1 "Engngerangngi, aja' mupogau'i kewajibanna agamaè ri yolona tau maègaè kuwammengngi naitai tauwè. Rèkko mupogau'i makkuwaèro, dè' nariwèrèkko matu saro ri Ambo'mu ri surugaè. 2 Jaji rèkko mabbèrèko sidekka ri tau kasiyasiè, aja' mugora-gorangngi iyaro gau'è pada-pada iya napogau'è sining munapè'è. Napoji mennang pogau'i iyaro ri laleng bola assompangngè sibawa ri watattanaè, kuwammengngi naripoji ri tauwè. Engngerangngi purani mennang natarima sarona. 3 Iyakiya iko, rèkko mabbèrèko sidekka, abbèrèko sibawa mammekko-mekko, angkanna dè'gaga missengngi. 4 Leppessangngi siya iyaro pangkaukemmu dè'gaga missengngi muwi niga, sangadinna Ambo'mu ri surugaè. Naitai pangkaukemmu iya tassubbuèro nanawèrèkko matu saro. " 5 "Rèkko massempajakko, aja' mupada pada tau iya majjaiyèngngi. Napoji mennang massempajang sibawa tettong ri bola assompangngè enrengngè ri pèkka lalengngè kuwammengngi nariita ri tauwè. Engngerangngi iyanaro sarona natarima mennang. 6 Iyakiya rèkko massempajakko, uttama'ko ri bili'è, namutongkoi tange'na, namumassempajang ri Ambo'mu iya dè'è napaitaro. Na Ambo'mu iya mitaèngngi pangkaukemmu tassubbuè mpèrèkko matu saro. 7 Rèkko massempajakko aja' nakkolik-koling pada-pada tau dè'è naissengngi Puwangngè. Nasengngi mennang riyèngkalingai matu mennang nasaba sempajanna mennang iya malampè'èro. 8 Aja' mupada-pada mennang. Naisseng Ambo'mu aga muwapparellung, riwettu dè'napa muwèllauwi. 9 Jaji assempajakko makkuwaèwè: 'Ambo'ta ri surugaè: Iko ritu Allataala iya Sèuwaè. Tennapodo risompa-Ko sibawa ripakalebbi. 10 Iko ritu Arutta. Tennapodo mapparènta-Ko ri linoè, na èlo-Mu riturusi pada-pada ri surugaè. 11 Wèrèkki essoèwè inanrè iya riyapparelluwangngè. 12 Addampengekki polè ri asalatta, pada-padato pura riyaddampengenna tau iya pasalaè ri idi. 13 Aja' taleppessakki ateddèngeng ateppereng wettutta ricobai, iyakiya taleppessakki polè ri akuwasanna iya mappèjariyè. [Ikona Arung makuwasa sibawa malebbi lettu mannennungeng. Amin. ]' 14 Rèkko muwaddampengengngi tau iya pasalaè ri iko, Ambo'mu ri surugaè naddampengeng towi matu asalammu. 15 Iyakiya rèkko dè' muwaddampengengngi asalanna tau laingngè, Ambo'mu ri surugaè dè'to matu naddampengengngi asalammu. " 16 "Rèkko mappuwasako aja' mupajjameru'i rupammu pada-pada tau iya pojiyèngngi majjaiwi. Napinrai mennang rupanna kuwammengngi sininna tauwè naissengngi makkedaè mappuwasai mennang. Engngerangngi, iyanaro sarona pura natarima mennang. 17 Iyakiya rèkko mappuwasako, ajjumatako sibawa jakkaiwi gemme'mu, 18 kuwammengngi nadè' gaga missengngi makkedaè mappuwasako, sangadinna Ambo'mu bawang iya dè'è napaita. Naitai iyaro tassubbuè sibawa nawèrèkko matu saro. " 19 "Aja' mupaddeppungengngi alèmu waramparang ri linoè, ri onrong iya weddingngè nasolangi karat sibawa taisseng enrengngè panga polè mènnauwi. 20 Sibalè'na, paddeppungekko waramparang ri surugaè, ri onrong dè'è naullèi solangiwi karat, sibawa taisseng enrengngè panga dè' naullèi mènnauwi. 21 Saba' kègi-kègi waramparammu, kuwatowitu atimmu!" 22 "Mataè iyanaritu lampu untu' watakkalè. Rèkko macakkai matammu, matajangngi sininna watakkalèmu. 23 Iyakiya rèkko massalawui matammu, mapettakkape'i sininna watakkalèmu. Jaji rèkko lampuè ri laleng watakkalèmu mapettangngi, temmakana pettanna iyaro kalemmengngè!" 24 "Dè' sèddi tau mullèi majjama untu' duwa ponggawa. Saba' lebbi namasèiwi matu sèddiè naiya laingngè. Iyarè'ga lebbi matinului lao ri ponggawa sèddiè naiya laingngè. Makkuwatoniro iko. Dè' muwullèi majjama untu' Allataala sibawa untu' waramparangngètto. 25 Rimakkuwannanaro èngngerangngi; aja' mubata-bata passalenna atuwommu, iyanaritu aga maèlo muwanrè sibawa muwènung, iyarè'ga aga maèlo mupakè. Dè'ga atuwongngè lebbiwi naiya anrè, sibawa watakkalè lebbiwi naiya pakèyangngè? 26 Itai manu'-manu'è ri yelle'è, dè' mennang nattaneng, dè' naèngngala, sibawa dè'to napaddeppungengngi wassèlè tanet-tanenna ri laleng lappona. Namuni makkuwaro Ambo'mu ri surugaè piyarai mennang! Dè'ga mulebbi mangke naiya manu'-manu'è? 27 Nigana polè ri iko ri laleng abata-batangngè mullèi palampèiriwi umuru'na muwi cèddè? 28 Magi mubata-bata passalenna pakèyammu? Pènessaiwi bunga-bunga bakungngè iya tuwoè ri padangngè. Iyaro bunga-bungaè dè' najjama sibawa dè'to natennung; 29 iyakiya muwi Arung Salomo iya sugi makkuwaèro, dè' napakè pakèyang iya siggelloè bunga-bungaèro! 30 Iyaro wellaè tuwoi ri padangngè essoèwè, na pappabajana ritunui gangka cappu. Namuni makkuwaro, Allataala bèlo-bèloiwi iyaro wellaè makkuwamani kessinna. Apalagi iko! Iyakiya iko makurang teppe'ko! 31 Aja' mubata-bata sibawa makkeda, 'Aga matu riyanrè', iyarè'ga, 'Aga matu riyènung', iyarè'ga, 'Aga matu ripakè'? 32 Iyaro gau'-gau'è tuli nalellungngi sining tau iya dè'è naissengngi Allataala. Padahal Ambo'mu ri surugaè naisseng makkedaè muwapparelluwang manengngiro. 33 Jaji usahakangngi riyolo', kuwammengngi napparènta Allataala ri laleng atuwo-tuwommu sibawa pogau'ni èlo-Na. Naiya manenna laingngè nawèrèttokko matu Allataala. 34 Rimakkuwannanaro, aja' mubata-bata passalenna esso bajaè. Saba' baja engka muto abata-batanna. Iyaè essoè genne'ni asussanna, dè'na naparellu mutambai. "
