1 Iyaro wettuè polèni ana'-ana' gurunna Yèsus ri Yèsus nanakkutana, "Niga riyangga' kaminang battowa ri yelle'na umma'na Allataala?" 2 Naobbini Yèsus sèddi ana' baiccu, nanasuroi tettong ri yolona mennang. 3 Nainappa makkeda Yèsus, "Ateppe'no! Banna rèkko tappinrako mancaji pada-pada ana'-ana'èwè, mumancaji matu anggota-Na umma'na Allataala. 4 Tau iya pakariyawaèngngi alèna mancajiwi pada-pada iyaè anana'è, iyanaritu kaminang battowa ri yelle'na umma'na Allataala. 5 Na tau iya tarimaèngngi anana' iya pada-padaèwè nasaba Iyya, bettuwanna natarima-Ka. " 6 "Niga nassabariwi sala sèddinna polè risining tau iya marenni'èwè dè' namateppe' ri Iyya, lebbi kessing muwi rèkko batu pallèluè riyassiyorengngi ri ellonna naripatallemme ri tasi' malamungngè. 7 Temmaka cilakana linoèwè nasaba gau'-gau' iya nassabariyè tauwè namadosa. Mèmeng gau'-gau' makkuwaèro tuli engka matu, iyakiya cilakai tau iya nassabariyè! 8 Rèkko limammu iyarè'ga ajèmu mèbbuko madosa, rette'i namuwabbèyangngi. Lebbi kessing muwi tuwo sibawa Allataala dè'gaga lima siwali iyarè'ga ajè, naiya riyabbèyangngè ri laleng api ranakaè sibawa iya duwa limammu sibawa ajèmu. 9 Narèkko matammu nassabariko pogau' dosa, cukkèi namuwabbèyangngi. Lebbi kessing muwi tuwoko sibawa Allataala dè' gaga sèddi matammu naiya riyabbèyangngè ri laleng api ranakaè sibawa iya duwa matammu. " 10 "Atike'ko! Aja' mupakatunai sala sèddinna polè risining tau iya marenni'èwè. Saba' èngngerangngi, sining malaèka'na mennang tuli engkai ri yolona Ambo'-Ku ri surugaè. [ 11 Saba' Ana'na Tolinoè polèi untu' passalama'i tau iya pusaè!] 12 Pèkkugi pallolongemmu? Akkalarapanna engka sèddi tau iya mappunnaiyè sèratu kajunna bimbala', na sikaju polè risining bimbala'èro teddèng, aga napogau' matu iyaro tauwè? Pasti nasalaiwi matu bimbala' iya asèraè pulona asèra kajunnaro ri bulu-buluè nalao sappai iya teddèngngèro. 13 Narèkko nalolongenni paimeng iyaro bimbala'è -- mateppe'-Ka -- lebbi rennui matu lao ri bimbala' sikajuèro naiya laowè riasèraè pulona asèra kajunna laingngè iya dè'è nateddèng. 14 Makkuwatoniro Ambo'mu ri surugaè dè' namaèlo sala sèddinna polè risining tauwè iya nappaè mateppe' lao ri Iyya'è pusa. " 15 "Rèkko madosai silessuremmu lao ri iko, laono ri alèna namupaitangngi asalanna. Pogau'i iyaro sibawa mammekko-mekko sipadduwa bawang. Rèkko naccowèri ada-adammu, mulolongenni iyaro silessuremmu paimeng. 16 Iyakiya rèkko dè', paccowèko sèddi iyarè'ga duwa taupa. Saba' ri laleng Kitta'è tarokii, 'Kaminang cèddè duwa iyarè'ga tellu sabbi riyapparellung untu' pannessai sèddiè tau iya riteppuè pasala. ' 17 Rèkko dè' natarimai pangajana iyaro sining tauwè, paissengini iyaro gau'è lao ri jema'è. Na angkanna, rèkko dè' namaèlo tarimai pangajana jema'è, angga'ni selaku passinge' sima sibawa sèddi tau iya dè'è naissengngi Allataala. " 18 "Issenni: Aga riyattèyang ri linoè, riyattèyang towi ri surugaè. Na aga mupattongeng ri linoè, ripattongeng towi ri surugaè. 19 Naisseng towi: Rèkko ri yelle'mu ri linoèwè duwa tau siyempe' passalenna agi-agi sibawa nassempajangenna, iyaro sempajanna natarimai matu Ambo'-Ku ri surugaè. 20 Saba' kègi duwa iyarè'ga tellu tau maddeppungeng nasaba Iyya, engka-Ka ri tengnga-tengngana mennang. " 21 Nainappa laoni Pètrus ri Yèsus nanakkutana, "Puwang, rèkko madosai silessurekku lao ri iyya, gangka wèkkasiyaga harusu'ka maddampengengngi? Gangka wèkkapituga?" 22 Nappèbali Yèsus, "Dè', dè' nagangka wèkkapitu, iyakiya wèkkapituppuloi wèkkapituè! 23 Saba' rèkko mapparèntai Allataala, keadaanna pada-padai ri laleng pakkalarapangngèwè: Engka sèddi arung maèlo pacceppi manengngi inrenna ata-atanna. 24 Wettunna bunge' mapparèssa ripangoloni ri alèna sèddi ata iya makkinrengngè majjuta-juta, 25 nadè' naullèi mpajai. Jaji napparèntanni iyaro arungngè kuwammengngi iyaro ataè naribalu' silaong ana'na enrengngè bainèna, kuwaèttopa sininna appunnangenna untu' mpajai inrenna. 26 Nasuju'na iyaro ataè ri yolona iyaro arungngè, nanaèllauwi, 'Puwang, sabbara'ki lao ri atatta. Maèlo muwi atatta mpajai manengngi inrenna atatta. ' 27 Namessèna iyaro arungngè lao ri ataèro, angkanna naleddani sininna inrenna. 28 Wettunna massu iyaro ataè, siruntu'ni sellaona, sèddiè atato, iya makkinrengngè ri alèna siyagangngarè sebbunna. Natikkenni iyaro sellaona, nanrekkè'i nanakkeda, 'Wajani sininna inremmu!' 29 Nasuju'na iyaro sellaona ri yolona nanaèllau towi, 'Sabbara'ki riyolo' sellao, maèloka waja manengngi!' 30 Iyakiya nasampèyangngi iyaro ataè. Sibalè'na naputtama'i ri tarungkuè narapi pura nawaja maneng inrenna. 31 Wettunna naita ata-ata laingngè aga pura kajajiyang, messèni mennang nanalaporo'i gau'èro ri arungngè. 32 Naiyaro arungngè naobbini iyaro ata majaè nanakkeda lao ri ataèro, 'Ata iya majaè! Sininna inremmu purani uledda nasaba muwèllauwi ri iyya. 33 Dè'ga naharusu' tokko mamasèiwi sellaomu pada-pada purana uwamasèiko?' 34 Macai senna'ni iyaro arungngè. Naputtama'ni iyaro ata majaè ri laleng tarungkuè narapi nawaja maneng inrenna. " 35 Natutu'ni curitana Yèsus sibawa ada-adaèwè, "Makkuwatoniro Ambo'-Ku ri surugaè nagaukekko matu tungke'-tungke', rèkko dè' muwaddampengengngi silessuremmu sibawa masagagèna. "
