1 Saudara Filèmon, sellao sibawa sahaba'ta! Iyya, Paulus, sèddiwi tau tahanang nasaba Kristus Yèsus, silaong saudarata Timotius, mokii iyaè sure'è lao ri iko 2 sibawa lao ri jema'è iya maddeppungengngè ri bolamu; makkuwatoro lao ri ana' daratta, Apfia sibawa sellao seperjuwangetta, Arkhipus. 3 Mammènasaki tennapodo Allataala Ambo'ta sibawa Puwang Yèsus Kristus mabbèrè barakka sibawa asalèwangeng lao ri iko. 4 Sises-siseng massempajakka, uteppui asenna Saudara sibawa mattarima kasi lao ri Allataala. 5 Saba' uwèngkalingai makkedaè tonget-tongengngi Saudara mateppe' lao ri Puwang Yèsus sibawa mamasèiwi sininna umma'na Allataala. 6 Massempajakka tennapodo assilessuretta selaku tau mateppe' powassèlè'i matu pappèjeppu iya lebbi battowaè nasaba sininna barakka iya riyappunnangiyè nasaba massèddiki sibawa Kristus. 7 Saudara Filèmon, pammasèmu lao ri sininna umma'na Allataala, rennuika sibawa mpèrèkka sumange'! Sininna umma'na Allataala marennu nasaba Saudara. 8 Rimakkuwannanaro, selaku sèddi Saudara iya siyatepperengngè, weddissa uparèntang Saudara untu' pogau'i aga iya harusu'è napogau' Saudara. 9 Iyakiya nasaba uwamasèiwi Saudara, iyya marèllauma bawang. Iyya'è sèddi tau macowa namakkekkuwangngè mattengngang ritahang ri laleng tarungkuè nasaba Kristus Yèsus. 10 Iyya, Paulus, pangolo sèuwa parèllaung lao ri iko passalenna Onèsimus, ana'ku ri laleng Kristus. Saba' ri laleng tarungkuè mancajika ambo' rohaninna. 11 Riyolo dè' nakkèguna untu'mu, iyakiya makkekkuwangngè makkègunani, tenniya bawang untu'mu, iyakiya untu' iyya'to. 12 Makkekkuwangngè iyaro tau uwamasèiyè ukiringngi lisu ri iko. 13 Sitongenna maèloka tahangngi sibawakka kuwaè selaku passalemmu, kuwammengngi weddingngi nabantuka, sipongenna ritahakka ri laleng tarungkuèwè nasaba mabbirittangngi Karèba Madècèng polè ri Allataala. 14 Iyakiya dè' umaèlo pogau' agi-agi rèkko dè'pa nasitujuiwi Saudara. Lebbi upojiwi rèkko napogau'i Saudara sibawa macenning; dè' umaèlo passako. 15 Naullè massarangngi Onèsimus polè ri Saudara untu' dè' namaitta kuwammengngi weddingngi saudara nalolongeng paimeng lettu mannennungeng. 16 Makkekkuwangngè tenniya banna sèddiwi ata untu' Saudara; lebbi na iyaro. Iyanaritu pada-padatta tau Kristèng iya riyamasèiyè nasaba Kristus. Makkèguna senna'i untu' iyya, apalagi untu'mu. Tentu makkèguna senna'i, muwi selaku ata iyarè'ga sèddi Saudara ri laleng Puwangngè! 17 Rimakkuwannanaro, nasaba Saudara nangga'ka sellao pada-pada Kristèng, tarimani paimeng Onèsimus pada-pada natarimaku Saudara. 18 Rèkko pasalai iyarè'ga makkinrengngi lao ri iko, leppessanni iyya tanggungngi iya manennaro. 19 Nah, makessinni alèku mokii kuwaè: Iyya, Paulus, maèlo paleppe' manengngi. (Tentu dè' naparellu uwapparèngngerangeng makkedaè alèna Saudara mappunnai inreng ri iyya, iyanaritu atuwong barumu selaku tau Kristèng. ) 20 Rimakkuwannanaro, nasabbing Puwangngè, coba tulukka; pèrennuiwi atikku selaku pada-padatta Saudara ri laleng Kristus. 21 Uwokii iyaè sure'è nasaba teppe' makkedaè Saudara maèlo pogau'i aga iya uwèllauwè. Mala uwisseng Saudara maèloi pogau'i lebbi na iyaro. 22 Ri lalennaro, tulungngi passadiyangekka kamara' ri bolamu, saba' mammènasaka Allataala tarimai sempajanna maneng Saudara sibawa tiwika lisu ri iko. 23 Epafras, iya engkaè sibawakka ri laleng tarungkuè nasaba Kristus Yèsus, masselleng lao ri iko. 24 Tarima towi sellenna sellao-sellaoku: Markus, Aristarkhus, Dèmas sibawa Lukas. 25 Tennapodo Puwang Yèsus Kristus barakkakiko. Salama, Paulus
