1 Iyanaè assossorenna nènè-nènèna Yèsus Kristus, wijanna Daud, wijanna Abraham. Polè ri Abraham lettu ri Daud tarokii aseng-ngaseng makkuwaèwè: 2 - 11 Abraham, Ishak, Yakub, Yèhuda sibawa silessu-silessurenna, Pèrès sibawa Zèra (indo'na mennang riyaseng Tamar), Hèzron, Ram, Aminadab, Nahason, Salmon, Boas (indo'na iyanaritu Rahab), Obèd (indo'na iyanaritu Rut), Isai, sibawa Arung Daud. Polè ri Daud lettu ripalina tau Israèliè ri Babèl tarokii aseng-ngaseng makkuwaèwè: Salomo (indo'na iyanaritu bainèna riyolo Uria), Rèhabèam, Abia, Asa, Yosafat, Yoram, Uzia, Yotam, Ahas, Hizkia, Manasyè, Amon, Yosia, Yèkhonya sibawa silessu-silessurenna. 12 - 16 Polè ri wettunna bangsa Israèliè ripali ri Babèl lettu ajajiyanna Yèsus tarokii aseng-ngaseng makkuwaèwè: Yèkhonya, Sèaltièl, Zèrubabel, Abihud, Elyakim, Azur, Zadok, Akhim, Eliud, Elèazar, Matan, Yakub, Yusuf lakkainna Maria. Napolè ri Maria jajiwi Yèsus iya riteppuè Kristus. 17 Jaji polè ri Abraham lettu ri Daud, iya manenna engka seppulo eppa assossoreng. Polè ri Daud lettu ri wettu ripalina bangsa Israèliè ri Babèl engkato seppulo eppa assossoreng. Polè ri wettu ripalina bangsa Israèliè ri Babèl lettu ajajiyanna Kristus, engkato seppulo eppa assossoreng. 18 Makkuniè curitana passalenna ajajiyanna Yèsus Kristus. Indo'-Na iyanaritu Maria, mattunangangngi sibawa Yusuf. Iyakiya riwettu dè'napa mennang nakawing, mattampu'ni Maria. Dè' naissengngi Yusuf rèkko mattampu'i Maria nasaba akuwasanna Rohna Allataala. 19 Iyaro Yusuf tunanganna, iyanaritu sèddiwi tau iya tuli turusiyèngngi hukkunna agamaè. Jaji maèloi pettuiwi attunanganna, iyakiya dè' narukkangngi, kuwammengngi dè' namasiri Maria ri yolona tau maègaè. 20 Mattengngangngi Yusuf timbat-timbangngi iyaro gau'è, mannippiwi. Ri laleng nippinnaro, naitai sèddi malaèka'na Puwangngè makkeda lao ri alèna, "Yusuf wijanna Daud, aja' mumètau kawingi Maria; saba' iyaro ana' engkaè ri laleng tampu'na, jajiwi polè ri akuwasanna Rohna Allataala. 21 Najajiyangngi matu Maria sèddi ana' worowanè. Iyaro ana'è harusu'i muwèrèng aseng Yèsus, nasaba Napassalama'i matu umma'-Na polè ri dosana mennang. " 22 Iya manennaro kajajiyangngi makkuwaro kuwammengngi nakajajiyang aga iya napowadaè Puwangngè naolai nabin-Na, iyanaritu, 23 "Mattampu'i matu sèddiè ana'dara nanajajiyang sèddi ana' worowanè. Iyaro ana'è riyasengngi matu Immanuèl. " (Immanuèl iyanaritu ada Ibrani iya bettuwannaè, "Allataala engka sibawakki". ) 24 Moto'nana Yusuf, napogau'ni aga iya napowadaè iyaro malaèka'na Puwangngè lao ri alèna. Kawinni sibawa Maria. 25 Iyakiya riwettu dè'napa najajiyangngi Maria iyaro ana'è, dè' nasilureng Yusuf sibawa Maria. Jajinnana iyaro ana'è, Nasenni Yusuf Yèsus.
