1 Nakkeda Yèsus lao ri tau maègaè sibawa ri ana'-ana' gurun-Na, 2 "Guru-guru agamaè sibawa sining tau Farisiè lolongeng akuwasang untu' tassèrè'i hukkunna Musa. 3 Rimakkuwannanaro atinuluriwi sibawa turusiwi sininna napparèntangngè mennang. Iyakiya aja' mupogau'i aga iya napogau'è mennang, saba' dè' napajoppai mennang aga nappagguruwang mennang. 4 Natuntu'i mennang gau'-gau' mawatangngè sibawa mabbèrèi peraturang-peraturang iya matane'è, iyakiya muwi cèddè dè'to natulungngi tauwè pajoppai. 5 Sininna napogau'è mennang banna untu' naita tauwè bawang. Nattungka mennang pakè tulu sempajang iya malebba'è sibawa palampèriwi jombè-jombè jumbana mennang! 6 Napoji sining onrong iya makessingngè ri pèstaè, sibawa kadèra-kadèra magelloè ri bola assompangngè. 7 Napoji mennang ripakalebbi ri tauwè ri pasaè sibawa riyobbi 'Pa' guru'. 8 Iyakiya iko, aja' mumaèlo riyobbi 'Pa' Guru', saba' sèddi bawang Gurummu, na iko maneng massilessurekko. 9 Sibawa aja' muwobbii sèddiè tau ri linoèwè 'Ambo', saba' sèddi bawang Ambo'mu, iyanaritu Ambo' ri surugaè. 10 Na aja'to mumaèlo riyobbi 'Pamimping', saba' sèddi bawang pamimpimmu, iyanaritu Arung Pappassalama'è iya najjanciyangngè Allataala. 11 Tau iya kaminang battowaè ri yelle'mu, harusu'i mancaji pattumanimmu. 12 Tau iya pakatanrèngngi alèna ripakariyawai matu, na tau iya pakariyawaèngngi alèna ripakatanrèi matu. " 13 "Cilakano iko guru-guru agamaè sibawa sining tau Farisiè! Mupoji mabbonga-bonga. Mulawa-lawaiwi tauwè untu' mancaji wargana umma'na Allataala. Nadè' mumaèlo mancaji wargana umma'na Allataala, na tau laingngè iya maèloè mulawa-lawaiwi. [ 14 Cilakano iko guru-guru agamaè sibawa sining tau Farisiè: Mupoji mabbonga-bonga. Mubellèi sining jandaè sibawa murampasa'i bolana, na untu' tongkoi jamuro massempajakko malampè'. Iyanaro saba'na namatane matu pahukkungemmu!] 15 Cilakano iko guru-guru agamaè sibawa sining tau Farisiè! Mupoji mabbonga-bonga! Laoko mabèla limbang tasi', sibawa sollèriwi pottanangngè banna untu' puttama'i sèddiè tau ri agamamu. Namuttama'nana iyaro tauwè ri agamamu, muwèbbui mennang calonna ranakaè iya wèkkaduwaè lebbi maja naiya iko! 16 Cilakano iko sining pamimping butaè! Muwappagguruwangngi makkuwaè, 'Rèkko nattanrowangngi tauwè Bolana Puwangngè, iyaro tauwè dè' natassiyo ri tanrona; iyakiya rèkko nattanrowangngi ulaweng engkaè ri laleng Bolana Puwangngè, tassiyoi ri tanrona. ' 17 Iko sining tau donggo iya butaè! Kèga lebbi penting, ulawenna iyarè'ga Bolana Puwangngè iya pancajiyèngngi ulawengngèro mapaccing? 18 Muwappagguruwang towi iyaè, 'Rèkko sèddiè tau nattanrowangngi mèzbaè, iyaro tauwè dè' natassiyo ri tanrona; iyakiya rèkko nattanrowangngi pakkasuwiyang iya engkaè ri yasè'na mezbaèro, tassiyoi ri tanronaro. ' 19 Anengka makkuwa butamu! Kèga lebbi penting? Pakkasuwiyammu iyarè'ga mèzba iya pancajiyèngngi pakkasuwiyangngèro mapaccing? 20 Rimakkuwannanaro, rèkko sèddiè tau mattanrowangngi mèzbaè, bettuwanna nattanrowangngi mèzbaè sibawa sininna pakkasuwiyang iya engkaè ri yasè'na. 21 Narèkko sèddiè tau nattanrowangngi Bolana Puwangngè, bettuwanna iyaro nattanrowangngi Bolana Puwangngè, sibawa Allataala iya monroè kuwaro. 22 Rèkko sèddiè tau mattanrowangngi surugaè, bettuwanna iyaro nattanrowangngi kadèra arajanna Puwangngè sibawa Allataala iya tudangngè ri yasè'na kadèra arajangngèro. 23 Cilakano iko guru-guru agamaè sibawa sining tau Farisiè! Mupoji mabbonga-bonga. Rampa-rampa padaè talasi, adas cenning, sibawa jintang, muwabbèrèyangngi tawa seppulona untu' Puwangngè. Padahal gau'-gau' iya kaminang pentingngè ri laleng hukkung-hukkunna agamaè, padaènna: Adèlèkengngè, pammasè sibawa atinulurengngè dè' mubati-batiwi. Padahal iyaro sitongenna harusu' mupogau', sibawa dè'nato muwallupaiwi laing-laingngè. 24 Iko pamimping-pamimping butako! Mupanapii lale'è ri laleng uwai ènungemmu padahal untaè muwemme! 25 Cilakano iko guru-guru agamaè sibawa sining tau Farisiè! Mupoji mabbonga-bonga! Mangko'-mangko'mu sibawa sining pennèmu mubissaiwi mapaccing bagiyang saliwenna, padahal bagiyang ri lalenna macarèpa senna' sibawa gau'-gau' iya mulolongengngè sibawa apèddarang enrengngè angowang. 26 Eh tau Farisi iya butaè! Bissaiwi riyolo' mapaccing-paccing bagiyang ri lalenna mangko'-mangko'mu sibawa sining pennèmu, kuwammengngi namapaccitto bagiyang saliwenna! 27 Cilakano iko guru-guru agamaè sibawa tau Farisiè! Mupoji mabbonga-bonga! Pada-padako tampung iya riparada putè; makessing riita ri saliwenna, iyakiya ri lalenna penno buku-buku sibawa sininna iya makebbongngè. 28 Makkuwa tokkoro iko. Polè saliweng makessikko paita lao ri tauwè; iyakiya ri lalenna, pennoko sibawa apalessuwang enrengngè palanggarang-palanggarang. " 29 "Cilakano iko guru-guru agamaè sibawa sining tau Farisiè! Mupoji mabbonga-bonga! Muwèbburengngi tampung nabi-nabiè iya makessingngè, sibawa bèlo-bèloiwi tugu-tugu apparèngngerangenna sining tau iya makessingngè atuwo-tuwonna. 30 Namumakkeda, 'Akkalarapanna tuwoki ri wettunna nènè-nènèta riyolo, dè' taccowè sibawangngi mennang mpunoi nabi-nabiè. ' 31 Jaji alèmu mangakuiwi makkedaè iko ritu wija-wijanna sining tau iya mpunoèngngi nabi-nabiè! 32 Rèkko makkuwaitu, patteruni sibawa pacceppini dosa-dosa iya puraè napammulai nènè-nènèmuro! 33 Majako sibawa wija-wijanna tau majako! Pèkkugi weddikko passalama'i alèmu polè ri pahukkungenna ranakaè? 34 Engkalingai madècèd-dècèng: Maèlo-Ka kiringngi lao ri iko nabi-nabiè, sining tau maccaè sibawa guru-guruè; sibagiyanna mennang muwunoi matu, na sibagiyanna laingngè musallii. Engka matu mupanrasa-rasa ri laleng sining bola assompangngè, sibawa mulellungngi polè risèddiè kota lao ri kota laingngè. 35 Rimakkuwannanaro, rihukkukko matu nasaba abbunowang iya mupogau'è lao ri sininna tauwè iya dè'è asalanna -- mappammulai riyunona Habèl iya dè'è napasala, lettu riyunona Zakharia ana'na Bèrèkia, iya muwunoè ri pallawangenna Bolana Puwangngè sibawa mèzbaè. 36 Ateppe'no. Iya manennaro natanggungngi matu sining tauwè makkekkuwangngèwè!" 37 "Yèrusalèm, Yèrusalèm! Muwunoi nabi-nabiè, sining surona Allataala mugenrungiwi batu gangka matè. Malèwe'ni maèlo-Ka pasipuppung manengngi pabbanuwamu pada-pada indo' manu'è iya rokongiyèngngi ana'-ana'na ri yawana pannina, iyakiya dè' mumaèlo! 38 Rimakkuwannanaro dè'na nasibawakko Allataala. 39 Issenni: Mappammulai makkekkuwangngè dè'na muwita-Ka narapi makkedako, 'Ribarakkakiwi iya polè sibawa asenna Puwangngè. ' "
