1 Purairo riwèrèkka sipolo aju iya maèloè pada sipeppa tekkeng pangukkuru', nainappa riparèntang, "Laono muukkuru'i Bolana Allataala sibawa mèzbana. Bilangngi siyaga tau iya massompaè ri lalenna. 2 Iyakiya aja' muukkuru'i seddèna iya ri seddè saliwenna Bolana Allataalaro, saba' iyaro bagiyangngè purani riyabbèrèyang lao risining tau iya dè'è naissengngi Puwangngè. Nalèjja'-lèjja'i matu mennang kota iya mapaccingngèro patappulo duwa uleng ittana. 3 Maèlo-Ka suroi duwa tau sabbik-Ku iya mappakè pakèyang mabbarata, sibawa nappallebbangengngi matu mennang birittanna Allataala 1260 esso ittana. " 4 Iyaro duwaè sabbi iyanaritu duwappong zaitun sibawa duwa ajè lampu iya engkaè ri yolona Puwangngè sininna alangngè. 5 Rèkko nacobai tauwè pogau'i sèuwa iya dè'è namakessing lao ri mennang, napolè ri bawana mennang massui api iya paccappuèngngi sining balinna. Nallalengi caraèro, sininna tau iya maèloè peddiriwi mennang riyunoi matu. 6 Mappunnaiwi mennang akuwasang untu' tongkoi langiè kuwammengngi aja' nateppa bosiè ri wettu nappallebbangenna mennang biritta polè ri Allataala. Mappunnai towi akuwasang ri sininna mata uwai, untu' pinrai uwai mancaji dara. Sibawa mappunnai towi mennang akuwasang untu' munrui linoè sibawa sininna rupanna abalaè, uppa-uppanna mennang maèloi pogau'i. 7 Puranana mennang nappallebbangeng birittanna, olokolo' iya massuè polè ri pepping amatèngngè mèwai matu mennang. Nacaui matu mennang sibawa naunoi mennang. 8 Na ujuna tattale'i matu ri watattanana kota battowaè, ri onronna Puwanna risalli. Aseng èbara'na iyaro kotaè iyanaritu Sodom iyarè'ga Masèrè'. 9 Sining tau polè ri sininna bangsaè, sukuè, basaè, enrengngè wanuwaè naitai matu ujuna tellungngesso sitengnga ittana, sibawa dè' napalaloi iyaro sining ujuè rikuburu'. 10 Marennui matu pabbanuwana linoè nasaba matènana iya duwa sabbièro. Naramè-ramèiwi matu mennang enrengngè sisullèi matu sikiringeng hadiya, nasaba iya duwa tau nabièro purani mappapolè maèga passissang lao ri sininna tauwè ri linoè. 11 Labe'nana tellungngesso sitengnga, polèni nappase' atuwong polè ri Allataala sibawa muttama'si ri laleng iya duwa tau nabièro. Tokkong toni mennang tellong, angkanna sininna tauwè iya mitaèngngi mennang mancaji mètau senna'. 12 Nainappa iya duwa tau nabièro marèngkalinga sadda battowa iya mobbièngngi mennang polè ri surugaè, "Laono mai mènrè' kuwaè!" Nainappa ri yolona matanna sining balinna, mènrè' toni mennang ri surugaè, risalipuri ri ellungngè. 13 Na iyaro wettuè kajajiyanni mpèwang tanaè iya maseroè. Tawa seppulona bagiyanna polè ri kotaèro ancuru', sibawa pitussebbu tau matè nasaba iyaro mpèwang tanaè. Sining tau laingngè mètau senna'ni, nainappa mennang napoji arajanna Allataala ri surugaè. 14 Acilakang maduwaè labe'ni. Iyakiya itai! Cilaka iya matelluè dè'na namaitta naccinrola matu. 15 Nainappa malaèka' mapituè naseppung tarompè'na, nariyèngkalingana ri surugaè sadda battowa senna'è iya makkedaè, "Akuwasang untu' parèntai linoè engkani makkekkuwangngè ri laleng limanna Puwatta enrengngè Arung Pappassalama' iya najjanciyangngè. Mapparèntai matu lettu mannennungeng!" 16 Na iya duwappulo eppa pamimping iya tudangngè ri kadèra arajanna ri yolona Allataala, tassulunni sibawa sompai Allataala. 17 Makkedai mennang, "Puwang, Allataala Pommakuwasaè, iya engkaè, sibawa iya engkaènna! Mattarima kasi'ki ri Idi saba' purani Mupakè akuwasam-Mu iya battowaè, enrengngè purani Mupammulai mapparènta! 18 Sining tau iya dè'è naissengngi Puwangngè, majjallo saba' wettunna Mupatabbollong cai-Mu, enrengngè wettunna tona Muwadèlèki sining tau matè. Iyanaè wettunna untu' mpèrèngngi saro ata-atam-Mu, sining nabiè, sibawa lao ri sininna umma'-Mu, iyanaritu sininna tauwè iya massompaè ri Iko, battowa iyarè'ga baiccu. Iyanaè wettunna untu' mancuru'i sining tau iya mancuru'èngngi linoè!" 19 Natattimpa'na Bolana Allataala ri surugaè, enrengngè paitani Petti Assijancingengngè ri lalenna. Nasiyanrè-anrè billa'è enrengngè sadda guttuè maddalenrung sibawa mango, kuwaèttopa mpèwang tanaè sibawa bosi èse' iya maseroè.
