1 Wettunna naita Yèsus tau maègaèro, menrè'ni ri tompo'-Na bulu-buluè. Tudannana, polèni ri Alèna sining tau iya maccowèriyèngngi, 2 nainappa napammulaini paggurui mennang: 3 "Masennangngi tau iya marasa dè'è pakkullènna na banna maddennuwang ri Puwangngè bawang; anggotanai iyanaritu umma'na Allataala! 4 Masennangngi tau iya messè atiè; risalèworiwi matu mennang ri Allataala! 5 Masennangngi tau iya pakariyawaèngngi atinna; narupaiwi matu Allataala jancin-Na lao ri mennang! 6 Masennangngi tau iya muddaniyè pogau'i èlona Allataala; ripaggenne'i matu apparelluwanna mennang ri Allataala! 7 Masennangngi tau iya mamasèiyèngngi tau laingngè; riyamasèi towi matu mennang ri Allataala! 8 Masennangngi tau iya mapaccingngè atinna; naissengngi matu mennang Allataala. 9 Masennangngi tau iya tiwiè assidamèngeng ri yelle'na tauwè; riyakuiwi matu mennang ri Allataala selaku ana'-ana'-Na! 10 Masennangngi tau iya nakennaè paccallang nasaba napogau'i èlona Allataala; anggota umma'nai Allataala! 11 Asennakko rèkko ricellako, ricalla, sibawa ripètenna nasaba Iyya. 12 Nabi-nabi iya tuwoè ri yolomu pura towi ricalla pada-padaèro. Mariyoriyono sibawa marennu, saba' battowai saromu iya napassadiyangengngèkko Puwangngè. " 13 "Ikona iyanaritu pejjèna linoè. Rèkko makawai pejjè, weddigga ripejjèi paimeng? Dè'na gaga gunana, sangadinna riyabbèyang mani nalèjja'-lèjja'i tauwè. 14 Ikona iyanaritu tajanna linoè. Kota monroè ri yasè'na bulu-buluè, dè' nariyullèi subbui. 15 Dè'gaga tau palluwa lampu, nainappa natongko iyaro lampuè sibawa baku. Mala nataroi iyaro lampuè ri onrong lampuè, kuwammengngi nabbèrè tajang lao ri tungke' tau ri laleng bolaèro. 16 Makkuwatoniro tajammu harusu'i mattappa ri yolona tauwè, kuwammengngi naitai tauwè pangkaukeng-pangkaukemmu madècèngngè, nainappa napojiwi Ambo'mu ri surugaè. " 17 "Aja' muwangga'i makkedaè engka-Ka polè untu' pallennye'i hukkung iya nabbèrèyangngè Musa sibawa pappagguruwanna nabi-nabiè. Engka-Ka polè tenniya untu' pallennye'i, iyakiya untu' mappaitangngi bettuwanna iya tongengngè. 18 Engngerangngi! Ri wettu engkana mupa langiè sibawa linoè, muwi sèddi hurupu' iyarè'ga tetti iya kaminang baiccu'è ri laleng hukkungngèro, dè' matu nariledda, rèkko dè'pa nakajajiyang maneng! 19 Rimakkuwannanaro, nigi-nigi majjalèkkaiwi sala sèddinna polè risining parèntaèro muwi iya kaminang baiccu'è, sibawa paggurui tau laingngè pogau'i makkuwaèttoro, mancajiwi matu iya kaminang baiccu'è ri yelle'na umma'na Allataala. Sibalè'na, nigi-nigi pajoppai iyaro hukkungngè sibawa paggurui tau laingngè pogau'i makkuwaèttoro, mancajiwi matu battowa ri yelle'na umma'na Allataala. 20 Jaji, èngngerangngi: Dè' nakkullèko mancaji umma'na Allataala, rèkko dè' mupakacauriwi guru-guru agamaè sibawa sining tau Farisiè ri laleng pogau'i èlona Allataala!" 21 "Muwisseng makkedaè ri nènè-nènèta engka pappagguruwang pada-padaèwè: Aja' muwabbuno; nigi-nigi mabbuno, harusu'i riadèlèki. 22 Iyakiya makkekkuwangngè makkeda-Ka lao ri iko, nigi-nigi macai lao ri tau laingngè, riadèlèkiwi matu; sibawa nigi-nigi cella-cellai tau laingngè, riadèlèkiwi matu ri yolona Mahkamana Agamaè. Sibawa nigi-nigi makkeda ri tau laingngè, 'Donggo', sitinajai riyabbèyangngi ri laleng api ranakaè. 23 Rimakkuwannanaro, rèkko sala sèddinna ri yelle'mu mattengngang makkasuwiyangengngi pabbèrèna lao ri Allataala, nanaèngngerangngi makkedaè engka tau mapeddi ati ri alèna, 24 sitinajai nasalai riyolo' pakkasuwiyannaro ri yolona mèzbaè, nalao sidamè iyaro tauwè. Purapiro, weddinni lisu nanakkasuwiyangengngi pabbèrèna ri Allataala. 25 Akkalarapanna engka tau mapparapekekko ri mahkamaè, sidamèko sibawa iyaro ri wettu engkana mupa wettu, sangadi dè'napa mulettu ri mahkamaè. Rèkko dè', nabbèrèyakko matu iyaro tauwè ri hakingngè, iya mabbèrèyangngèkko matu ri polisiè. Nainappa polisiè puttama'ko matu ri laleng tarungkuè. 26 Na èngngerangngi: Pasti dè' muwullèi massu polè ri tarungkuèro, riwettu dè'napa napura muwaja maneng sininna ridendangengngèkko. " 27 "Muwisseng makkedaè engka pappagguruwang pada-padaèwè: Aja' mumalaweng. 28 Iyakiya makkekkuwangngè makkeda-Ka ri iko: nigi-nigi mitai sèddiè makkunrai sibawa napessu maèlo pèjariwi, iyaro tauwè malawenni sibawa iyaro makkunraiè ri laleng atinna. 29 Rèkko mata ataummu nassabariko madosa, cukkèi namuwabbèyangngi iyaro mataè! Lebbi kessing muwi teddèng sala sèddinna anggota tubummu naiya sininna tubummu riyabbèyangngi ri laleng ranakaè. 30 Rèkko lima ataummu nassabariko madosa, rette'i namuwabbèyangngi iyaro limaè! Lebbi muwi teddèng siwali limammu naiya sininna tubummu muttama' ri ranakaè. " 31 "Engkato pappagguruwang makkuwaèwè: Tungke' tau iya massarangngè bainèna, harusu'i nawèrèng sure' telle. 32 Iyakiya makkekkuwangngè makkeda-Ka ri iko: nigi-nigi massarang bainèna padahal iyaro makkunraiè dè' nakèdo sala, nassabariwi iyaro bainè malaweng rèkko kawingngi paimeng iyaro bainèna. Sibawa nigi-nigi kawing sibawa makkunrai iya massarangngèro, malaweng towi. " 33 "Muwisseng makkedaè ri nènè-nènèta engka pappagguruwang makkuwaèwè: aja' muwassakkarengngi jancimmu. Aga pura muwajjanciyang sibawa mattanro ri yolona Allataala, harusu'i mupogau'. 34 Iyakiya makkekkuwangngè makkedaka lao ri iko: aja' sises-siseng muwattanro, muwi nasabbing langiè, saba' langiè iyanaritu kadèra arajanna Allataala, 35 iyarè'ga nasabbing tanaè, saba' tanaè iyanaritu akkalarenna ajè-Na; iyarè'ga nasabbing Yèrusalèm, saba' iyanaritu kotana Arung battowaè. 36 Aja'to muwattanro nasabbing ulummu, saba' dè' muwullèi mèbbui maputè gemme'mu iyarè'ga malotong, namuni silampa bawang. 37 Akkedako bawang, 'Eyyè' iyarè'ga 'Dè'' -- lebbi naiyaro polèi ri Ibillisi'. " 38 "Muwisseng makkedaè engkato pappagguruwang pada-padaèwè: mata risullèi mata, isi risullèi isi. 39 Iyakiya makkekkuwangngè makkeda-Ka lao ri iko: Aja' muwakkabale lao ri tau pogau'è ja lao ri iko. Sibalè'na rèkko naleppa'i tauwè pili ataummu, leppessangngi siya naleppa towi pili abèyomu. 40 Sibawa narèkko napparapekekko tauwè ri hakingngè, nanatuntu'i wajummu, wèrèng towi siya jumbamu. 41 Rèkko sèddiè tau makuwasa passako mèssangngi barangngè bèlana sèddi kilo, èssangngi duwa kilo bèlana. 42 Rèkko engka sèuwa naèllau tauwè ri iko, wèrèngngi siya. Sibawa aja'to musampèyangngi tau iya maèloè minreng sèuwa ri iko. " 43 "Muwisseng makkedaè engkato pappagguruwang pada-padaèwè: amasèiwi sellao-sellaomu namubenciwi sining balimmu. 44 Iyakiya makkekkuwangngè makkeda-Ka ri iko: amasèiwi sining balimmu, sibawa assempajangengngi sining tau iya cellaè'kko, 45 kuwammengngi mumancaji ana'-ana'na Ambo'mu ri surugaè. Saba' napaompoi Allataala mata esso-Na untu' tau makessingngè sibawa untu' tau iya majaètto. Napateppai bosinna untu' tau iya pogau'è atongengeng sibawa untu' tau iya pogau'è majaè. 46 Saba' rèkko iyami muwamasèi tau iya mamasèiyèkko, untu' aga Allataala harusu' nawale' pangkaukemmuro? Dè'ga nasining passinge' simaè pogau' towi makkuwaèro? 47 Narèkko banna sellao-sellaomu bawang mupassalama', aga alebbimmu? Sining tau iya dè'ètto naissengngi Allataala pogau' towi makkuwaèro! 48 Ambo'mu ri surugaè namasèiwi sininna tauwè sibawa sukku. Harusu' tokko makkuwaro. "
