1 "Rèkko polèi Ana'na Tolinoè selaku Puwang, keadaanna pada-padai ri laleng pakkalarapangngèwè: Engka seppulo ana'dara tinrosiwi bottingngè tungke'-tungke' mala pajjennangeng, nainappa lao duppaiwi bottimpuranè. 2 Na lima tau polè ri mennang madonggo sibawa lima lainna mapanrè. 3 Iya lima ana'dara madonggoè tiwii pajjennangeng, iyakiya dè' natiwi bokong minnya'. 4 Iya lima ana'dara mapanrè tiwii pajjennangeng sibawa bokong minnya'. 5 Iyaro bottimpuranè matengnge'i polè, nacakkarudduna iyaro ana'-ana'daraè angkanna matinro. 6 Tengnga benni nappa ritu naèngkalinga sadda gora, 'Polèni bottimpuranè! Laono mai muduppaiwi!' 7 Moto'ni iyaro seppuloè ana'dara, nanatunuiwi pajjennangenna mennang. 8 Nakkeda ana'-ana'dara iya madonggoè lao ri mapanrè, 'Wèrèkki cèddè minnya'mu, saba' maèloi peddè pajjennangetta. ' 9 Nappèbali iyaro ana'-ana'dara mapanrè, 'Dè' nawedding, nasaba dè' matu nagenne minnya'ta untu' idi maneng. Laono muwelli ri tokoè!' 10 Nalaona iyaro ana'-ana'dara iya madonggoè melli minnya'. Ri wettu laona mennang, lettu'ni bottimpuranè. Iyaro limaè ana'dara iya sadiyaènna muttama'ni silaong bottimpuranè ri onrong pèstaè, narisuluna tange'è! 11 Purairo lettu'ni ana'-ana'dara laingngè. Gorani mennang, 'Puwang, Puwang, timpakekki tange'. ' 12 Iyakiya mappèbaliwi bottimpuranè, 'Dè' Uwissekko!' " 13 Nainappa natutu'ni Yèsus pakkalarapangngèro makkuwaè, "Rimakkuwannanaro jaga-jagako, saba' dè' muwissengngi essona iyarè'ga wettunna. " 14 "Rèkko polèi Ana'na Tolinoè selaku Puwang, keadaanna pada-pada towi ri laleng pakkalarapangngèwè. Engka sèddi worowanè maèlo lao ri onrong mabèlaè. Naobbini sining pattumaninna, nainappa nappaddettangeng waramparanna ri mennang. 15 Nawèrènni lao ri tungke' pattumanièro situru pakkullènna tungke'-tungke'. Lao risèddiè tau nawèrèngngi limassebbu dowi laweng. Laingngè nawèrèngngi duwassebbu dowi laweng sibawa lao risèddièppa nawèrèngngi sisebbu dowi laweng. Nainappa joppa. 16 Pattumani iya tarimaè limassebbu dowi laweng masitta'ni lao dangkang, nasarona limassebbu dowi laweng. 17 Makkuwatoro pattumani iya tarimaè duwassebbu dowi laweng saro toni duwassebbuto. 18 Iyakiya pattumani iya lolongengngè sisebbu dowi laweng laowi kali kalebbong ri tanaè, nanasubbui dowina puwanna kuwaro. 19 Maitta senna' puranaro, lisuni puwanna iyaro sining pattumaniè, nappammula mappasilolongeng sibawa mennang. 20 Polèni pattumani iya lolongengngè limassebbu dowi laweng, nanabbèrèyangngi seppulo sebbu. Adanna, 'Puwang, limassebbu dowi laweng tawèrèkka Puwang. Taitani, lolongessika saro limassebbu. ' 21 Nakkeda iyaro puwanna, 'Madècènni, iko iyanaritu pattumani iya makessingngè sibawa matinuluè. Nasaba weddikko riyatepperi lao ri iya cèddè'è, maèloka mappaddettangengngi iya maègaè lao ri iko. Uttama'no sibawa accowèno massennas-sennang sibawa iyya. ' 22 Nainappa polèni iyaro pattumani tarimaè duwassebbu dowi laweng, nakkeda, 'Puwang, duwassebbu dowi laweng tawèrèkka Puwang. Taitani, lolongessika saro duwassebbusi. ' 23 Nakkeda iyaro puwanna, 'Madècènni, ikonatu pattumani iya makessingngè sibawa matinuluè. Nasaba weddikko riyatepperi lao ri iya cèddè'è, maèloka mappaddettangengngi iya maègaè lao ri iko. Uttama'no sibawa accowèno massennas-sennang sibawa iyya!' 24 Nainappa polèni iyaro pattumani iya lolongengngè sisebbu dowi laweng, nanakkeda, 'Puwang, uwissekki sèddi tau iya mabecco'è. Maccèppu buwaki Puwang ri onrong dè'è tattaneng, sibawa mèngngalaki ri onrong dè'è tamporiwi binè. 25 Mètauka, jaji laoka subbui dowita Puwang ri lalenna tanaè. Engkaniè dowita Puwang. ' 26 Nakkeda iyaro puwanna, 'Ikonatu pattumani maja sibawa makuttu! Dè'ga napura muwissengngi makkedaè maccèppu buwaka ri onrong dè'è uwattaneng, sibawa mèngngala ri onrong dè'è uwampo binè? 27 Rèkko makkuwaitu, sitongenna harusu'ko taroi iyaro dowiku ri bangngè, kuwammengngi ri wettukku lisu, weddingngi utarima iyaro dowiku sibawa bungana. 28 Rimakkuwannanaro, alai iyaro dowiè polè ri alèna, namuwèrèngngi tau iya mappunnaiyè seppulo sebbu dowi laweng. 29 Nasaba tau iya mappunnaiyènna, riwèrèngngi matu lebbi maègapa, na alebbinna matu. Iyakiya tau iya dè'è nappunnai, cèddè iya engkaè mupa ri alèna riyala towi matu. 30 Na iyaro pattumani dè'è nakkèguna, buwanni ri laleng pettangngè ri saliweng. Kuwaniro matu teri sibawa manrasa-rasa!' " 31 "Rèkko polèi Ana'na Tolinoè selaku Arung ritinrosi ri sininna malaèka'-Na, tudangngi matu ri yasè'na kadèra arajan-Na iya malebbiè. 32 Sininna bangsaè ri linoè ripaddeppungengngi matu ri yolo-Na. Nainappa napassarang mennang mancaji duwakkonrong pada-pada pakkampiè pallaisengngi bimbala'è polè ri bèmbè'è. 33 Sining tau iya pogau'èngngi èlona Allataala ripaddeppungengngi ri seddè ataun-Na, na laingngè ri seddè abèyo-Na. 34 Nainappa makkeda matu iyaro Arungngè lao risining tauwè ri seddè ataun-Na, 'Laono mai iko iya nabarakkakiyè Ambo'-Ku. Uttama'no ri laleng akkarungeng iya napassadiyangengngèkko mappammulai pammulanna linoè. 35 Saba' ri wettuk-Ku malupu, muwèrèk-Ka nanrè, sibawa ri wettuk-Ku madekka, mupainuk-Ka. Tau polè-polè-Ka, mutarima-Ka ri bolamu. 36 Dè' Uwappakèyang, muwèrèk-Ka pakèyang. Malasa-Ka, laoko cèllèngi-Ka. Ritarungku-Ka, laoko tuluk-Ka. ' 37 Nakkedana matu iyaro sining tauwè, 'Puwang, maraganna riitaki Puwang malupu nariwèrèkki nanrè Puwang, iyarè'ga madekka naripainukki Puwang? 38 Maraganna nariitaki Puwang selaku tau polè-polè, nariduppaiki Puwang muttama' ri lalempolata? Maraganna Puwang dè' tappakèyang, nariwèrèkki pakèyang Puwang? 39 Maraganna nariitaki Puwang malasa, iyarè'ga ritarungku, naritulukki Puwang?' 40 Nappèbali matu iyaro Arungngè, 'Issenni: wettunna mupogau' gau'èro, namuni lao risala sèddinna polè ri silessu-silessurek-Ku iya kaminang matunaè, mupogau' tonitu lao ri Iyya!' 41 Nainappa makkeda matu iyaro Arungngè lao risining tauwè ri seddè abèyo-Na, 'Addèsu'no jahanam! Uttama'no ri laleng api iya dè'è nawedding peddè, iya puraè ripassadiya untu' Ibillisi' sibawa malaèka'-malaèka'na! 42 Saba' ri wettuk-Ku malupu, dè' muwèrèk-Ka nanrè; wettuk-Ku madekka, dè' mupainuk-Ka. 43 Sèddi-Ka tau polè-polè, dè' mutarima-Ka ri lalempolamu. Temmappakèyak-Ka, dè' muwèrèk-Ka pakèyang. Malasa-Ka sibawa ritarung-Ku, dè' mujampangi-Ka. ' 44 Namakkeda mennang ri Alèna, 'Puwang, maraganna Puwang nariitaki malupu, iyarè'ga madekka, iyarè'ga selaku tau polè-polè, iyarè'ga temmappakèyang, iyarè'ga malasa, iyarè'ga ritarungku nadè' ritulukki Puwang?' 45 Nappèbali matu iyaro arungngè, 'Issenni: ri wettunna dè' mumaèlo tulungngi sala sèddinna tau iya kaminang matunaèwè, bettuwanna dè'totu mumaèlo tuluk-Ka. ' 46 Narihukkung matu iyaro sining tauwè sibawa pahukkungeng mannennungengngè, nasining tau pogau'èngngi èlona Allataala napèneddingiwi matu atuwong tongengngè sibawa mannennungengngè. "
