1 Engka sikalompo' tau Farisi sibawa siyagangngarè guru agama polè ri Yèrusalèm lao ri Yèsus. Makkutanai mennang ri Yèsus, 2 "Magi ana'-ana' gurum-Mu najjalèkkaiwi ade'na toriyolota? Wettu maèlona manrè, dè' mennang nabbissa jari lebbi riyolo situru peraturangngè!" 3 Nappèbali Yèsus, "Namagi towi iko muwajjalèkkaiwi parèntana Allataala, nasaba maèlono bawang maccowèriwi ade'na nènè-nènèmu? 4 Saba' makkedai Allataala, 'Pakalebbii ambo'-indo'mu, ' sibawa 'Nigi-nigi makkeda-kedaiwi ambo'-indo'na, harusu'i rihukkung matè. ' 5 Iyakiya iko mappagguruwangngi! Rèkko makkedai tauwè ri tomatowanna, 'Dowi iya harusu'è uwèrèngngi ambo' sibawa indo', purani uwakkasuwiyangeng lao ri Allataala. ' 6 na iyaro tauwè dè'na niwajikkan untu' pakalebbii tomatowanna. Jaji, nasaba ade'na nènè-nènèmu, mupakariyawai ada-adanna Allataala. 7 Tau munapè'ko iko! Sicoco' tongeng iya nabotoè Nabi Yèsaya passalemmu, iyanaritu, 8 'Makkuwaiyè adanna Allataala: Iyaè sining tauwè pakalebbi-Ka ri tèmunna bawang, iyakiya atinna mennang mabèlai polè ri Iyya. 9 Percuma mennang sompa-Ka, saba' peraturang tolino nappagguruwang mennang samanna iyaro peraturak-Ku. ' " 10 Nanaobbini Yèsus sining tauwè nakkeda lao ri mennang, "Engkalingai kuwammengngi mupahangngi! 11 Iya muttama'è ri temuè dè' napanajisi'i tauwè'; iya bawang massuè polè ri tèmunna, iyanaritu mèbbui tauwè najisi'. " 12 Nanapolèna ana'-ana' gurunna Yèsus nanakkeda ri Yèsus, "Naissegga Bapa' makkedaè sining tau Farisiè tassinggungngi wettunna naèngkalinga Bapa' makkeda makkuwaro?" 13 Nappèbali Yèsus, "Tungke' tanet-taneng iya dè'è natanengngi Ambo'-Ku ri surugaè, ribèbbui matu. 14 Aja'na mujampangiwi sining tau Farisièro. Pamimping-pamimping buta maneng iyaro; narèkko tau butaè pimpingngi tau butaè, sempè' duwai matu ri laleng sèpe'è. " 15 Nakkeda Pètrus, "Tulungngi tapènessaingekki iyaro pakkalarapangngè, Pa'!" 16 Nappèbali Yèsus lao ri mennang, "Dè'paga palè mupahang towi? 17 Dè'ga muwissengngi, makkedaè iya muttama'è ri laleng tèmuè muttama'i ri laleng babuwaè, nainappa massusi? 18 Iyakiya iya massuè polè ri tèmuè, assalenna polèi ri atiè; na iyanaro panajisi'i. 19 Saba' nawa-nawa majaè mompoi polè ri atiè, iya nassabariyè tauwè mabbuno, malaweng, kèdo maja, mènnau, mabbèrè sabbi bellè-bellè sibawa mappètenna. 20 Gau'-gau'ènnaro mèbbui tauwè najisi', na tenniya manrè sibawa jari dè'è naribissai. " 21 Nasalaini Yèsus iyaro onrongngè nalao ri daèra seddèna kota Tirus sibawa Sidon. 22 Engka sèddi makkunrai Kanaan polè ri daèraèro lao ri Yèsus nagora-gorato, "Ana' Daud, amasèika! Nauttamakiwi sètang ana' makkunraikku. Namaladde senna. " 23 Dè' siseng nabaliwi Yèsus iyaro makkunraiè. Nanapolèna ana'-ana' gurunna Yèsus ri Alèna nanaèllauwi, "Pa', suroi iyaro makkunraiè meddè. Marukka bawammi ri monritta!" 24 Nappèbali Yèsus, "Risuro-Ka bawang lao ri bangsa Israèliè, lebbi-lebbipi iya pusaè. " 25 Napolè iyaro makkunraiè nasuju' ri yolona Yèsus nakkeda, "Tulukka, Puwang. " 26 Nappèbali Yèsus, "Dè' namakessing malai nanrèna ana'-ana'è naribuwangeng asuè. " 27 Nakkeda iyaro makkunraiè, "Tongeng, Puwang, iyakiya iyaro asuè nanrèi sèsa-sèsana iya sempè'è polè ri mèjanna puwanna. " 28 Nanakkeda Yèsus lao ri makkunraièro, "Bu', maraja tongeng teppe'mu! Leppessanni kajajiyang aga muwacinnai!" Iyatoro wettuè najjappa iyaro ana' makkunraiè. 29 Nasalaini Yèsus iyaro onrongngè, nanallaleng tuttungngi wiring Tappareng Galilèa. Nainappa mènrè ri sèddiè bulu-bulu nanatudang kuwaro. 30 Maègani tau lao ri Yèsus tiwii sining tau iya kèppangngè, butaè, pèso'è, pèpè, sibawa maèga mupa malasa laingngè. Iyaro sining tauwè nataroi mennang ri yolona Yèsus, nanapajjappai Yèsus iyaro sining tauwè. 31 Hèrang senna'ni tau maègaè iya engkaè kuwaro wettunna naita tau pèpè mullèi mappau, majjappa tau kèppangngè, joppa tau pèso'è sibawa makkita tau butaè. Nanapakalebbini mennang Allataalana bangsa Israèliè. 32 Nainappa naobbi Yèsus ana'-ana' gurun-Na nanakkeda, "Messè babuwa-Ku lao ri tau maègaèwè. Tellungngessoni ittana mennang sibawak-Ka, na makkekkuwangngè dè' mennang nappunnai anrè. Dè' Umaèlo leppessangngi mennang lisu sibawa lobbang babuwana, marenne'i matu ri lalengngè. " 33 Nanakkutanana ana'-ana' gurunna Yèsus lao ri Alèna, "Kègani wedding lolongeng anrè ri daèra tassubbuè untu' tau singngègaèwè?" 34 Nakkutana Yèsus ri mennang, "Engka siyaga rotimmu?" Nappèbali mennang, "Pitu, sibawa siyagangngarè kajunna balè baiccu. " 35 Nasuroni Yèsus tau maègaèro tudang ri tompo'na tanaè. 36 Nainappa nala iyaro pituè roti sibawa balè, nanasukkuru ri Allataala. Purairo napuwè'-puwè'ni iyaro rotiè enrengngè balè sibawa liman-Na, nainappa Nawèrèng ana'-ana' gurun-Na. Nanabbagè-bagèyanni mennang lao ri tau maègaèro. 37 Manrè manenni iyaro tau maègaè gangka messo. Purairo napaddeppungenni ana'-ana' gurunna Yèsus lebbinna iyaro nanrè. Iya manenna pitu baku penno. 38 Jumellana tau iya manrè wettuèro engka patassebbu tau worowanè bawang, dè'pa naribilang makkunraiè sibawa ana'-ana'è. 39 Nainappa nasuro Yèsus lisu tau maègaèro. Na Yèsus mènrè'ni ri sèddiè lopi nalao ri daèra Magadan.
