1 Mènrè'ni Yèsus ri laleng lopiè, nanallèttoiwi tapparengngè, nalisu ri kampong assalen-Na. 2 Nanatiwina tauwè kuwaro ri Alèna sèddi tau pèso' iya lèwuè ri onrong atinrongngè. Wettunna Yèsus naita battowana teppe'na sining tauwèro, makkeda-Ni ri tau pèso'èro, "Sabbara'ko ana'-Ku! Riyaddampengenni dosa-dosamu. " 3 Siyagangngarè guru-guru agama iya engkaè kuwaro makkeda ri laleng atinna, "Iyaè tauwè napakatunai Allataala!" 4 Naissengngi Yèsus pikkiranna mennang, jaji makkedai, "Magi namaja makkuwaro pikkirammu? 5 Kèga lebbi gampang: powadai, 'Riyaddampengenni dosamu', iyarè'ga powadai, 'Oto'no namujoppa?' 6 Iyakiya makkekkuwangngè maèlo-Ka pabuttiwi ri iko makkedaè Ana'na Tolinoè makuwasai ri yasè'na linoèwè untu' maddampengengngi dosaè. " Nainappa makkeda Yèsus lao ri tau pèso'èro, "Oto'no, akkai onrong atinrommu namulao!" 7 Naoto'na iyaro tau pèso'è nalisu ri bolana. 8 Wettunna naita iyaro sining tauwè kajajiyangngèro, mètauni mennang sibawa napojini Allataala, saba' Allataala pura mabbèrèyangngi akuwasanna iya battowa makkuwaèro lao ri rupatauwè. 9 Nasalaini Yèsus onrongngèro. Mattengngangngi joppa, naita-Ni sèddi passinge' sima, riyasengngè Matius, tudang ri kantoro assimanna. Nakkeda Yèsus ri alèna, "Laono mai namuwaccowè ri Iyya!" Natettonna Matius, nanaccowèriwi Yèsus. 10 Wettunna Yèsus mattengngang manrè ri bolana Matius, polèni maèga passinge' sima sibawa sining tau iya riyangga' dè'è namakessing ri masaraka'è, maccowè manrè sisama Yèsus enrengngè sining ana' gurun-Na. 11 Engka tau Farisi mitai gau'èro. Nakkutanana mennang ri ana'-ana' gurunna Yèsus, "Aga saba'na gurummu namanrè sisama passinge' simaèro enrengngè sining tau iya dè'è namakessing?" 12 Naèngkalingai Yèsus pakkutanana mennang, nanappèbali, "Tau madisingngè dè' napparelluwang dottoro', banna tau malasaè bawang. 13 Salidikiwi aga bettuwanna aya'na Kitta'èwè: 'Paressè babuwa Uwèlori, tenniya akkarobangeng olokolo'. ' Saba' engka-Ka polè tenniya untu' mobbii tau iya tongengngènna, sangadinna tau iya madosaè. " 14 Purairo laoni sining ana' gurunna Yohanès Paccemmè ri Yèsus. Nanakkutana mennang, "Magi idi sibawa sining tau Farisiè nappuwasa na sining ana' gurunna Bapa' dè'?" 15 Nappèbali Yèsus, "Pèkkugi pallolongemmu? Weddigga sining undangengngè ri abottingengngè tassinnau atinna rèkko engka mupi bottimpuranè silaong mennang? Tentu dè'! Iyakiya engka matu narapii wettunna nariyala iyaro bottimpuranè polè ri mennang. Ri wettuènnaro nainappa mappuwasa mennang. 16 Dè'gaga tau tèppangngi waju malaungngè sibawa sikennè kaing mabaruè. Saba' iyaro kaing pattèppangngè cakkikkii matu nanasapè'i iyaro wajuè, angkanna pèdè' malowangngi sapè'na. 17 Makkuwatoro dè'gaga tau tiri' anggoro baru ri laleng popang koli iya malaungngè. Saba' reppa'i matu sibawa masolangngi iyaro popangngè, natabbè anggoro'na. Iyaro anggoro baruè ritiri'i ri laleng popang iya baruètto, kuwammengngi natette' madècèng iya duwa. " 18 Ri wettu mabbicarana mupa Yèsus sibawa sining ana' gurunna Yohanès Paccemmè, polèni sèddi pamimpinna bola assompangngè. Makkaluttuni ri yolona Yèsus, nakkeda, "Silalona matè ana' makkunraikku. Iyakiya, laoki mai takarawai kuwammengngi natuwo paimeng. " 19 Natokkonna Yèsus nasilaong sining ana' gurun-Na lao sibawa tauwèro. 20 - 21 Ri tengnga laleng engka sèddi makkunrai iya seppuloènna duwa taung ittana malasa maddara lao maddeppèriwi Yèsus polè ri munri. Mappikkiri'i, "Assaleng ugèssa muwi bawang jumba-Na, majjappaka matu. " Nainappa nagèssa cappa jumbana Yèsus. 22 Iyatoro wettuè nanagiling Yèsus nanaitai iyaro makkunraiè, nainappa makkeda ri alèna, "Pakkasse'i atimmu, ana'-Ku! Nasaba mateppe'ko ri Iyya, namuwajjappa!" Iyatoro wettuè najjappa iyaro makkunraiè. 23 Nainappa lettu Yèsus ri bolana pamimpinna bola assompangngè. Wettunna naita pacculè-culè oni-oni abbaratangngè sibawa maèga tau marukka, 24 makkedani ri mennang, "Assu manekko! Iyaè ana'è dè' namatè'; matinroi bawang. " Nacawa-cawai manenni mennang Yèsus. 25 Massunana sining tauwèro, muttama'ni Yèsus ri laleng bili'na iyaro anana'è nanakkatenningngi limanna. Natokkonna iyaro anana' makkunraiè. 26 Iyaro karèbaè tassiyani ri sininna daèraèro. 27 Laoni Yèsus polè kuwaro na ri tengnga laleng engka duwa tau buta maccowèriwi. Gorani mennang, "Ana' Daud, amasèiki!" 28 Wettunna Yèsus muttama' ri lalempola, polèni iya duwa tau butaèro ri Alèna. Makkutanani Yèsus ri mennang, "Mateppe'koga makkedaè Uwullè pajjappako?" Nappèbali mennang, "Mateppe', Pa'!" 29 Nainappa nakarawa Yèsus matanna mennang nakkedato, "Nasaba mateppe'ko, jajini aga muwammènasaiyè. " 30 Naweddinna makkita mennang. Riparèngngerangini mennang ri Yèsus sibawa matedde kuwammengngi aja' nappaissengengngi iyaro gau'è lao ri nigi-nigi. 31 Iyakiya laowi mennang napatassiyai iyaro karèbaè passalenna Yèsus ri sininna daèraè. 32 Wettunna meddè'na iya duwa tauwèro, sèddi tau pèpè iya nakuwasaiyè sètang ritiwi lao ri Yèsus. 33 Napaddèsu'ni Yèsus iyaro sètangngè, naiyatoro wettuè naweddinna mabbicara iyaro tauwè. Hèranni iyaro tau maègaè nakkeda, "Dè'pa naengka taita kajajiyang makkuwaèwè ri Israèliè!" 34 Iyakiya makkedai sining tau Farisiè, "Kapalana sining sètangngè ritu mpèrèngngi kuwasa untu' paddèsu'i iyaro sining sètangngè. " 35 Makkuwaniro Yèsus lao mattulili polè risèddiè kota lao ri kota laingngè sibawa polè risèddiè kampong lao ri kampong laingngè. Mappagguruni risining bola assompangngè, sibawa mappallebbangengngi Karèba Madècèngngè, pèkkugi Allataala mapparènta selaku Arung. Napajjappai sining tau nakennaè maddupa-rupang lasa sibawa sala-salangngè watakkalèna. 36 Wettunna naita Yèsus tau maègaèro, messèni babuwana lao ri mennang, saba' malippui mennang enrengngè dè' pakkullènna, pada-pada bimbala' dè'è pakkampina. 37 Nakkedana Yèsus lao ri sining ana' gurun-Na, "Maèga èngngalang, iyakiya cèddè'mi parèngngala. 38 Rimakkuwannanaro, èllauno ri punnaè dare'ro kuwammengngi nakiring parèngngala untu' èngngalanna. "
