1 Maèlè senna'ni sininna kapala imangngè sibawa pamimpinna Yahudiè mèbbu apettung untu' mpunoi Yèsus. 2 Nabalengguni Yèsus, nanabbèrèyangngi lao ri Pilatus, gubernurna pamarènta Roma. 3 Wettunna Yudas, iya bali'bellariyèngngi Yèsus naita makkedaè ripakennaini pahukkungeng Yèsus, massessekalèni. Nainappa napalisu iyaro telluppuloè dowi pèra' ri kapala-kapala imangngè sibawa pamimping-pamimpinna Yahudiè. 4 Makkedani, "Madosaka bali'bellariwi tau iya dè'è asalanna, angkanna rihukkung matè!" Iyakiya mappèbaliwi mennang, "Magi naripaduli iyatu? Iyaro urusammu!" 5 Naggenrungenni Yudas iyaro dowiè muttama' ri Bolana Puwangngè, nainappa lao gattungngi alèna. 6 Naittèni kapala-kapala imangngè iyaro dowiè nakkeda, "Iyaè dowiè, dowi dara. Manuru' hukkunna agamaè, iyaè dowiè dè' nawedding riputtama' ri onrong akkasuwiyangengngè ri Bolana Puwangngè. " 7 Puranana mennang massèddi, napakèni mennang iyaro dowiè untu' melli tana iya riyasengngè Tanana Pakkèbbu Oringngè. Iyaro tanaè ripakèi untu' tampunna sining tau polè-polè. 8 Iyanaro saba'na lettu essoèwè iyaro tanaè riyasengngi "Tana Dara". 9 Na ri lalennaro, kajajajiyanni aga pura napowada Nabi Yèrèmia, iyanaritu, "Tarimai mennang telluppulo dowi pèra', iyanaritu elli nasitujuiyè bangsa Israèliè selaku pakkamaja untu' Alèna. 10 Na iyaro dowiè napakèi mennang untu' melliwi Tanana Pakkèbbu Oringngè, pada-pada iya pura napparèntangngè Puwangngè lao ri iyya. " 11 Wettunna Yèsus mangolo ri Pilatus, gubernurna wanuwaèro, makkutanani Pilatus, "Ikonaga Arunna tau Yahudiè?" Nappèbali Yèsus, "Makkuwaitu adatta puwang. " 12 Iyakiya wettunna kapala-kapala imangngè sibawa pamimping-pamimpinna Yahudiè pauwi maèga riteppuwangngi Yèsus, dè' sises-siseng nabaliwi. 13 Rimakkuwannanaro makkedani Pilatus lao ri Yèsus, "Dè'ga Muwèngkalingai iya maneng nateppuwangngèk-Ko mennanro?" 14 Iyakiya dè' nappèbali Yèsus muwi cèddè angkanna hèrang senna' iyaro gubernur-è. 15 Tungke' Ramè-Ramè Paskaè, biyasana gubernur-è malleppessang sèddi tau tarungku situru napilè tau maègaè. 16 Iyaro wettuè engka sèddi tau rihukkung iya tarompoènna. Asenna Yèsus Barabas. 17 Jaji, wettunna tau maègaè maddeppungenna, makkutanani Pilatus ri mennang, "Nigana muwèlori uleppessangekko? Yèsus Barabas iyarè'ga Yèsus iya riyasengngè Kristus?" 18 Makkeda makkuwairo Pilatus nasaba naissengngi makkedaè sining panguwasana Yahudiè mabbèrèyangngi Yèsus nasaba mangèmpurui mennang. 19 Wettunna Pilatus tudang ri onrong pangadèlèkengngè nakirinni bainèna pasengngèwè lao ri alèna, "Aja' mucampuru'i parakarana tau iya dè'è napasalaro, nasaba nakarena Alèna, mannippika' essoèwè iya mappakatau-tauè. " 20 Iyakiya kapala-kapala imangngè sibawa pamimping-pamimpinna Yahudiè matteru-terui napakiri-kiri iyaro tau maègaè untu' mèllauwi ri Pilatus kuwammengngi naripaleppe Barabas sibawa rihukkung matè Yèsus. 21 Nanakkutanasi iyaro gubernur-è lao ri mennang, "Niga muwèlori uleppessangekko polè ri iya duwa tauwèro?" Nappèbali mennang, "Barabas. " 22 Nakkutana Pilatus lao ri mennang, "Rèkko makkuwaitu, aga ugaukengngi Yèsus iya riyasengngè Kristus?" Nappèbali maneng mennang, "Sallii!" 23 Nakkutana Pilatus, "Iyakiya aga asalan-Na?" Napèdè' maladde'na mennang gora, "Sallii!" 24 Angkanna mainge'ni Pilatus makkedaè dè'na agaga wedding napogau' sibawa ajakkè maronta'i iyaro sining tauwè. Jaji malani uwai, na ri yolona iyaro tau maègaè bissaiwi limanna sibawa makkeda, "Dè' utanggung jawakiwi amatènna iyaè tauwè! Urusammu iyaè!" 25 Nappèbali iya maneng tau maègaèro, "Leppessanni idi sibawa ana'-ana'ta tanggungngi pahukkungengngè nasaba amatèn-Na!" 26 Nainappa Pilatus leppessangngi Barabas untu' mennang; sibawa nasuroi tauwè barasa'i Yèsus, sibawa nabbèrèyanna Yèsus untu' risalli. 27 Nainappa prajuri'-prajuri'na Pilatus natiwi Yèsus muttama' ri saorajana gubernur-è, naddeppungenna sininna tentaraè mattulilingiwi Yèsus. 28 Naludunni mennang pakèyanna Yèsus, nanapasangiwi jumba lango-lango. 29 Mèbbuni mennang sèuwa passigera' polè ri takkè-takkè maddoriè, nanapasangngi ri ulunna Yèsus. Nainappa napatètèngi jari ataun-Na sèuwa tekkeng, nainappa makkaluttu ri yolo-Na sibawa mèllèkèllè'i. Adanna mennang, "Oh Puwakku, Arunna Tau Yahudiè!" 30 Nammèccuini mennang sibawa nalai iyaro tekkengngè, nainappa naunru ulun-Na. 31 Puranana nacculè-culèi, naludunni iyaro jumba lango-langoè, nainappa napapasangi paimeng pakèyan-Na. Purairo natiwini massu untu' risalli. 32 Ri tengnga laleng, siruntu'i mennang sèddi tau polè ri Kirènè asenna Simon. Napassani mennang iyaro tauwè mèssangngi sallina Yèsus. 33 Lettu'nana mennang risèuwaè onrong iya riyasengngè Golgota, bettuwanna, "Onrong Tengkora". 34 Kuwaniro mennang napaènung Yèsus anggoro iya sicampuru'è essung. Iyakiya purana nakanyamè Yèsus iyaro anggoro'è, dè'na namaèlo mènungngi. 35 Nainappa nasalli mennang, sibawa nabagè-bagè pakèyan-Na sibawa naundi. 36 Purairo tudanni mennang jagaiwi kuwaro. 37 Ri yasè'na ulun-Na napasanni mennang oki iya riteppuwangngèngngi, iyanaritu: "Iyanaè Yèsus, Arunna Tau Yahudiè". 38 Nasalli towi mennang duwa parampo' silaong Yèsus; sèddi tau ri seddè ataun-Na, sèddi ri seddè abèyo-Na. 39 Sining tau iya lalowè kuwaro maccilic-ciling ulunna, sibawa nacella-cellana Yèsus. 40 Makkedai mennang, "Iko maèloè ruttungngi Bolana Allataala, sibawa patettongngi ri laleng tellungngesso! Rèkko Ana'nako Allataala, nonnono polè ri sallièro, namupassalama'i alè-Mu!" 41 Makkuwatoro kapala-kapala imangngè sibawa guru-guru agamaè enrengngè sining pamimpinna Yahudiè naèllèkèllè'ni Yèsus. Makkedai mennang, 42 "Napassalama'i tau laingngè, padahal Alèna dè' naullèi passalama'i! Rèkko arunnai Israèliè, madècènni makkekkuwangngè nonno polè ri sallièro, nainappaki maèlo mateppe' ri Alèna. 43 Mateppe'i ri Allataala, sibawa makkeda makkedaè Ana'nai Allataala. Nah, laono mai taitai maèlo muwiga Allataala passalama'i makkekkuwangngè. " 44 Parampo'-parampo' iya risalliè sibawa Alèna mala nacella-cella towi pada-padaèro. 45 Ri tangassonana, tellujjang ittana, sininna iyaro wanuwaè mapettang. 46 Tettè tellu arawèngngè, gorani Yèsus sibawa sadda maloppo, "Eli, Eli lama sabakhtani?" bettuwanna, "Oh Allataala-Ku, oh Allataala-Ku magi Musalai-Ka?" 47 Siyagangngarè tau kuwaro mèngkalingai iyaro gau'è, nakkeda, "Naobbii Elia!" 48 Engka sèddi tau polè ri mennang mapperi-perini lao mala bunga karang, nanapajajje'i ri laleng anggoro' makecciè, nainappa napasopo ri laleng cappa'na sèddiè aju, nanassoppakengngi ri tèmunna Yèsus. 49 Iyakiya tau laingngè makkedai, "Tajengngi, taitai polè arè'gi Elia passalama'i!" 50 Nainappa gorasi Yèsus sibawa sadda maloppo, nanasseppungenni nappase'-Na paccappurengngè. 51 Kaing paddenring iya taggattungngè ri Bolana Puwangngè makennè'ni mancaji duwa polè ri yasè' lettu ri yawa. Mpèwang tanaè sibawa mapuwè' sining bulu batuè. 52 Tattimpa' sining tampungngè, sibawa maèga umma'na Allataala iya matèènna tuwo paimeng. 53 Massu mennang polè risining tampungngè puranana Yèsus moto polè ri amatèngngè, sibawa muttama' ri Yèrusalèm. Namaèga tau mitai mennang kuwaro. 54 Kapalana tentaraè sibawa prajuri'-prajuri'na iya jagaiyèngngi Yèsus mètau senna'ni wettunna naita mpèwang tanaè sibawa sininna iya kajajiyangngèro. Makkedani mennang, "Tongeng, iyanaè Ana'na Allataala!" 55 Engkato kuwaro maèga makkunrai mitai polè mabèla. Iya mennang ritu pura maccowèriyèngngi Yèsus untu' tulungngi mappammulai polè ri Galilèa. 56 Ri yelle'na iyanaritu Maria Magdalèna, Maria indo'na Yakobus sibawa Yusuf, enrengngè indo'na ana'-ana'na Zèbèdèus. 57 Iyaro wenniè polèni sèddi tau sugi iya polè ri Arimatèa, iya riyasengngè Yusuf. Maccowè towi ri Yèsus. 58 Laoni ri Pilatus nanaèllauwi ujuna Yèsus. Nanapparèntanni Pilatus kuwammengngi nariwèrèng ujuna Yèsus. 59 Nalani Yusuf iyaro ujuè, nanadokoi sibawa kaing walu polè ri lènang iya mabaruè mupa. 60 Nainappa nataro ujuna Yèsus ri laleng tampung appunnangenna iya naèbbuè ri laleng sèddiè bulu-bulu batu. Purairo galèttèni sèddi batu loppo tongkoi sumpanna tampungngèro, nainappa meddè. 61 Maria Magdalèna sibawa Maria laingngè monroi tudang kuwaro moloiwi iyaro tampungngè. 62 Pappa bajanana, ri esso Saba'è, kapala-kapala imangngè sibawa sining tau Farisiè laoni silaong mangolo ri Pilatus. 63 Nakkeda, "Puwang, wettunna tuwo mupa iyaro pabbellèngngè, riyèngngerangngi purai makkeda, 'Labe'na tellungngesso moto'-Ka matu. ' 64 Rimakkuwannanaro, suroi tauwè jagaiwi iyaro tampungngè madècèd-dècèng narapi esso matelluè, kuwammengngi ana'-ana' gurun-Na dè' naullèi mènnauwi uju-Na nainappa makkeda lao risining tauwè makkedaè purani ripaoto' polè ri amatèngngè. Na bellè iya paccappurengngèwè lebbi majapi naiya mammulangngè. " 65 Nakkeda Pilatus lao ri mennang, "Namappunnaiko tentara pengawal, laono mujagaiwi iyaro tampungngè madècèd-dècèng. " 66 Nalaona ri tampungngè, nasègèlè'i batu pattongkona sibawa taro tau jaga ri yolona, kuwammengngi nadè'gaga tau ganggui iyaro tampungngè.
