1 Iyatoro essoè nasalaiwi Yèsus iyaro bolaè nalao ri wirinna tapparengngè natudang kuwaro. 2 Maèga senna tau maddeppungeng mattulilingiwi Yèsus, rimakkuwannanaro laoni Yèsus tudang ri lalenna lopiè na iyaro tau maègaè tudangngi ri wirinna tapparengngè. 3 Nanappagguruna Yèsus maèga passaleng lao ri mennang ri laleng pakkalarapang. Napammulaini Yèsus curita-Na, "Engka sèddi patani lao mangampo binè. 4 Wettunna mampo, engka binè teppa ri lalengngè. Napolèna manu'-manu'è nananrèi iyaro binè angkanna cappu. 5 Engkato teppa ri onrong mabbatu-batuè, iya cèddè'mmi tanana. Iyaro sining binè masitta'i tuwo nasaba cèddè tanana. 6 Iyakiya wettunna matanrèni essoè, mammulani makelle cura'-cura'na sibawa matè nasaba dè' namalamung ure'na. 7 Engkato teppa ri tengngana alekale maddoriè. Iyakiya alekale maddoriè tuwoi sibawa nalimpengiwi iyaro cura'-cura'è angkanna dè' naullèi mabbuwa. 8 Iyakiya engkato binè teppa ri tana iya macommo'è, nanabbuwa; engka leppe' wekkasèratu, engka enneng pulona na engkato telluppulo. " 9 Puranana nacurita pakkalarapangngèro makkedani Yèsus, "Rèkko mappunnaiko daucculing, èngkalingai!" 10 Nainappa polèni ana'-ana' gurunna Yèsus nanakkutana ri alèna, "Magi Bapa' napakè pakkalarapang rèkko mabbicarai sibawa tau maègaèro?" 11 Nappèbali Yèsus, "Saba' purani riwèrèng pangissengeng untu' missengngi rahasiyana passalenna pèkkugi Allataala mapparènta, na mennang dè'. 12 Tau iya mappunnaiyènna, maèloi riwèrèng lebbi maèga, na pèdè' alebbinna matu. Iyakiya tau iya dè'è nappunnai agaga, na cèddè iya engkaè ri alèna mala riyalai matu. 13 Iyanaro saba'na Upakè pakkalarapangeng, rèkko mabbicaraka sibawa tau maègaè, saba' naitai mennang, iyakiya pada-padai tau dè'è nakkita; marèngkalingai mennang iyakiya pada-padai tau iya dè'è namarèngkalinga sibawa dè'è namappahang. 14 Ri lalennaè kajajiyangngi iya nabotoè Nabi Yèsaya, 'Makkedai Allataala: Matteru-terui matu mennang marèngkalinga iyakiya dè' mupahangngi; matteru-terui matu mennang pènessaiwi iyakiya dè' muwissengngi aga kajajiyang. 15 Saba' makunruni pikkiranna sining tauwè, mataru-taruni daucculinna sibawa napappeddenni matanna mennang. Kajajiyangngi iyaè kuwammengngi aja' nakkita matanna mennang, aja' namarèngkalinga daucculinna mennang, aja' nappahang pikkiranna mennang na aja' nalisu ri Iyya, na-Upajjappai mennang. ' " 16 Nakkeda Yèsus lao ri ana'-ana' gurun-Na, "Iyakiya temmaka upe'mu iko, saba' tonget-tongengngi muwita sibawa muwèngkalinga. 17 Engngerangngi, maèga nabi sibawa tau iya matinuluè lao ri Allataala macinna mitai iyaro muwitaè makkekkuwangngèwè, iyakiya dè' mennang naitai. Macinnai mennang mèngkalingai aga iya muwèngkalingaè makkekkuwangngèwè, iyakiya dè' naèngkalingai mennang. " 18 "Engkalingani bettuwanna pakkalarapangeng passalenna pangampoèro. 19 Binè iya teppaè ri lalengngè maddapangengngi tau iya mèngkalingaèngngi karèba passalenna pèkkugi Allataala mapparènta, iyakiya dè' napahangngi. Polèi Ibillisi'è narampasa'i aga iya pura riyampoè ri laleng atinna mennang. 20 Binè iya teppaè ri tana mabbatu-batuè, maddapangengngi tau iya mèngkalingaèngngi iyaro karèbaè, namatteru natarima sibawa masennang atinna. 21 Iyakiya iyaro karèbaè dè' nakkure' ri laleng atinna mennang, angkanna dè' natahang maitta. Lolongenna mennang asussang iyarè'ga paccallang nasaba iyaro karèbaè, matteruna mennang massakka. 22 Binè iya teppaè ri tengnga-tengngana alekale maddoriè maddapangengngi tau iya mèngkalingaèngngi iyaro karèbaè, iyakiya bata-batai passalenna atuwonna mennang sibawa macinnai magello atuwo-tuwonna. Rimakkuwannanaro iyaro karèba polè ri Allataala tassipii ri laleng atinna mennang angkanna dè' nakkèbuwa. 23 Na binè iya teppaè ri tana macommo'è maddapangengngi tau iya mèngkalingaèngngi iyaro karèbaè sibawa napahanna. Mabbuwai mennang maèga, engka sèratu, engka enneng pulona, na engkato leppe' wèkkatelluppulo wassèlè'na. " 24 Nacuritasi Yèsus sèddi pakkalarapangeng, lao ri tau maègaè, adan-Na, "Rèkko mapparèntai Allataala, keadaanna pada-padai iyaè: Engka sèddi patani mampo binè gandong iya makessingngè ri dare'na. 25 Risèuwaè wenni, wettunna matinro maneng tauwè, iyaro balinna pataniè polèi mampo binè ariya ri yelle'na gandongngèro, nainappa lao. 26 Wettunna tuwo iyaro tanet-tanengngè sibawa mammula cumpa toso'na, paita toni iyaro ariyaè. 27 Napolèna iyaro sining tau iya napagajiyè pataniè ri patanièro, nakkeda, 'Puwang, tenniyaga binè makessing Puwang ritaneng ri dare'ta? Pèkkugi carana naèngka ariya kuwaro?' 28 Nappèbali iyaro pataniè, 'Iyaro pangkaukenna baliè. ' Nanakkutanasi sining tau napagajiè iyaro pataniè, 'Tapuwèloiga Puwang laoki bèbbui iyaro ariyaè?' 29 Nappèbali, 'Aja', saba' rèkko ribèbbui iyaro ariyaè, maccowè towi matu mabèbbu gandonna. 30 Leppessanni siya iyaro ariyaè tuwo sibawa lettu wettu èngngalang. Upowadappi matu sining tau mèngngalaè: Paddeppungengngi riyolo' ariyaè, siyoi nainappa ritunu. Purairo paddeppungengngi gandonna, nainappa mutaro ri laleng lappoè. ' " 31 Nacuritasi Yèsus sèddi pakkalarapangeng lao ri tau maègaè, adan-Na, "Rèkko mapparèntai Allataala, keadaanna pada-padai pakkalarapangngèwè: Sèddiè batu sawi riyala risèddiè tau nainappa nataneng ri dare'na. 32 Batu sawi iyanaritu binè iya kaminang baiccu'è. Iyakiya rèkko tuwoi, mancajiwi iya kaminang battowaè ri yelle'na tanet-tanengngè. Mabbatangngi, angkanna polèi manu'-manu'e massarang ri takke-takkena. " 33 Engka sèuwa pakkalarapangeng laing iya nacuritaè Yèsus lao ri tau maègaè. "Rèkko mapparèntai Allataala, keadaanna pada-padai ragi iya nalaè sèddiè makkunrai, nainappa napasigaru patappulo banna labbu tarigu angkanna sawè maneng. " 34 Iya manennaro nappagguruwangngi Yèsus lao ri tau maègaè sibawa pakè pakkalarapangeng. 35 Ri lalennaro kajajiyangngi iya napowadaè nabiè, "Pakèka pakkalarapangeng rèkko mabbicaraka sibawa mennang; maèlo-Ka mabbirittangngi gau'-gau' iya tassubbuè sipongenna ripancaji linoè. " 36 Purairo nasalaini Yèsus iyaro tau maègaè, nanauttama ri bolaè. Napolèna ana'-ana' gurun-Na sibawa makkeda, "Coba Bapa' pakatajangekki bettuwanna iyaro pakkalarapangeng ariyaè ri yelle'na gandongngè. " 37 Nappèbali Yèsus, "Iyaro tau mampoè binè makessingngè iyanaritu Ana'na Tolinoè. 38 Iyaro dare'è iyanaritu linoèwè. Binè makessingngè iyanaritu sining tau iya mancajiyènna umma'na Allataala. Iyaro ariyaè iyanaritu sining tau iya maccowèè ri Ibillisi'. 39 Bali iya tanengngèngngi iyaro ariyaè iyanaritu Ibillisi'. Wettu èngngalangngè iyanaritu Esso Kiyame', na sining tau iya mèngngalaèro iyanaritu malaèka'-malaèka'è. 40 Pèkkugi ariyaè ripaddeppungeng naritunu ri laleng apiè, makkuwatoniro ri Esso Kiyame' matti. 41 Ana'na Tolinoè suroi matu malaèka'-malaèka'-Na paddeppungengngi polè ri yelle'na umma'-Na sininna iya nassabariyè tauwè pogau' dosa, sibawa sininna tau laingngè iya pogau'è ja. 42 Ribuwangngi matu mennang ri laleng dapo malluwa'-luwa'è; nakkuwanaro matu teri sibawa manrasa-rasa. 43 Na sining tau iya pogau'èngngi èlona Allataala mattappai matu pada-pada mata essoè ri laleng Lino Barunna Allataala, Ambo'na mennang. Jaji, rèkko maddaucculikko, èngkalingai!" 44 "Rèkko mapparèntai Allataala, keadaanna pada-padai pakkalarapangengngèwè: Engka waramparang tallemme' ri laleng tanaè nariruntu' risèddiè tau, nanaputtama'i paimeng ri laleng tanaè. Nasaba rennunna iyaro tauwè, laoni nabalu'i sininna appunna-punnangenna, nainappa lisu melliwi iyaro tanaè. " 45 "Rèkko mapparèntai Allataala, keadaanna pada-padai pakkalarapangengngèwè: Engka sèddi padangkang sappa mutiyara iya masuliè. 46 Wettunna nalolongeng sibatu mutiyara iya magello senna'è iya dè'è padanna, masitta'ni lao nanabalu' manengngi appunna-punnangenna, nainappa naelli iyaro mutiyara sibatuè. " 47 "Rèkko mapparèntai Allataala, keadaanna riyakkalarapangengngi jala iya ripallebba'è ri tapparengngè, nalolongeng maddupa-rupang balè. 48 Pennonana iyaro jalaè, nakkani sining pakkajaè iyaro jalaè mènrè ri pottanangngè. Nainappa tudang pilèi iyaro sining balè: Iya makessingngè nataroni ri bèmpaè naiya dè'è namakessing nabuwanni. 49 Makkuwatoniro lao-laona ri Esso Kiyame', laowi matu malaèka'-malaèka'è passara-sarangngi sining tau majaè polè risining tau iya pogau'èngngi èlona Allataala. 50 Nainappa iyaro sining tau majaè ribuwangngi ri laleng dapo makkèapiè. Nakkuwanaro matu teri sibawa manrasa-rasa. " 51 Nakkutana Yèsus, "Mupahagga iya manennaro?" Nappèbali mennang, "Ripahang Pa'!" 52 Nakkeda Yèsus, "Iyanaro saba'na tungke' guru agama iya mancajiyè anggotana umma'na Allataala, pada-padai sèddiè punna bola iya passuè polè ri onrong waramparanna barab-barang baruè sibawa malaungngè. " 53 Puranana nacurita Yèsus sining pakkalarapangngèro, nasalaini iyaro onrongngè, 54 nalisu ri kampong assalen-Na. Kuwaniro lao mappagguru ri bola assompangngè, na sining tau iya mèngkalingaèngngi kuwaro, hèrang senna'ni. Makkedani mennang, "Polè kègi iyaè tauwè lolongeng pangissengeng pada-padaèro? Sibawa polè kègi towi lolongeng akuwasang untu' pogau'i anu makalallaingngè? 55 Tenniyaga iyaè ana' panrè aju? Tenniyaga iyaro Maria indo'-Na; sibawa silessu-silessuren-Na iyanaritu Yakobus, Yusuf, Simon sibawa Yudas? 56 Sibawa tenniyaga ana'-ana'daran-Na monroto kuwaè? Polè kègi lolongeng iya manennaro?" 57 Na sining tauwè dè' namaèlo tarimai Yèsus. Nakkedana Yèsus lao ri mennang, "Sèddiè nabi ripakalebbii kègi-kègi, sangadinna ri kampong assalenna sibawa ri bolana muto. " 58 Rimakkuwannanaro dè' napogau'i Yèsus maèga anu makalallaing kuwaro saba' dè' mennang namateppe'.
