1 Engka siyagangngarè tau Farisi sibawa tau Saduki lao ri Yèsus maèlo palaiwi jebba. Naèllauwi mennang pogau' anu makalallaing untu' pabuttiwi makkedaè polèi ri Allataala. 2 Nappèbali Yèsus, ["Rèkko labui essoè, makkedako, 'Makessing wettuè, saba' macella langiè. ' 3 Na ri èlèè, makkedako, 'Maèloi bosi iyaè essoè, saba' macella langiè sibawa massalawu. ' Nah, mullèi teppui wettuè ri laleng muwitana langiè, padahal tanra-tanranna esso ri monriè dè' mullèi teppui!"] 4 "Anengka makkuwa jana tauwè makkekkuwangngè. Muwèllau-Ka mèbbu anu makalallaing. Dè' nariwèrèkko matu muwi sèddi anu makalallaing, sangadinna anu makalallainna Nabi Yunus. " Purana makkeda makkuwaro Yèsus, nasalaini mennang nalao. 5 Wettunna ana'-ana' gurunna Yèsus lettu ri liweng tappareng, nappai naisseng mennang makkedaè nallupaiwi tiwi roti. 6 Nakkeda Yèsus lao ri mennang, "Atike'ko lao ri raginna tau Farisiè sibawa Sadukiè. " 7 Naèngkalingana iyaro ada-adanna Yèsus, makkedani ana'-ana' gurunna Yèsus sèddiè lao ri laingngè, "Makkeda makkuwairo nasaba dè' natiwi roti. " 8 Naissengngi Yèsus aga nabicara mennang. Jaji makkedani, "Magi mupersoalkangngi dè muwappunnai roti? Makurang teppe'ko iko! 9 Dè'paga mupahangngi? Dè'ga muwèngngerangngi limaè roti iya Upuwè'-puwè'è untu' limassebbu tau? Siyaga baku lebbinna iyaro rotiè iya mupaddeppungengngè? 10 Na pèkkugi towi pituè roti untu' patassebbuè tau? Siyaga baku lebbinna iya mupaddeppungengngè? 11 Magi nadè' muna mupahangngi makkedaè dè' Uwabbicara sibawa iko passalenna rotiè? Atike'ko lao ri raginna tau Farisiè sibawa Sadukiè!" 12 Angkanna napahanni ana'-ana' gurunna Yèsus makkedaè Yèsus suroi mennang matike' tenniya lao ri ragi iya ripakè mèbbu roti, iyakiya lao risining pappagguruwanna tau Farisiè sibawa Sadukiè. 13 Laoni Yèsus ri daèra seddèna kota Kaisarèa Filipi. Nakkutanana kuwaro lao ri ana'-ana' gurun-Na, "Manuru' adanna tauwè, niga iyaro Ana'na Tolinoè?" 14 Nappèbali ana'-ana' gurunna Yèsus, "Engka makkeda Yohanès Paccemmè. Engkato makkeda Elia. Laingngè makkedai Yèrèmia, iyarè'ga sala sèddinna nabiè. " 15 "Iyakiya manuru' iko, niga Iyya'è?" pakkutanana Yèsus ri mennang. 16 Nappèbali Simon Pètrus, "Bapa' iyanaritu Arung Pappassalama'è, Ana'na Allataala Iya Tuwoè. " 17 Nakkeda Yèsus, "Maupe' senna'ko Simon, ana' Yona! Saba' tenniya tolino paissengiko gau'èro, sangadinna Ambo'-Ku ri surugaè. 18 Rimakkuwannanaro issenni, ikona iyanaritu Pètrus, batu masse'è. Na ri yasè'na pallangga batuèwè maèlo Upatettong garèja-Ku, iya dè'è nawedding ricau; namuni amatèngngè! 19 Namaèlo-Ka mpèrèkko goncinna Lino Barunna Allataala. Aga muwattèyang ri linoè, riyattèyang towi ri surugaè. Na aga mupattongeng ri yasè'na linoè, ripattongeng towi ri surugaè. " 20 Purairo naparèngngerangini Yèsus ana'-ana' gurun-Na kuwammengngi aja' napowadai lao ri nigi-nigi makkedaè Alèna ritu Arung Pappassalama'. 21 Mappammulai wettuèro, napowadani Yèsus terus-terang lao ri ana'-ana' gurun-Na, makkedaè harusu'i lao ri Yèrusalèm na-Napèneddingiwi maèga anrasa-rasang polè risining pamimpingngè, kapala-kapala imangngè sibawa guru-guru agamaè. Riyunoi matu, iyakiya ri esso matelluè, moto'i matu paimeng. 22 Nainappa Pètrus nagettenni Yèsus lao ri benrèn-Na nanakaddaowi, adanna, "Memmuwarè' napabèlaiwi Allataala iyaro gau'è, Puwang! Aja' lalo nakajajiyang iyaro gau'è lao ri Puwang!" 23 Nagilinna Yèsus nakkeda lao ri Pètrus, "Esu'ko, Paggoda! Mulawa-lawai-Ka. Iyaro pikkirammu, pikkirang tolino; tenniya pikkirang Allataala!" 24 Nainappa makkeda Yèsus lao ri ana'-ana' gurun-Na, "Tau maèloè maccowèri-Ka, harusu'i nallupai apentingeng alèna, naèssangngi sallina, namatteru maccowèri-Ka. 25 Saba' tau iya maèloè mèwaiwi atuwonna, ateddèngengngi matu atuwong. Iyakiya tau iya mappèsonangngèngngi atuwonna untu' Iyya, nalolongengngi matu. 26 Aga sarona lao risèddiè tau, rèkko sininna linoèwè mancajiwi appunnangenna iyakiya teddèngngi atuwonna? Weddigga atuwongngè risèlè sibawa anu sèuwaè? 27 Dè'na namaitta Ana'na Tolinoè silaong sining malaèka'-Na napolè matu sibawa akuwasanna Ambo'-Na. Iyaro wettuè Nawale'i tungke'-tungke' tau situru pangkaukenna. 28 Issenni! Riyelle'mu mennang kuwaè engka dè' namatè matu, riwettu dè'napa naitai Ana'na Tolinoè polè selaku Arung. "
