1 Nainappa uwita ri langiè sèuwa iya makalallaingngè sibawa dè'gaga padanna serona. Engka pitu malaèka' sibawa pitu abala iya paccappurengngè. Iyanaè paccappurenna Allataala tuppa'i cai-Na. 2 Purairo uwitani sèuwa iya paitaè pada-pada tasi' kacaè sicampuru' api. Uwita towi sining tau iya cauèngngi olokolo'è sibawa dato'-dato'na, sibawa pacau lao ri tau iya asennaè ritanrangi sibawa nomoro'. Sining tau iya pacauènnaro tettongngi ri wirinna tasi' kacaè nanakkatenning towi kacapi iya nabbèrèyangngè Allataala lao ri mennang. 3 Sibawa makkèlongngi mennang èlonna Musa, atanna Allataala, enrengngè èlonna Ana' Bimbala'è. Makkuwaiyè oninna, "Puwang, Allataala Pommakuwasaè, temmaka loppona sibawa makalallainna sining pangkaukem-Mu! Arunna sininna bangsaè, temmaka adèlè'na sibawa tongenna sining tindakem-Mu! 4 Nigana dè' namètau ri Idi, Puwang? Nigana dè' namaèlo mabbirittangngi arajam-Mu? Iko bawang ritu mapaccing. Sininna bangsaè polèi matu sompa-Ko nasaba sining tindakam-Mu iya adèlè'è purani naita sininna tauwè. " 5 Purairo uwitani Bolana Puwangngè ri surugaè tattimpa, na Kèmana Puwangngè engkai ri lalenna. 6 Nainappa iya pitu malaèka'è sibawa iya pitu abalaèro polè ri Bolana Allataala. Pakèyanna mennang polèi ri kaing lènang iya mapaccingngè sibawa lala'-lala'è. Enrengngè pakèi mennang pattongko aro iya riyèbbuè polè ri ulawengngè. 7 Nainappa sala sèddinna polè ri eppaè mahlu'èro mabbèrè lao ri iya pitu malaèka'èro pitu onrong ulaweng iya pennoè sibawa caina Allataala, -- Allataala iya tuwoè mannennungeng. 8 Na iyaro Bolana Allataala pennoi sibawa rumpu polè ri arajanna sibawa akuwasanna Allataala. Sibawa ri wettu engkana mupa abala iya natiwiè iya pitu malaèka'èro dè'pa naccappa, dè'gaga muwi sèddi tau iya mullè muttama ri laleng Bolana Allataala.
