1 Iyaro wettuè, polèni Yohanès Paccemmè ri padang kessi'è ri Yudèa mappammula makkatobba. 2 Adanna, "Toba'no polè ri dosa-dosamu, saba' dè'na namaitta napparènta matu Allataala selaku Arung!" 3 Yohanès iyanaè tau nakkattaiyè Nabi Yèsaya ri laleng adannaè, "Engka tau gora-gora ri padang kessi'è, 'Passadiyangengngi laleng Puwangngè; palapparengngi laleng Alèna. ' " 4 Pakèyang napakè Yohanès polèi ri bulu untaè. Babbanna polèi ri bingkulangngè, sibawa anrèna incalè sibawa cani ale'. 5 Maèga tau polè ri Yèrusalèm, polè ri sininna wanuwa Yudèa sibawa daèra-daèra seddèna Salo Yordan lao ri Yohanès. 6 Nangakuini mennang dosa-dosana, sibawa ricemmèni ri Yohanès ri Salo Yordan. 7 Maègato tau Farisi sibawa Saduki lao ri Yohanès untu' ricemmè. Iyakiya wettunna mennang naita polè, makkedani lao ri mennang, "Tau majako iko! Niga powadai makkedaè weddikko leppe' polè ri pahukkungenna Allataala iya maèloè polè? 8 Appaitanni ri laleng pangkaukemmu makkedaè toba'no polè ri dosa-dosamu. 9 Aja' muwasengngi muwullèi leppe' polè ri pahukkungengngè sibawa powadai makkedaè Abraham iyanaritu nènè-nènèmu. Engngerangngi, polè ri batu-batuèwè, naullèi Allataala mèbbu wija-wijanna untu' Abraham! 10 Sadiyani wasè untu' tubbangngi pong ngajuè lettu ri ure'-ure'na. Tungke' pong ngaju iya dè'è napowassèlè' buwa makessing ritubbangngi matu naribuwang ri laleng apiè. 11 Ucemmèko sibawa uwai untu' pannessai makkedaè toba'no polè ri dosa-dosamu; iyakiya iya maèloè polè ri munrikku, nacemmèko matu sibawa Rohna Allataala enrengngè api. Lebbi battowai na iyya. Muwi untu' tiwii sapatun-Na dè'to usitinaja. 12 Ri liman-Na engka pattapi untu' tapi manengngi gandon-Na gangka mapaccing. Napaddeppungengngi matu gandongngè ri laleng lappoè, iyakiya sininna awanna Natunui matu ri laleng api iya dè'è nawedding peddè. " 13 Iyaro wettuè laoni Yèsus ri Salo Yordan polè ri Galilèa. Nalaona kuwaro ri Yohanès sibawa mèllauwi naricemmè. 14 Iyakiya nacobai Yohanès sampèyangngi parèllaun-Naro. Makkedai Yohanès, "Iyya sitongenna harusu' ricemmè ri Bapa'. Namakkekkuwangngè mala Bapa' lao ri iyya. " 15 Iyakiya mappèbaliwi Yèsus, "Leppessanni siya untu' makkekkuwangngè. Saba' nallalengiro naripogau' iya manenna napuwèloè Allataala. " Jaji nacemmèni Yohanès Yèsus. 16 Puranana ricemmè, masitta'ni Yèsus massu polè ri uwai ri saloèro. Tappa tattimpa' muni langiè nanaitai Yèsus Rohna Allataala nonno pada-pada jangang-jangangngè ri yasè'na Yèsus. 17 Nainappa naèngkalingani saddanna Allataala makkeda, "Iyanaè Ana'-Ku iya Uwamasèiyè. Napèsennangi atik-Ku. "
