1 Nainappa uwita sèddi malaèka' porè iya laingngè nonno polè ri surugaè. Risalipuriwi sibawa ellung, enrengngè sèuwa tarawu mattemmuiwi ulunna. Tappana maccahaya pada-pada mata essoè, sibawa ajèna pada-pada alliri apiè. 2 Ri limanna engka sèddi kitta lulung baiccu iya tattimpa'è. Ajè ataunna makkella ri tasi'è, sibawa ajè abèyona makkella ri pottanangngè. 3 Nainappa gora sibawa sadda battowa pada-pada sining singaè iya mattengngangngè mowang. Puranana gora iyaro malaèka'è, iya pitu guttuè mappèbalini sibawa sadda maddalenrung. 4 Massaddanna iya pitu guttuèro, maèloka mokii, iyakiya mèngkalingaka sèuwa sadda polè ri surugaè makkeda, "Rahasiyakangngi aga iya napowadaè iya pitu guttuèro; aja' muwokii!" 5 Nainappa malaèka' iya uwitaè makkella ri tasi'è sibawa ri pottanangngèro makkai lima ataunna mènrè' ri langiè. 6 Mattanroi ri laleng asenna Allataala iya tuwoè mannennungeng, iya pancajiyèngngi langiè, linoè sibawa tasi'è enrengngè sininna sèuwa-sèuwaè iya engkaè ri lalenna. Makkedai iyaro malaèka'è, "Dè'na matu naripasoro wettunna! 7 Iyakiya rèkko malaèka' mapituè seppungngi tarompè'na, Allataala pakajajiyangngi matu rancana rahasiya-Na, pada-pada pura riyabbirittangngè lao ri ata-atan-Na, iyanaritu sining nabiè. " 8 Nainappa sadda iya puraè uwèngkalinga polè ri surugaèro, mabbicarasi lao ri iyya. Makkedai, "Laono malai kitta lulung iya tattimpa'è ri limanna malaèka' iya makkellaè ri tasi'è sibawa ri pottanangngèro. " 9 Naulaona ri malaèka'èro sibawa uwèllauwi kuwammengngi nabbèrèyangngi kitta lulung baiccu'èro lao ri iyya. Makkedai, "Alani sibawa anrèi iyaè. Ri laleng babuwamu mancaji mapaii matu, iyakiya ri laleng bawamu macenningngi pada-pada cani'è. " 10 Uwalani iyaro kitta lulung baiccu'è polè ri limanna nainappa manrèi. Ri bawaè rasana pada-pada cani'è, iyakiya purana uwemme, ri laleng babuwaè mancaji mapaii. 11 Nainappa riparèntakka, "Pallebbangngi siseppa birittanna Allataala passalenna bangsa-bangsaè, sining wanuwaè, sining basaè, enrengngè sining arungngè. "
