1 Rimakkuwannanaro, Saudara-saudaraku iya uwèloriyè, makkuwaniro sitinajammu tuwo sibawa mattonget-tongeng mateppe' lao ri Puwangngè. Muddaniwi atikku ri iko! Iko ritu uwattuwang mèbbuka marennu. 2 Saudara Euodia sibawa Saudara Sintikè! Uwèllauwi sibawa masero kuwammengngi Saudara massiatiwi selaku sining tau iya siatepperengngè. 3 Lao ri sellaoku iya matinuluè, uwèllau towi kuwammengngi Saudara bantuwi iya duwa makkunraièro. Purani majjama senna' mennang sibawakka untu' mabbirittangngi Karèba Madècèng polè ri Allataala; pada-pada Klèmèn sibawa sininna tau laingngè iya majjamaè sibawakka. Aseng-ngasenna mennang engkai ri laleng Kitta'na Tau Tuwoè. 4 Tennapodo tuli marennuko nasaba tuwoko massèddi sibawa Puwangngè. Siseppa makkeda: arennuno! 5 Sitinajai sininna tauwè naullèi mitai kèdo-kèdomu iya makessing atiè. Saba' dè'na namaittana napolè matu Puwangngè. 6 Aja mubata-bata passalenna muwi aga. Ri laleng sininna gau'-gau'è, assempajanno sibawa pangoloni parèllaummu ri Allataala. Aga muwapparelluwang, tuli powadai lao ri Allataala ri laleng mattarima kasi. 7 Na asalèwangeng polè ri Allataala iya dè'è nakkullè napahang tolinoè, jagaiwi matu atimmu sibawa pikkirammu iya massèddiènna sibawa Kristus Yèsus. 8 Paccappurenna, Saudara-saudara lisekiwi pikkirammu sibawa gau'-gau' iya engkaè angke'na, iya sitinajaè ripoji, iyanaritu gau'-gau' iya tongengngè, iya malebbiè, iya adèlè'è, mapaccingngè, macenningngè, sibawa makessingngè. 9 Pajoppani aga muwaggurui sibawa mutarima polè ri iyya; muwi polè ri ada-adakku iyarè'ga polè risining pangkaukekku. Allataala assalenna asalèwangengngè, sibawakko matu. 10 Ri laleng atuwokku iya massèddiè sibawa Puwangngè, masennang senna'i pappèneddikku, saba' puranana makkuwaro ittana, makkekkuwangngè makkullèsiko pikkiri'i keadaakku. Akkattaku tenniya makkedaè muwallupaina; mèmeng muwajampangika, iyakiya dè' mulolongeng kasempatang untu' mappaitangngi. 11 Upangoloi iyaè tenniya nasaba akurangekka, saba' purana magguru paggenne'i aga iya engkaè. 12 Upèneddingini atuwong iya akurangengngè, sibawato atuwong alebbingngè. Uwissenni rahasiyana untu' moloiwi keadaang muwi maragaè; muwi keadaang dècèng iyarè'ga keadaang kasiyasi, muwi keadaang masagèna, iyarè'ga keadaang akurangeng. 13 Nasibawang akuwasang iya nabbèrèyangngè Kristus lao ri iyya, mappunnaika awatangeng moloiwi sininna rupanna keadaangngè. 14 Iyakiya puraka mutulung ri laleng asusakku; na aga iya mupogau'èro mèmeng makessing. 15 Saudara-saudara tau Filipiè! Alèmuna misseng tongengngi makkedaè wettukku salaiwi Makedonia riyolo, wettunna Karèba Madècèngngèro uwappallebbangeng untu' bunge'-bunge'na, iko ritu bawang alè-alèna jema' iya bantuèkka; iko bawang alè-alèna iya maccowèè kanyamèi peri nyamenna sibawakka. 16 Wettukku ri Tèsalonika sibawa mapparelluwang bantuwang, dè' nawèkkasiseng muwa kirikko bantuwang lao ri iyya. 17 Tenniya bettuwanna iyaro macinna muka bawang tarima pabbèrè. Iya uwacinnaiyè iyanaritu kuwammengngi uwullèi mitai wassèlè'-wassèlè' iya tambaiyèngngi albammu. 18 Purani utarima maneng -- mala lebbi nagenne'è! Sininna pabbèrè iya muwakkiringengngè lao ri iyya, purani utarima polè ri Epafroditus. Makkekkuwangngè uwappunnaini sininna iya uwapparelluwangngè. Sining pabbèrèmuro iyanaritu pada-padai bau mabau polè ri akkarobangeng iya riyakkasuwiyangengngè lao ri Allataala sibawa iya natarimaè Allataala sibawa masennang ati. 19 Allataala iya usompaè, maona sibawa asugireng ri laleng Kristus Yèsus, pennoiwi matu sininna apparelluwammu. 20 Ripojiwi Allataala Ambo'ta lettu mannennungeng! Aming. 21 Palettu'i sellekku lao ri sininna umma'na Allataala iya massèddiè sibawa Kristus Yèsus. Sibawa tarima towi sellenna saudarata iya engkaè sibawakka. 22 Sininna umma'na Allataala ri kotaèwè, utamana mennang iya polè ri saorajana Kaisar, massellengngi lao ri iko. 23 Tennapodo Puwang Yèsus Kristus barakkaki manengngi saudara. Salama, Paulus sibawa Timotius
