1 Mawatakko, nasaba massèddiko sibawa Kristus. Sibawa tassalèwoko nasaba Kristus mamasèiko! Ripimpikko Saudara ri Rohna Allataala, nasipammasè-masè tokko enrengngè mappunnaiwi paressè babuwa sèddiè lao ri laingngè. 2 Nah, cobani tonget-tongekko pèsennangi atikku sibawa gau'-gau'èwè: Tuwono massiati sibawa pammasè padaè, pada pikkirang sibawa akkatta iya padaè. 3 Aja' mupogau'i sèuwaè nasaba risorokko ri apentingeng ri alè, iyarè'ga untu' mattempowangngi alè. Sibalè'na sitinajako tungke'-tungke' sibawa ati mariyawa mangga'i tau laingngè lebbi makessing naiya alèna. 4 Jampangiwi apentingenna tau laingngè; aja' banna na apentingeng ri alè bawang. 5 Sitinajako mappunnai attangeng pada-pada Yèsus Kristus: 6 Sitongenna Alèna pada Allataala, iyakiya dè' napèrasai makkedaè keadaan-Na iya tenritaèro harusu'i nattahangeng. 7 Sibalè'na Naleppessang manengngi nainappa mancaji pada-pada sèddiè ata. Mancajiwi pada-pada tolinoè, sibawa paita tuwo pada-pada tolinoè. 8 Napakariyawai alèna, enrengngè tuwo sibawa matinulu ri Allataala gangka matè -- iyanaritu matè ri salli. 9 Narimakkuwannaro Allataala makkai Alèna kaminang matanrè, enrengngè mpèrèngngi akuwasang iya lebbi battowaè naiya sininna akuwasang laingngè. 10 Na untu' pakarajai Yèsus, sininna mahlu'è ri surugaè, sibawa ri linoè, enrengngè ri yawana linoè, sompai matu Alèna. 11 Mangaku manengngi matu mennang makkedaè Yèsus Kristus ritu Puwang; nanallalengiro naripakalebbi Allataala Ambo'è. 12 Rimakkuwannanaro, Saudara-saudara iya upojiyè, pèkkugiko tuli matinulu lao ri iyya wettukku engka ri tengnga-tengngamu, na lebbi-lebbipi makkekkuwangngè ri wettu sibèlangngè, sitinajako matinulu lao ri iyya. Purani ripassalama'ko ri Allataala rimakkuwannanaro akkuragano matteru kuwammengngi namancaji sukku asalamakemmu. Pogau'i iyaro sibawa mappakaraja enrengngè mapato lao ri Allataala, 13 nasaba Allataala muto ritu iya majjamaè ri laleng alèmu untu' mèbbuko rèla sibawa mullèi pèsennangiwi atinna Allataala. 14 Jamai sini-sininnaè sibawa dè' muwannoko'-noko' iyarè'ga massasa. 15 - 16 Nanallalengiro muwappaitangngi makkedaè iko iyanaritu ana'-ana'na Allataala iya dè'è gaga cellana, iya tuwoè sibawa matinulu enrengngè tongeng ri tengnga-tengngana tau majaè sibawa madosaè. Na wettunna mupalettu lao ri mennang biritta iya mabbèrè atuwong, sitinajako mancaji lao ri mennang pada-pada cahaya iya mattappaè tajangiwi linoè. Rèkko tuwoko pada-padaèro, engkana matu alasang ri iyya untu' marasa mingki passalemmu ri Essona Yèsus Kristus polè paimeng. Iyanaro buttinna makkedaè perjuwangekku dè' nasiya-siya sibawa usahaku engka wassèlè'na. 17 Naullè riyunoka matu na daraku mancaji pada-pada akkarobangeng riyabbolorengngè ri yasè'na aga iya muwakkasuwiyangengngè lao ri Allataala selaku tanrang makkedaè mateppe'ko ri Alèna. Rèkko mèmeng harusu'i makkuwaro, sukkuru'ka lao ri gau'èro sibawa maccowèto marennu silaong iko. 18 Makkuwatoniro sitinajako masennang sibawa maccowè marennu sibawakka. 19 Mateppe'ka makkedaè nasibawang pattulunna Puwang Yèsus, masitta'ka suroi Timotius lao ri iko kuwammengngi weddikka tassalèwo ri biritta passalemmu. 20 Banna Timotius bawang alè-alèna tau kuwaè iya sinyawaè sibawa iyya, sibawa tonget-tongengngi napikkiri' asennangemmu. 21 Iya maneng laingngè banna naurusu'i apentingemmu alèna bawang, tenniya apentingenna Yèsus Kristus. 22 Alèmuna pura mitai buttinna makkedaè makkègunai Timotius. Majjama laddè'i silaong iyya untu' pallebbangngi Karèba Madècèng polè ri Allataala. Idi sipadduwa pada-padai ana'è sibawa ambo'è. 23 Rimakkuwannanaro, uwissenna matti pèkkugi parakaraku maccappa, usuroi matu lao ri iko. 24 Mateppe'ka makkedaè nasibawang pattulunna Puwangngè, iyya dè'tona umaitta ucèllèngi tokko matu. 25 Passalenna saudarata Epafroditus iya puraè musuro bantuka, marasa parelluka suroi lisu lao ri iko. Purana naranreng ri laleng jama-jamangngè sibawa perjuwangekku. 26 Muddani senna'i lao ri Saudara maneng, sibawa masèssai nasaba lolongemmu karèba makkedaè malasai. 27 Mèmeng tongengngi malasai angkanna cèddè'pi namatè. Iyakiya kasiyangngi Allataala ri alèna; na tenniya ri alèna bawang, iyakiya laoto ri iyya, kuwammengngi aja' upèdè' messè. 28 Iyanaro saba'na napèdè' battowato pangèlorekku untu' suroi lisu ri iko, kuwammengngi mumarennu paimeng rèkko siruntu'ko alèna, namancaji tennang tona atikku. 29 Jaji duppaiwi sibawa masennang ati selaku sèddi Saudara iya mateppe'è. Angke'i sininna tauwè iya naèwaè pada-pada. 30 Untu' apentingenna jema'-jema'na Kristus, cèddè'pi namatè; nappèsonangngi nyawana untu' tulukka ri laleng asemmu.
