1 Yèsus rijajiyang ri kota Bètlèhèm ri wanuwa Yudèa; ri wettu apparèntanna Arung Hèrodès. Iyaro wettuè siyagangngarè ahli wèttowing polè alau, polèi ri Yèrusalèm. 2 Makkutanai mennang kègi-kègi, "Kègai jaji iyaro ana'è, iya jajiyè untu' mancaji arunna tau Yahudiè? Riitai wèttowin-Na mompo ri seddè alau, na engkaki polè maèlo sompai Alèna. " 3 Wettunna naèngkalinga Arung Hèrodès iyaro, tassèleng senna'ni, makkuwatoro sininna tauwè ri Yèrusalèm. 4 Nasuroni sininna kapala imangngè sibawa guru-guru agamana bangsa Yahudiè polè maddeppungeng. Nainappa makkutana ri mennang, "Kègai maèlo jaji Arung iya najjanciyangngè Allataala?" 5 Nappèbali mennang, "Ri kota Bètlèhèm ri wanuwa Yudèa. Nasaba makkuwaniyè naoki nabiè, 6 'Iko Bètlèhèm, ri wanuwa Yèhuda, sitonget-tongenna tenniyako kaminang baiccu ri yelle'na kota-kota mapongngè ri Yèhuda. Nasaba polè ri iko polèi matu sèddi pamimping iya pimpingngèngngi umma'-Ku Israèliè. ' " 7 Puranana nalolongeng pappakatajangngèro, naobbini Hèrodès iyaro ahli wèttowing polè alauè mammekko-mekko. Nainappa makkutana ri mennang, siyaganna tongeng nappammula paita iyaro wèttowingngè. 8 Purairo nasuroni mennang lao ri Bètlèhèm sibawa pasengngèwè, "Laono musappai sibawa madècèd-dècèng passalenna Ana'èro. Narèkko muruntu'ni, paissengika, kuwammengngi ulaoto sompai. " 9 - 10 Nalaona mennang. Ri tengnga laleng, wèttowing iya naitaè mennang riyolo ri seddè alau, paitasi paimeng. Temmakana senna'na mennang mitai iyaro wèttowingngè poddiyoloiwi mennang, nainappa mappèsau ri yasè'na onronna iyaro Ana'è. 11 Muttama'ni mennang ri laleng bolaèro nanaitai iyaro Ana'è sibawa Maria, indo'-Na. Suju'ni mennang nanasompai iyaro Ana'è, nainappa natimpa onrong waramparanna, nanakkasuwiyangengngi lao ri ana'èro ulaweng, kamennyang, sibawa mur. 12 Napparèngngerangenni Allataala lao ri mennang ri laleng nippi kuwammengngi aja' nalisu ri Hèrodès. Jaji lisuni mennang molai laleng laingngè. 13 Joppanana sining ahli wèttowingngèro, nappaitanni alèna malaèka'na Puwangngè lao ri Yusuf ri laleng nippi. Makkedai iyaro malaèka'è, "Engka akkattana Hèrodès sappai iyaro Ana'è untu' mpunoi. Rimakkuwannanaro oto'no, tiwii iyaro Ana'è sibawa indo'-Na manyingkiri' ri Masèrè'. Onrono kuwaro narapi mabbicarasi-Ka lao ri iko. " 14 Moto'ni Yusuf, nainappa iyatoro wenniè natiwii iyaro Ana'è sibawa indo'-Na manyingkiri' ri Masèrè'. 15 Monroni kuwaro mennang narapi matè Hèrodès. Makkuwaniro nakajajiyang aga napowada Puwangngè naolai nabin-Na, makkuwaè, "Uwobbii Ana'-Ku polè ri Masèrè'. " 16 Wettunna naisseng Hèrodès makkedaè ribellèi ri ahli wèttowing polè alauèro, macai senna'ni. Nainappa napparèntang untu' mpuno manengngi ana' worowanè ri Bètlèhèm sibawa ri seddèna iya makkèumuru duwattaungngè liyawa. Sicoco'i iyaro sibawa pappakatajang iya nalolongengngè polè risining ahli wèttowingngèro, passalenna wettunna paita iyaro wèttowingngè. 17 Makkuwaniro kajajiyang aga pura napowada Nabi Yèrèmia, iyanaritu, 18 "Riyèngkalingai sadda mpatingngè ri Rama sadda maddararing sibawa teri. Rahèl mpatingiwi ana'-ana'na; dè' namaèlo risalèwori saba' dè'ni mennang. " 19 Matènana Hèrodès, wettunna engka mupi Yusuf ri Masèrè', nappaitanni alèna malaèka'na Puwangngè ri Yusuf ri laleng nippi. 20 Makkedai iyaro malaèka'è, "Sining tau iya maèloè mpunoi iyaro Ana'è matèni. Rimakkuwannanaro oto'no, alai iyaro Ana'è sibawa indo'-Na, namulisu ri Israèl. " 21 Moto'ni Yusuf, nanatiwii iyaro Ana'è sibawa Maria lisu ri Israèl. 22 Iyakiya ri munri naèngkalingai Yusuf makkedaè Arkèlaus, ana'na Hèrodès sullèiwi ambo'na mancaji arunna wanuwa Yudèa. Jaji mètauni Yusuf lao kuwaro. Puranana lolongessi pappaitana Puwangngè ri laleng nippi, laoni ri daèra Galilèa. 23 Monroni kuwaro ri kota riyasengngè Nazarèt. Namakkuwannanaro kajajiyanni aga iya napowadaè nabi-nabiè passalenna iyaro Ana'è: "Riyasengngi matu Tau Nazarèt. "
