1 "Aja' muwadèlèkiwi tau laingngè, kuwammengngi na alèmu dè'to nadèlèkiwi Allataala. 2 Saba' pèkkugiko madèlèkiwi tau laingngè, makkuwatoro Allataala madèlèkiko matu. Na ukkurang mupakè untu' tau laingngè, napakè towi matu Allataala untu' iko. 3 Magi muwitai bulisa'è ri laleng matanna silessuremmu, na balo'è ri laleng matammu dè' mupèneddingiwi? 4 Pèkkugi mullèi makkeda lao ri silessuremmu, 'Laono mai upassurekko bulisa'è polè ri matammu', na ri laleng matammu engka balo'? 5 Eh munapè'! Passuni riyolo' iyaro balo'è polè ri matammu, nainappako makkita sibawa manessa, nanamuwullèi passui bulisa'è polè ri matanna silessuremmu. 6 Aja' muwèrèngngi barang mapaccingngè lao ri asuè, kuwammengngi iyaro asuè dè' nagiling luruiko. Aja' muwèrèngngi mutiyara bawiè, kuwammengngi iyaro bawiè dè' nalèjja'-lèjja'i iyaro mutiyaraè. " 7 "Ellauno, namutarimai matu. Sappai, namulolongengngi matu. Getto'i, naritimpakekko matu tange'è. 8 Nasaba tau iya marèllauwè, natarimai matu; tau iya massappaè nalolongengngi matu; na tau iya maggettoè ritimpakengngi matu tange'. 9 Ri yelle'mu engkaga ambo' iya mpèrèngngèngngi batu ana'na, rèkko mèllauwi roti? 10 Iyarè'ga mpèrèngngi ula, rèkko mèllauwi balè? 11 Namuni majako, iyakiya muwisseng towi mabbèrèyangngi iya makessingngè lao ri ana'-ana'mu, apalagi Ambo'mu ri surugaè? Lebbi-lebbipi Ambo'mu ri surugaè nabbèrèyangngi matu iya makessingngè lao ri tau iya mèllauwèngngi ri Alèna. 12 Gaukengngi tau laingngè pada-pada iya muwèloriyè rigaukekko ri mennang. Iyanaro poko'na hukkunna Musa sibawa nappagguruwangngè nabi-nabiè. " 13 "Uttama'no lalo ri tange' macipiè, saba' tange' sibawa laleng iya mattujuè ri ranakaè battowa sibawa malowang, na maèga tau molai. 14 Iyakiya macipii sibawa mawatangngi tange' nenniya laleng iya tiwièngngi tauwè ri atuwongngè. Na banna cèddè tau iya lolongengngèngngi. " 15 "Atike'ko lao ri nabi-nabi palsuè. Polèi matu mennang ri iko sibawa mallarikkodo bimbala', iyakiya sitongenna mennang pada-padai asu ale' masekkangngè. 16 Muwissengngi matu mennang polè ri wassèlè pangkaukenna. Alekale maddoriè dè' napassu anggoro, sibawa alekale maddoriè dè' napowassèlè buwa ara. 17 Polè ri pong ngaju macommo'è rilolongengngi buwa makessingngè, na polè ri pong ngaju iya dè'è namacommo, buwa maja. 18 Pong ngaju macommo'è dè' nakkullè powassèlè'i buwa majaè, sibawa pong ngaju iya dè'è namacommo dè' naullèi powassèlè buwa makessingngè. 19 Tungke' pong ngaju iya dè'è naullèi powassèlè buwa makessingngè, ritubbangngi naritunu. 20 Makkuwatoniro nabi-nabi palsuè. Muwissengngi matu mennang polè ri wassèlè pangkaukenna. " 21 "Dè' naiya maneng tau iya mobbièk-Ka, 'Puwang, Puwang', mancaji matu anggotana umma'na Allataala, iyakiya banna bawang sining tau iya pogau'èngngi èlona Ambo'-Ku ri surugaè. 22 Ri Esso Kiyame', maèga tau makkeda matu ri Iyya, 'Puwang, Puwang, tenniyaga ri laleng asemmu Puwang puraki palettu'i pasenna Allataala? Sibawa tenniyaga ri laleng asemmuto Puwang puraki paddèsu'i sètangngè enrengngè pakangka maèga anu makalallaingngè?' 23 Iyakiya mappèbali-Ka matu, 'Dè' naengka uwissekko! Esu'ko polè kuwaè, iko pogau'èngngi majaè!' " 24 "Tau iya mèngkalingaèngngi ada-adak-Kuè sibawa turusiwi, pada-padai tau mapanrè iya patettongngèngngi bolana ri yasè'na batuè. 25 Wettunna teppa bosiè sibawa polèi lempe'è enrengngè anginrajaè munrui bolaèro, iyaro bolaè dè' namaruttung saba' ripatettongngi ri yasè'na batuè. 26 Na tau iya mèngkalingaèngngi ada-adak-Kuè, iyakiya dè' naturusiwi, pada-padai tau madonggoè iya patettongngèngngi bolana ri yasè'na kessi'è. 27 Wettunna teppa bosiè, sibawa polè lempe'è enrengngè anginrajaè munrui bolaèro, maruttunni iyaro bolaè. Namaladde senna asolangenna!" 28 Angkanna pajani Yèsus mappagguru, nasining tau iya engkaè kuwaro hèrang senna'ni mèngkalingai pappagguruwan-Na. 29 Saba' Alèna mappaggurui sibawa akuwasang, dè' napada-pada guru-guru agamana mennang.
