1 Macawè'nana ri Yèrusalèm, lettu'ni mennang ri Bètfagè ri Bulu-bulu Zaitun. Kuwaniro nasuro Yèsus duwa ana' gurun-Na joppa lebbi riyolo. 2 Nappaseng Yèsus ri mennang, "Laono ri kampong engkaè ri yolomuro. Namuwitai matu sikaju kaleddè tassiyo silaong ana'na. Leppessang duwai namutiwii mai. 3 Rèkko engka tau makkutana, powadangngi iyaro tauwè, 'Napparelluwangngi Puwangngè, ' na iyaro tauwè naleppessangngi matu iyaro kaleddè'è muwala. " 4 Makkuwaniro gau'è kuwammengngi nakajajiyang aga napowada nabiè pada-padaèwè, 5 "Powadanni lao ri Sion, polèni Arummu ri iko. Malemma kininnawai sibawa tonangi sikaju kaleddè, sikaju ana' kaleddè lolo. " 6 Nalaona iya duwaro ana' gurunna Yèsus napogau'i pada-pada ripasengengngèngngi mennang ri Yèsus. 7 Natiwini mennang iyaro kaleddè'è silaong ana'na. Nainappa nalapiki mennang iyaro sining kaleddè'è sibawa jumbana. Nainappa natonangi Yèsus. 8 Maèga tau kuwaro pallebba'i sining jumbana ri lalengngè, na tau laingngè rette'i takkè-takkè aju nanatale'i ri tengnga-tengnga lalengngè. 9 Tau maègaè iya joppaè ri yolo sibawa ri monrinna Yèsus gora-gorani, "Tuwoi Ana' Daud! Ribarakkakiwi iya polè ri laleng asenna Puwangngè! Pojini Allataala Iya Pommatanrè!" 10 Wettunna Yèsus muttama' ri Yèrusalèm, marukkani sining pabbanuwana kotaèro. Nakkutana sining tauwè, "Niga iyaè?" 11 Nappèbali tau maègaè iya tinrosiyèngngi Yèsus, "Alèna Nabi Yèsus, polè ri Nazarèt ri Galilèa. " 12 Nainappa muttama'ni Yèsus ri Bolana Puwangngè, nanarukkai sining tau mabbalu'-baluè sibawa mangelliyè kuwaro. Nabalè'i mèjanna passèlè dowiè, sibawa bangko-bangkona pabbalu jangang-jangangngè. 13 Nakkeda lao risining tauwèro, "Ri laleng Kitta'è tarokii makkedaè napowadai Allataala, 'Riyasengngi matu Bola-Ku bola onrong massempajang. ' Iyakiya iko mupancajiwi saranna paddampo'è!" 14 Polèni ri Yèsus sining tau butaè sibawa pèso'è ri Bolana Puwangngè, naripajjappa mennang ri Yèsus. 15 Iyakiya kapala-kapala imangngè sibawa guru-guru agamaè macaii mitai sining anu makalallaing iya napogau'è Yèsus. Sibawa macai towi mennang mèngkalingai ana'-ana'è gora-gora ri Bolana Puwangngè, "Tuwoi Ana' Daud!" 16 Nakkeda mennang lao ri Yèsus, "Muwèngkalingaga napowadaè mennang?" Nappèbali Yèsus, "Iyyè, Uwèngkalinga. Dè'paga naengka mubacai aya' Kitta'è: 'Ana'-ana'è sibawa ana'loloè purani Mupagguru untu' powadai pappojiyang sukkuè?' " 17 Nainappa Yèsus salaiwi mennang, nanassu polè ri kotaèro nalao ri Bètania, nanabbenni kuwaro. 18 Maèlèni pappa bajana, ri laleng allalengenna lisu ri kotaè, malupuni Yèsus. 19 Naitana sipong ara ri wiring lalengngè. Nalaona ri pong araèro, iyakiya dè' nalolongengngi muwi sèddi buwa sangadinna daud-daung bawang. Nainappa makkeda Yèsus lao ri pong ajuèro, "Dè'na muwabbuwana matu!" Tappa matteru makelle iyaro pong araè. 20 Wettunna ana'-ana' gurunna Yèsus naita iyaro kajajiyangngè, hèrang senna'ni mennang. Nakkutana mennang, "Pèkkugi wedding matteru matè siseng iyaro pong araè?" 21 Nappèbali Yèsus, "Tongeng. Rèkko mateppe'ko sibawa dè' mubata-bata, wedding tokko pogau'i aga iya puraè Upogau' lao ri pong araè. Natenniya iyaro bawang, mala mullèto matu makkeda lao ri bulu-buluèwè, 'Tarakkano sibawa lèttè ri laleng tasi'è'; nakajajiyang matu iyaro gau'è. 22 Agi-agi muwèllau ri laleng sempajammu, mutarimai matu, assaleng mateppe'ko. " 23 Nainappa lisuni Yèsus ri Bolana Puwangngè, nanauttama sibawa mappagguru kuwaro. Wettun-Na mappagguru, polèni kapala-kapala imangngè sibawa sining pamimpinna Yahudiè ri Alèna nanakkutana, "Aga nallalengi na-Mupogau'i iya manennaro? Niga mpèrèk-Ko ha'?" 24 Nappèbali Yèsus, "Maèlo tokka makkutana ri iko. Narèkko mubaliwi, nainappa Upowadakko ha' niga nasibawang Upogau'i gau-gau'èwè. 25 Ha' niga napakè Yohanès Paccemmè? Allataala iyarè'ga tolinoè?" Nappammulana kapala-kapala imangngè sibawa sining pamimpinna Yahudiè barunding ri yelle'na mennang, "Rèkko makkedaki, 'Sibawa ha'na Allataala, ' makkedai matu, 'Rèkko makkuwaitu magi nadè' mumateppe ri alèna?' 26 Iyakiya rèkko makkedaki, 'Sibawa ha'na tolinoè', ' mètauki lao ri tau maègaè, saba' nangga' manengngi mennang Yohanès sèddiwi nabi. " 27 Jaji mappèbaliwi mennang, "Dè' taissengngi. " Nakkeda Yèsus lao ri mennang, "Rèkko makkuwaitu dè'to Umaèlo powadakko ha' niga nasibawang Upogau'i iya manennaro. " 28 Nakkeda Yèsus, "Pèkkugi pallolongemmu makkekkuwangngè passalenna gau'èwè? Engka sèddi ambo' mappunnai duwa ana' worowanè. Iyaro tauwè laowi ri ana'na macowaè sibawa makkeda, 'Na', laono iyaè essoè majjama ri dare' anggoro'è. ' 29 Nappèbali iyaro ana'è, 'Dè' umaèlo. ' Iyakiya rimunri, napinrai pikkiranna nanalao ri dare' anggoro'èro. 30 Nainappa iyaro ambo'è laosi ri ana'na maduwaè, napowadangngi pada-pada ana' macowaè. Nappèbali iyaro ana' maduwaè, 'Madècènni Ambo'. ' Iyakiya dè' nalao. 31 Nari yelle'na iya duwa ana'èro, nigana pogau'i èlona ambo'na?" Nappèbali kapala-kapala imangngè sibawa sining pamimpinna Yahudiè, "Iya macowaè. " Nakkeda Yèsus lao ri mennang, "Ateppe'no: Sining passinge' simaè sibawa sining makkunrai cakkuribangngè poddiyoloiko matu mancaji anggotana umma'na Allataala naiya iko. 32 Nasaba polèi Yohanès Paccemmè, sibawa mappaitangngi lao ri iko cara atuwong iya naèloriyè Puwangngè, iyakiya iko dè' mumaèlo mateppe' ri pappagguruwanna, na sining passinge' simaè sibawa sining makkunrai cakkuribangngè mateppe'i ri alèna. Iyakiya namuni purani muwita iya manennaro, dè'to mupinrai pikkirammu sibawa dè' mumateppe ri Puwangngè. " 33 Nakkeda Yèsus, "Engkalingai iyaè pakkalarapangeng sèddièppa. Engka sèddi punna tana tanengiwi sèuwaè dare' anggoro. Nasappoi mattulili, sibawa kalinna kalebbong untu' napparaki anggoro, nainappa napatettongeng langkiyang anganrowangeng. Purairo nappassèwanni iyaro dare' anggoro'è lao risining pajjamana, nainappa lao ri wanuwa laingngè. 34 Narapinana wettunna maccèppu buwa anggoro, nakirinni iyaro punna tanaè sining pattumaninna lao risining pajjamana dare' anggoro'èro untu' tarimai bagiyanna. 35 Iyakiya iyaro sining pajjamana dare' anggoro'è natikkengngi iyaro sining pattumaninna punna tanaè: Iya sèddiè nabarasa'i, iya laingngè naunoi, na laingngèssi nagenrungiwi batu. 36 Nakirissi punna tanaèro sining pattumani laingngè. Iyakiya rigaukeng towi sibawa cara pada-padaè dènrè. 37 Angkanna iyaro punna tanaè nakirinni lao ri mennang ana' ri alèna. Pikkiri'na, 'Pasti napakalebbii matu iyaro ana'ku. ' 38 Iyakiya wettunna iyaro sining pajjama dare' anggoro'è naita ana'na punna tanaèro, makkedani mennang sèddiè lao ri laingngè, 'Iyanaè ahli warisi'na. Laono mai taunoi, kuwammengngi narilolongeng warisi'na!' 39 Natikkenni iyaro ana'è, nanabuwangngi massu, nanaunoi. " 40 Nakkutana Yèsus, "Rèkko lisui iyaro punna dare' anggoro'è, aga napogau' lao risining pajjamaèro?" 41 Nappèbali mennang, "Pasti naunoi matu iyaro sining tau majaè, nainappa nappassèwang iyaro dare' anggoro'è lao ri tau laingngè iya maèloè mabbèrèyangngi bagiyanna polè ri wassèlè tanaèro ri wettunna. " 42 Nakkeda Yèsus lao ri mennang, "Dè' paga mubacai iya tarokiè ri laleng Kitta'è? 'Batu iya dè'è napakèi tukang bangunangngè mancajiwi batu iya poko'è. Iyanaè pangkaukenna Puwangngè, temmaka gellona!' " 43 Nakkeda Yèsus, "Jaji èngngerangngi, sininna ha'è selaku umma'na Allataala ribèbbui matu polè ri iko nariwèrèng lao risèddiè bangsa iya pajoppaèngngi parènta-parèntana Allataala. [ 44 Tau iya sempè'è polè ri batuèro, ancuru'i matu, na tau iya nageppaè iyaro batuè, nalèlui matu mancaji awu. ]" 45 Wettunna naèngkalinga kapala-kapala imangngè sibawa sining tau Farisiè iyaro sining pakkalarapangenna Yèsus, naissenni mennang makkedaè mabbicarai Yèsus passalenna mennang. 46 Jaji makkuragani mennang tikkengngi. Iyakiya mètaui lao ri tau maègaè, saba' iyaro tau maègaè nangga'i Yèsus sèddiwi nabi.
