangurenngi matu sibawa api, saba' Puwang Allataala iya madèlèkiyèngngiro makuwasa senna'i. " 9 Sining arung linoè iya maccowèè ri laleng sining pangkaukeng appangaddingngè sibawa napessunna makkuwaèro nateringiwi matu sibawa nawatingiwi kotaèro rèkko naitai mennang mallaso rumpuè polè ri api iya paangurengngè. 10 Tettongngi matu mennang polè mabèla saba' mètaui mennang nakenna anrasa-rasanna. Makkedai mennang, "Aduh, tenniya culè-culè acilakanna kota iya tassebbo'èwè -- kota Babèl iya mawatangngè! Ri laleng sijang bawang purani ripajoppa pahukkungemmu!" 11 Sining padangkang ri linoè teri towi sibawa mabbaratai nasaba makkunraièro, saba' dè'na muwi sèddi tau iya melliyèngngi barab-barang dangkangenna. 12 Dè'gaga melli ulaweng, pèra', paramata, enrengngè mutiyarana; makkuwatoro kaing lènang, kaing colli pao, sabbè, sibawa kaing cella cowa; sininna rupanna aju iya majarangngè rilolongeng, barab-barang polè ri gadingngè enrengngè polè ri aju iya masuliè, polè ri tembagaè, bessiè, sibawa puwalangngè; 13 oli aju cenning, rampa-rampa, setanggi, mur sibawa kamennyang; anggoro sibawa minnya, labbu sibawa gandong; saping sibawa bimbala', anyarang sibawa karèta, ata-ata, mala muwi nyawa tolino. 14 Makkeda sining padangkangngè lao ri makkunraièro, "Sininna iya muwacinnaiyè muwappunnai, dè'na gagana, sibawa sininna asugirengngè sibawa ammingkikengngè teddènni. Dè'na mulolongenni paimeng!" 15 Sining padangkang iya sugiènna nasaba dangkangngi ri kotaèro tettongngi matu polè mabèla, saba' mètaui mennang nakenna anrasa-rasanna. Teriwi matu mennang sibawa mabbarata, 16 nainappa makkeda, "Aduh, tenniya pato acilakanna kota iya tassebbo'èwè! Biyasana pakèi pakèyang lènang, kaing colli pao sibawa kaing cella cowa; biyasana pennoi sibawa parèwa ulaweng, paramata, sibawa mutiyara! 17 Iyakiya ri laleng sijang bawang, ateddèngenni sininna asugirennaro!" Sininna nakodaè, lurengngè, sibawa ana' kappala'è enrengngè sininna tauwè iya assappa-sapparennaè ri tasi'è, tettongngi polè mabèla. 18 Sibawa gora ri wettunna mennang naita rumpuè maddumpu polè ri apiè iya tunuèngngi kotaèro. Gorani mennang, "Dè' naengka kota laingngè pada-pada kota iya battowaèwè!" 19 Nanassiyamporenna mennang awu ri ulunna selaku tanrang mabbarata, nainappa teri sibawa kelli-kelli, "Aduh, tenniya pato acilakanna kota iya battowaèwè! Asugirenna pura mèbbui sininna tauwè iya mappunnaiyè kappala-kappala ri tasi'è mancaji sugi! Iyakiya ri laleng sijang bawang, ateddèngenni sini-sininnaè. " 20 Eh suruga, akkèrennuno nasaba ancurukenna kotaèro! Eh umma' Allataala, rasul-rasul sibawa nabi-nabi, akkèrennuno! Saba' Allataala pura hukkungngi selaku pamale'na aga iya puraè napogau' lao ri iko! 21 Purairo, sèddi malaèka' iya porè makka sèddi batu -- silloppo batu allèlurengngè iya battowaè -- nainappa naggenrungeng ri lalenna tasi'è sibawa makkeda, "Makkuwaniyè carana kota Babèl iya tassebbo'èro maèlo riyaggenrungeng sibawa masero, angkanna dè'na nariruntu paimeng. 22 Oninna oni-oniè polè ri pakkacapiè, polè risining pakkèlongngè, polè ri passulingngè sibawa polè ripasseppung tarompè'è, dè'na nariyèngkalinga matu ri lalemmu! Dè' tona matu sèddi tau pajjama-jama mapanrè kuwaro, sibawa oni batu allèlurengngè dè'na nariyèngkalinga matu. 23 Dè'na naitai matu tauwè tappa lampuè ri lalemmu; sibawa dè'tona matu nariyèngkalinga arowaseng pèsta abottingengngè kuwaro. Sining padangkammu iyanaritu sining tau iya kaminang mariyoloè ri linoè, sibawa nasibawang sining pangissengeng mappalennye'-lennye'è nabengnguwangngi sininna bangsaè ri linoè!" 24 Rihukkungngi Babèl saba' ri laleng kotaèro rilolongenni darana nabi-nabiè, darana umma'na Allataala -- rippe'na darana sininna tauwè iya puraè riyuno ri yasè'na linoè.
