1 "Rèkko mapparèntai Allataala, keadaanna pada-padai pakkalarapangengngèwè: Engka sèddi tau mappunnai dare' anggoro, massui ri èlèè untu' sappa tau majjama ri dare' anggoro'na. 2 Nasitujuinnana untu' riwaja' mennang sèddi dowi pèra' si esso, nasuroni majjama ri dare' anggoro'na. 3 Tettè asèra èlèè, laosi iyaro punna dare'è, nanaitai siyagangngarè tau ri pasaè dè' jamanna. 4 Nakkedana lao ri mennang, 'Laono majjama ri dare' anggoro'ku. Uwajapo sibawa gaji iya sitinajaè. ' 5 Laoni mennang. Tettè seppulo duwa tangassoè sibawa tettè tellu arawèngngè, massusi iyaro punna dare'è nanapogau'i gau' pada-padaè. 6 Kira-kira tettè lima arawèngngè, massusi nanaitai engka mupa tau dè' jamanna. Nanakkutana lao ri mennang, 'Magi mutettong puppu esso kuwaè dè' gaga mupogau'?' 7 Nappèbali iyaro sining tauwè, 'Dè'gaga tau pajjamaki. ' Nakkeda iyaro punna dare'è, 'Rèkko makkuwaitu, laono majjama ri dare' anggoro'ku. ' 8 Labunnana essoè, makkedani iyaro punna dare' anggoro'è lao ri mandoro'na, 'Obbini iyaro sining pajjamaè, namuwajai gajinna tungke'-tungke', mappammulai muttama'è poddimonriè gangka iya bungè muttama'è. ' 9 Napolèna sining pajjamana iya mappammulaè majjama tettè lima arawèngngè. Tungke'-tungke' tarima sèddi dowi pèra'. 10 Napolè tona sining pajjama iya risèuwaè mappammula èlèè. Mappikkiri'ni mennang tentu lebbi mennang natarima matu. Padahal sèddi tommi dowi pèra' bawang riwèrèngngi. 11 Wettunna natarima iyaro dowiè, mannoko'-noko'ni mennang lao ri punna dare'è: 12 'Iyaro sining pajjama iya polè poddimonriè sijammi bawang majjama. Na idi'è si essoki majjama ri yawana tire' pella kessoè, iyakiya Puwang mpajai mennang pada-pada idi'!' 13 Nappèbali iyaro punna dare' anggoro'è lao ri sala sèddinna polè ri mennang, 'Eh sellao, dè' upassala lao ri iko. Dè'ga na iko situjui tarima gaji sèddi dowi pèra' untu' majjama si esso? 14 Nah, alani gajimmu namulao. Mèmeng macinnaka mpèrèngngi tau iya muttama'è poddimonri, gaji iya padaè uwèrèngngèkko. 15 Dè'ga naweddikka pogau'i sièloku lao ri appunnangekku? Iyarè'ga mangèmpurukoga, nasaba makacuwaka?' " 16 Nainappa makkedasi Yèsus, "Makkuwa toniro sining tau iya poddimonriè mancaji matu poddiyolo, nasining tau poddiyoloè mancajiwi matu poddimonri. " 17 Wettunna Yèsus mattuju ri Yèrusalèm, ri tengnga laleng Naobbini iya seppulo duwa ana' gurun-Na maddeppungeng. Nakkeda lao ri mennang, 18 "Engkalingai! Makkekkuwangngè mattujuki ri Yèrusalèm. Kuwaniro riyabbèrèyang matu Ana'na Tolinoè lao ri kapala-kapala imangngè sibawa guru-guru agamaè. Narihukkung matè matu, 19 nainappa riyabbèrèyang lao risining tau tenniyaè Yahudi. Naèllèkèllè'i matu mennang, napanrasa-rasai, sibawa nasallii. Iyakiya ri esso matelluè, ripaoto'i matu paimeng. " 20 Napolèna bainèna Zèbèdèus sibawa ana'-ana'na ri Yèsus. Suju'ni ri yolona Yèsus untu' mèllauwi anu sèuwaè. 21 Nakkutana Yèsus, "Aga riyèlori Bu'?" Nappèbali iyaro ibu'è, "Macinnaka iya duwa ana'ku tudang ri abèyona sibawa ataunna Bapa' rèkko mancaji arungngi Bapa' matti. " 22 Nakkeda Yèsus lao ri mennang, "Dè' muwissengngi aga muwèllau. Mullèga mènungngi polè ri inungeng anrasa-rasang iya harusu'è Uwènung?" Nappèbali mennang, "Uwullè. " 23 Nakkeda Yèsus, "Mènung tokko matu polè ri inungek-Ku. Iyakiya passalenna iya tudangngè ri abèyo-Ku iyarè'ga ri atauk-Ku, tenniya ha'-Ku pattentui. Iyaro sining onrongngè iyanaritu untu' sining tau iya pura napattentuè Ambo'-Ku. " 24 Wettunna iya seppulo ana' guru laingngè naèngkalinga gau'èro, macaini mennang lao ri iya duwa tau massilessurengngèro. 25 Rimakkuwannanaro riyobbi manenni mennang ri Yèsus nainappa makkeda, "Muwisseng makkedaè sining pamimping bangsa iya dè'è naissengngi Allataala napanrasa-rasai ra'ya'na, sibawa sining tomarajana mennang natanroiwi mennang. 26 Iyakiya iko dè' naweddikko makkuwaro. Sibalè'na, tau maèloè mancaji battowa ri yelle'mu, harusu'i mancaji pattumanimmu. 27 Sibawa tau maèloè mancaji mariyolo ri yelle'mu, harusu'i mancaji atammu. 28 Pada-padato Ana'na Tolinoè; polèi tenniya untu' ritumaningi, iyakiya untu' mattumani, sibawa mabbèrèyangngi nyawa-Na untu' paleppe'i maèga tau. " 29 Wettunna mennang nasalai Yèrikho, maèga tau maccowèriwi Yèsus. 30 Engka duwa tau buta tudang ri wiring lalengngè. Wettunna mennang naèngkalinga makkedaè Yèsus lalo, gorani mennang, "Ana' Daud, amasèiki!" 31 Tau maègaè iya engkaè kuwaro macairiwi mennang sibawa suroi mennang mammekko. Iyakiya lebbi cennoi mennang gora, "Puwang, Ana' Daud, amasèiki!" 32 Nalèppanna Yèsus nainappa naobbi mennang. Nakkutana Yèsus, "Aga macinna Upogau' lao ri iko?" 33 Nappèbali mennang, "Puwang, macinnaki makkita!" 34 Messèni Yèsus lao ri mennang, nanakarawai matanna mennang. Iyatoro wettuè naullèi mennang makkita. Nainappa mennang maccowèriwi Yèsus.
