1 Purairo sala sèddinna tau polè ri iya pitu malaèka' iya makkatenningngè pitu onrongngèro laowi ri iyya sibawa makkeda, "Laono mai, maèloka paitakko pèkkugi iyaro cakkuribang battowaè rihukkung matu, iyanaritu kota battowaèro iya ripatettongngè ri seddèna sining saloè! 2 Sining arung linoè siyappangaddingngi sibawa alèna, sibawa pabbanuwana linoè mabo'i nasaba mènungngi anggoro appangaddinna. " 3 Nainappa nakuwasaika Rohna Allataala, sibawa iyaro malaèka'è natiwika ri padang kessi'è. Kuwaniro mitaka sèddi makkunrai tudang ri yasè'na sèddiè olokolo' iya makellengngè bulunna, sibawa iya riyarokiriyè penno sibawa aseng-ngaseng pappakatuna lao ri Allataala. Iyaro olokolo'è mappunnaiwi pitu ulu sibawa seppulo tanru'. 4 Iyaro makkunraiè mabbaju colli paowi sibawa makelleng; enrengngè ribèlo-bèloi sibawa parèwa-parèwa ulaweng, paramata-paramata, sibawa mutiyara. Ri limanna makkatenningngi sèddi mangko' ulaweng iya pennoè sibawa gau'-gau' majaè sibawa macarèpaè, wassèlè'na appangaddingenna. 5 Ri linrona tarokii sèuwa aseng iya mappunnaiyè bettuwang rahasiya. Iyaro asengngè iyanaritu "Babèl Iya Battowaè, indo'na sininna cakkuribangngè sibawa sining tau maja ampè ri linoè. " 6 Nainappa uwita iyaro makkunraiè mabo'i sibawa darana umma'na Allataala enrengngè darana sininna tau iya riyunoè nasaba matinului lao ri Yèsus. Wettukku mitai iyaro makkunraiè, mancaji tahhèrang-hèrakka. 7 Nainappa makkeda iyaro malaèka'è lao ri iyya, "Aga saba'na mutahhèrang-hèrang? Madècèngengngi upaissengiko rahasiyana iyaro makkunraiè sibawa rahasiyana olokolo' iya natonangiyè, iyanaritu iya mappunnaiyè pitu ulu sibawa seppulo tanru'. 8 Iyaro olokolo'è engka naengka natuwo riyolo, iyakiya makkekkuwangngè dè'na natuwo. Cinampe'pi nassu matu polè ri pepping amatèngngè enrengngè nalao matu mattuju ri abinasangngè. Sining tau iya tuwoè ri linoè riwettu dè'napa naripancaji linoè iya asennaè dè' nariyoki ri laleng Kitta'na Tau Tuwoè, iyaro sining tauwè hèrangngi matu rèkko naitai iyaro olokolo'è. Saba' iyaro olokolo'è engka naengka natuwo riyolo. Makkekkuwangngè dè'na natuwona, iyakiya maèloi mompo paimeng. 9 Ri laleng gau'èwè parellu engka pangissengeng sibawa pappèjeppu. Iyaro pituè ulu iyanaritu pitu bulu-bulu; iyanaritu bulu-bulu onronna iyaro makkunraiè tudang. Sibawa iyaro pituè ulu iyatona iyanaritu pitu arung: 10 lima polè ri mennang sempè'ni, sèddi mapparènta mupi, naiya sèddiè dè'pa napolè. Rèkko polèi matti, harusu'i mapparènta cinampe' bawang. 11 Sibawa olokolo' iya engkaè naengka natuwo riyolo, iyakiya makkekkuwangngè dè'na natuwona, iyanaritu arung maaruwaè. Sala sèddinna towi polè ri iyaro arung pituè, iya makkekkuwangngè mattengngang mattuju lao ri abinasangngè. 12 Seppulo tanru' iya muwitaèro iyanaritu seppulo arung iya dè'èppa nappammula mapparènta. Iyakiya riwèrèngngi matu akuwasang untu' mapparènta selaku arung silaong iyaro olokolo'è sijang ittana. 13 Iya seppulo arungngèwè iya manenna mappunnaiwi akkatta iya padaè; iya manenna mennang nabbèrèyangngi awatangenna sibawa akuwasanna lao ri olokolo'èro. 14 Mammusui matu mennang mèwai iyaro Ana' Bimbala'è. Iyakiya iyaro Ana' Bimbala'è silaong sining ana' gurun-Na iya matinuluè iya puraè Naobbi sibawa Napilèro nacaui matu iyaro sining arungngè, nasaba Alèna ritu Puwanna sininna puwangngè, enrengngè Arunna sininna arungngè. " 15 Makkeda towi iyaro malaèka'è, "Uwai iya muwitaèro, onronna cakkuribangngè tudang, iyanaritu bangsa-bangsaè, sining ra'ya'è, sining wanuwaè sibawa sining basaè. 16 Seppulo tanru' iya muwitaè sibawa iyaro olokolo'è nabenciwi matu iyaro cakkuribangngè. Narampasa'i matu sininna sèuwa-sèuwaè iya nappunnaiyè, sibawa naèbbui alèna mallusu-lusu. Nanrèi matu mennang jukuna enrengngè napaccappui sibawa api. 17 Saba' Allataala pura pakèdoi atinna untu' pajoppai rancanana Allataala. Allataala mèbbui atinna siyempe untu' mabbèrèyangngi akuwasanna lao ri olokolo'èro, kuwammengngi na iyaro olokolo'è mapparèntai narapi kajajiyang aga iya napowadaè Allataala. 18 Makkunrai iya muwitaèro iyanaritu kota battowaè, iya parèntaèngngi sining arungngè ri linoè. "
